រាជធានីភ្នំពេញ ៖ សង្ស័យបើកបរក្នុងល្បឿនលឿននិងខ្វះការប្រុងប្រយ័ត្ននៅផ្លូវបំបែកជាបួន ទើបបង្កឲ្យរថយន្តកាមរីបាឡែនមួយគ្រឿងនិងរថយន្តកូរ៉េមួយគ្រឿងទៀតបានបុកគ្នាយ៉ាងពេញទំហឹង បណ្ដាលឲ្យរថយន្តកូរ៉េក្រឡាប់ផ្ងារជើង ចំណែករថយន្តម៉ាកកាមរីរងការខូចខាតផ្នែកខាងមុខ ។ ហេតុការណ៍ខាងលើនេះបានកើតឡើងកាលពីវេលាម៉ោង២និង៥០នាទីរំលងអធ្រាត្រឈានចូលថ្ងៃទី២០ ខែកុម្ភៈ ឆ្នាំ២០២០…
រាជធានីភ្នំពេញ ៖ សង្ស័យបើកបរក្នុងល្បឿនលឿននិងខ្វះការប្រុងប្រយ័ត្ននៅផ្លូវបំបែកជាបួន ទើបបង្កឲ្យរថយន្តកាមរីបាឡែនមួយគ្រឿងនិងរថយន្តកូរ៉េមួយគ្រឿងទៀតបានបុកគ្នាយ៉ាងពេញទំហឹង បណ្ដាលឲ្យរថយន្តកូរ៉េក្រឡាប់ផ្ងារជើង ចំណែករថយន្តម៉ាកកាមរីរងការខូចខាតផ្នែកខាងមុខ ។
ហេតុការណ៍ខាងលើនេះបានកើតឡើងកាលពីវេលាម៉ោង២និង៥០នាទីរំលងអធ្រាត្រឈានចូលថ្ងៃទី២០ ខែកុម្ភៈ ឆ្នាំ២០២០ ត្រង់ចំណុចស្តុបលូ៣ តាមបណ្តោយផ្លូវណតប្រ៊ីតកែងនឹងផ្លូវ២០០៤ ស្ថិតក្នុងសង្កាត់អូរបែកក្អម ខណ្ឌសែនសុខ។
ភាគីខាងរថយន្តមួយគ្រឿងម៉ាកកាមរីបាឡែន ពណ៌ស ពាក់ស្លាកលេខ ព្រះសីហនុ ២A-៤៥៨៤ បើកបរដោយបុរសម្នាក់មិនស្គាល់អត្តសញ្ញាណ ។ ចំណែកភាគីខាងរថយន្តកូរ៉េមួយគ្រឿងទៀតជិះគ្នា៣នាក់ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ២AA-០៥៦១ អ្នកបើកបរ និងអ្នករួមដំណើរមិនស្គាល់អត្តសញ្ញាណនោះទេ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់បើករបរថយន្តមួយគ្រឿងម៉ាកកាមរីបាឡែន ពណ៌ស ធ្វើដំណើរតាមបណ្ដោយផ្លូវ២០០៤ ក្នុងទិសដៅពីកើតទៅលិច ក្នុងល្បឿយ៉ាងលឿនបំរុងបើកឆ្លងកាត់ផ្លូវណតប្រ៊ីត ។
តាមប្រភពដដែលបានបន្តថា ស្របពេលជាមួយគ្នានោះដែរ ស្រាប់តែមានបុរស៣នាក់ជិះក្នុងរថយន្តកូរ៉េមួយគ្រឿង ធ្វើដំណើរតាមបណ្ដោយផ្លូវណតប្រ៊ីត ក្នុងទិសដៅពីត្បូងទៅជើង និងក្នុងល្បឿនយ៉ាងលឿន លុះមកដល់ចំណុចកើតហេតុខាងលើដែលជាផ្លូវបំបែកជាបួនទើបបង្កឲ្យរថយន្តទាំងពីរគ្រឿងអកហ្សើ ខណៈនោះរថយន្តម៉ាកកាមរីបាឡែនក៏ជ្រុលទៅបុករថយន្តកូរ៉េយ៉ាងពេញទំហឹង បណ្ដាលឲ្យរថយន្តកូរ៉េក្រឡាប់ផ្ងារជើងខ្ទាតទៅខាងមុខប្រមាណ៣០ម៉ែត្ររងការខូចខាតដាច់កង់ខាងក្រោយ។ ចំណែកឯរថយន្តម៉ាកកាមរីបាឡែនបានរងការខូចខាតក្រពឹតផ្នែកខាងមុខយ៉ាងដំណំ ភ្លាមៗនោះអ្នកបើកបររថយន្តទាំងពីរគ្រឿងនាំគ្នារត់គេចខ្លួនអស់ បន្សល់ទុកតែរថយន្តដែលរងការខូចខាតទាំងពីរគ្រឿងប៉ុណ្ណោះ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកអន្តរាគមន៍ និងទាក់ទងហៅសមត្ថកិច្ចជំនាញឲ្យចុះមកធ្វើការវាស់វែងនិងស្ទូចយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំម្ចាស់ចូលខ្លួនមកធ្វើការដោះស្រាយគ្នាតាមផ្លូវច្បាប់នៅពេលក្រោយ៕ (កែសម្រួលដោយ ៖ ធីតា)
ចែករំលែកព័តមាននេះ