រាជធានីភ្នំពេញ ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានថ្លែងថា ក្នុងឱកាសដែលលោកបានជួបសំណេះសំណាលជាមួយភ្ញៀវទេសចររបស់នាវា Westerdam ដែលកំពុងស្នាក់នៅក្នុងសណ្ឋាគារសុខាភ្នំពេញ ដើម្បីរង់ចាំហោះហើរទៅកាន់ប្រទេសរបស់ពួកគាត់រៀងៗខ្លួននោះ ភ្ញៀវទាំងអស់នោះបានកោតសរសើរមិនដាច់ពីមាត់នូវការធ្វើបដិសណ្ឋារកិច្ចដ៏កក់ក្តៅរបស់កម្ពុជា ។ នេះបើយោងតាមផេកក្រសួងទេសចរណ៍ ។
លោក ថោង ខុន រដ្ឋមន្ត្រីបន្ថែមថា អ្វីដែលពិសេសជាងនេះទៀតនោះ ដើម្បីកំដរការអផ្សុកក្រសួងទេសចរណ៍បានសហការជាមួយក្រសួងវប្បធម៌ និងវិចិត្រសិល្បៈរៀបចំការសម្តែងទស្សនីយភាព សិល្បៈ ដែលមានការសម្តែងរបាំប្រពៃណីរបស់ខ្មែរជូនពួកគាត់បានទស្សនា ។ បន្ទាប់ពីបានទស្សនាហើយអ្នកទេសចរទាំងនោះបានស្ងើចសរសើរមិនដាច់ពីមាត់ និងបង្ហាញអារម្មណ៍សប្បាយរីករាយយ៉ាងខ្លាំងចំពោះការរៀបចំនេះ ។
លោករដ្ឋមន្ត្រីបន្ថែមថា ចំពោះភ្ញៀវទេសចររបស់នាវា WESTERDAM ចុងក្រោយចំនួន២៣៣នាក់ ដែលចេញពីខេត្តព្រះសីហនុទើបមកដល់រាជធានីភ្នំពេញ នៅម៉ោងប្រមាណ៧យប់នេះ ដោយសារពួកគាត់មានភាពហត់នឿយខ្លាំងទើបមិនសម្តែងសិល្បៈជូនពួកគាត់ទស្សនា ប៉ុន្តែនៅថ្ងៃស្អែកនឹងរៀបចំសម្តែងជូនគាត់ទស្សនាទៀតចាប់ពីម៉ោង៤រសៀល ។
បើតាមលោក ថោង ខុន ដោយទទួលព័ត៌មានពីលោក Orlando ប្រធានក្រុមហ៊ុនកប៉ាល់ Westerdam បានឲ្យដឹងថា នៅល្ងាចថ្ងៃស្អែកភ្ញៀវនឹងចេញពីសណ្ឋាគារសុខាប្រមាណ៤០០នាក់ទៀតនឹងហោះហើរតាមគោលដៅនៃប្រទេសមួយចំនួន ដើម្បីធ្វើដំណើរទៅកាន់ប្រទេសរបស់គេរៀងៗខ្លួន ៕
ចែករំលែកព័តមាននេះ