រាជធានីភ្នំពេញ ៖ បន្ទាប់ពីលោក តឹក ប៊ុនវី ត្រូវបានបោះឆ្នោតគាំទ្រឲ្យធ្វើជាប្រធានសហព័ន្ធកីឡាកាយវប្បកម្ម និងលំហាត់ប្រាណជំនួសលោក ស៊ីម សុក មង្គល រស្មី សម្រាប់អាណត្តិថ្មី ឆ្នាំ២០២០-២០២៤ មានការរំពឹងយ៉ាងខ្លាំងថា សហព័ន្ធមួយនេះ នឹងកែប្រែមុខមាត់ថ្មី និងបញ្ចប់រឿងអាស្រូវដ៏រ៉ាំរ៉ៃ ដែលធ្លាប់កើតមាន ។
លទ្ធផលផ្លាស់ប្ដូរប្រធាននេះ កើតឡើងបន្ទាប់ពីមានការចោទប្រកាន់ថា អតីតប្រធានដែលធ្លាប់កាន់តំណែង បានបង្កើតបញ្ហាពុករលួយបក្សពួកនៅក្នុងសហព័ន្ធ និងត្រូវបានក្រសួងចោទថា បានដើរតួជាប្រធានសហព័ន្ធផង និងជាគ្រូបង្វឹកផងគ្រប់ពេលមានការប្រកួតនៅក្រៅប្រទេសដើម្បីទទួលបានប្រាក់ចំណែកពេលកីឡាករខ្លួនដឹកនាំទៅឈ្នះមេដាយ បណ្ដាលឱ្យ គ្រូបង្វឹកពិតប្រាកដមានរឿងអន់ចិត្តតែមិនចេញមុខតវ៉ា។
ការបោះឆ្នោតប្ដូរប្រធានថ្មី ត្រូវបានធ្វើឡើងក្នុងអង្គមហាសន្និបាតបូកសរុបការងារ អាណត្តិទី២ និងដាក់ទិសដៅអនុវត្តសម្រាប់អាណត្តិទី៣ កាលពីថ្ងៃទី១ កុម្ភៈ ឆ្នាំ២០២០ ដោយគេចាត់ទុកថា នោះគឺកាលបរិច្ឆេទបញ្ចប់បញ្ហាទំនាស់ផ្ទៃក្នុងដែលកើតមានឡើងយ៉ាងរ៉ាំរ៉ៃនៅក្នុងសហព័ន្ធកីឡាកាយវប្បកម្ម និង លំហាត់ប្រាណ ដែលបានអូសបន្លាយអស់ រយៈពេលជាច្រើនខែ ។ អ្នកឃ្លាំមើលជាច្រើន បានគូសបញ្ជាក់ថា ការផ្លាស់ប្តូរប្រធានចាស់ដែលមានរឿងអាស្រូវ នឹងជួយឱ្យរឿងទំនាស់ត្រូវបានបញ្ចប់់ ។ ក្នុងនោះសូម្បីរចនាសម្ព័ន្ធថ្នាក់ដឹកនាំមួយចំនួនក៏ត្រូវបានផ្លាស់ប្ដូរផង ដែរដើម្បីពង្រឹងការងារជាថ្មី ។
លោក តឹក ប៊ុន វី គឺជាអតីតអគ្គលេខាធិការត្រូវបានសមាជិកសមាជិកាបោះឆ្នោតគាំទ្រឲ្យធ្វើជាប្រធានសហ ព័ន្ធសម្រាប់អាណត្តិឆ្នាំ២០២០-២០២៤ ។ក្នុងការបោះឆ្នោតនោះប្រធានថ្មីទទួលបានការគាំទ្រចំនួន១៦សំឡេង ចំណែកអតីតប្រធានសហព័ន្ធចាស់គឺលោកស៊ីមសុក មង្គល រស្មី ទទួលបានការគាំទ្រតែ៣សំឡេង ។ ការបោះឆ្នោតនេះ មាន សមាជិក សមាជិកា មកពីតំណាងក្លិប-សមាគម និងសមាជិកប្រតិបត្តិសហព័ន្ធជាង២០រូបចូល រួម ។
ទោះជាមិនទាន់ប្រាកដថា ការផ្លាស់ប្តូរសមាសភាពដឹកនាំថ្មីនេះ អាចធ្វើឲ្យសហព័ន្ធ មានដំណើរការល្អ១០០ភាគរយ ក៏ត្រូវគេមើលឃើញថា នឹងអាចបិទបញ្ចប់វិវាទដែលកើតឡើងនៅក្នុងសហព័ន្ធ និងអាចជួយឱ្យ ស្ថាប័ននេះដំណើរការល្អជាងមុន ។ ជាពិសេសបន្ទាប់ពីប្រធានសហព័ន្ធថ្មី និងសមាជិកក្រុម ប្រឹក្សាភិបាលថ្មី បានឯកភាពគ្នាលើបញ្ហាផ្ទៃក្នុង ដោយបង្កើតការអធ្យាស្រ័យគ្នា និងភាពឈ្លាសវៃ ក្នុងការដឹកនាំក្រោយបោះឆ្នោត។
លោក តឹក ប៊ុនវី ដែលទើបជាប់ឆ្នោតជា ប្រធានសហព័ន្ធ ប្តេជ្ញាថា លោកនឹងខិតខំ ប្រឹងប្រែងស្វែងរកយុទ្ធសាស្ត្រដើម្បីដឹកនាំសហព័ន្ធឲ្យកាន់តែមានភាពរីកចម្រើន និងល្បីល្បាញ ទាំងលើថ្នាក់ជាតិ និងអន្តរជាតិ ។ ជាមួយគ្នានោះ លោក បឹង គឹមតោ ប្រធានស្តីទី នាយកដ្ឋានអប់រំ កាយ និងកីឡា ក៏បានទទួលស្គាល់ថា ការបោះឆ្នោតជ្រើសរើស សមាជិកប្រតិបត្តិថ្មីរបស់សហព័ន្ធកីឡាកាយវប្បកម្ម និងលំហាត់ប្រាណ បានប្រព្រឹត្តទៅដោយរលូន និងស្របតាមលក្ខន្តិកៈ ច្បាប់ស្តីពីការបោះឆ្នោតរបស់ក្រសួងអប់រំ យុវជន និងកីឡា ។ លោកថា សហព័ន្ធនឹងមានភាពប្រសើរឡើង ដោយសារតែមន្ត្រីដែលជាថ្នាក់ដឹកនាំថ្មី មានការឯកភាពជាថ្មី ។ ទន្ទឹមនឹងនេះ លោកជំរុញឲ្យ សមាជិក សមាជិកាប្រតិបត្តិថ្មីទាំងអស់ ត្រូវចេះរួបរួមសាមគ្គីគ្នាក្នុងការដឹកនាំសហព័ន្ធឲ្យកាន់តែ មានការអភិវឌ្ឍបន្ថែមទៀត ។
គួរបញ្ជាក់ផងដែរថា សមាជិកប្រតិបត្តិអាណត្តិទី៣ដែលត្រូវបានគេរំពឹងថានឹងជួយឱ្យសហព័ន្ធកាយវប្បកម្មនឹងល្អប្រសើរនោះរួមមាន លោក តឹក ប៊ុនវី (ប្រធាន), លោក ចាប់ វ៉ាន់នី (អនុប្រធាន), លោកសុខ វណ្ណៈ (អគ្គលេខាធិការ), លោកណុំ សុបិន្ត (អគ្គលេខាធិការរង), លោក ហេង សារ៉ាត់ (អគ្គហិរញ្ញឹក), លោកធិ ប៊ុនធី (អគ្គហិរញ្ញឹករង), លោក សំបូរ ណាន, លោក អ៊ុន បូរ៉ាត់, លោកហ៊ុន សុភី និង លោក ឈុន ឌី រតនា ជាសមាជិក ៕ (កែសម្រួលដោយ ៖ បុប្ផា)
ចែករំលែកព័តមាននេះ