រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ផ្ទះ១កន្លែងត្រូវជនសង្ស័យលួចដុតម្ដងជា២ដងបានសម្រេចឆាបឆេះ ផ្អើលអស់ប្រជាពលរដ្ឋ និងអ្នកជិតខាង ព្រមទាំងសមត្ថកិច្ចទាក់ទងហៅរថយន្ដពន្លត់អគ្គិភ័យមកអន្តរាគមន៍ បង្កឱ្យមានការភ្ញាក់ផ្អើលកាលម៉ោង២រំលងអធ្រាត្រឈានចូលថ្ងៃទី១៩ ខែកុម្ភៈ ឆ្នាំ២០២០ ស្ថិតនៅភូមិក្រាំងអង្ក្រង២ សង្កាត់ក្រាំងធ្នង់ ខណ្ឌសែនសុខ ។
សេចក្តីរាយការណ៍បន្តថា ម្ចាស់ផ្ទះខាងលើមានឈ្មោះ ប៉ុន សុភក្តិ ភេទប្រុស អាយុ៣៥ឆ្នាំ មុខរបរជាងជួសជុលរថយន្ត រស់នៅភូមិក្រាំងអង្ក្រង២ សង្កាត់ក្រាំងធ្នង់ ខណ្ឌសែនសុខ មានប្រពន្ធឈ្មោះ សួស សុភា ភេទស្រី អាយុ២៨ឆ្នាំ មុខរបរជាមេផ្ទះ និងមានសមាជិកចំនួន៥នាក់នៅក្នុងក្រុមគ្រួសារ។
តាមប្រភពពីម្ចាស់ផ្ទះបានឱ្យដឹងថា នៅមុនលកើតហេតុ នៅវម៉ោង១រំលងអធ្រាត្រឈានចូលថ្ងៃទី១៩ ខែកុម្ភៈ ខណៈដែលគាត់កំពុងតែដេកលង់លក់ ក៏ស្រាប់តែមានភ្លើងឆាបឆេះនៅលើឡៅតឿ ។ ពេលភ្លាមៗនោះ ក្រុមគ្រួសាររបស់គាត់បាននាំគ្នារត់ចេញមកខាងក្រៅផ្ទះ ស្រាប់តែទ្វារផ្ទះរបស់គាត់ត្រូវគេយកសោ មកចាក់ពីខាងក្រៅជាប់ គាត់ក៏បានធាក់ផ្តាច់ត្រចៀកទ្វារ ហើយយកទឹក និងបំពង់ពន្លត់អគ្គិភ័យបាញ់រលត់ភ្លាមផងដែរ ដោយសារតែភ្លើងទើបតែឆេះមុងខ្នើយបន្តិចបន្តួចប៉ុណ្ណោះ ។
ម្ចាស់ផ្ទះបានបន្តទៀតថា ផ្ទះរបស់គាត់មិនបានបិទទ្វារទេ ពេលដែលគាត់ដេកលង់លង់ នោះ ព្រោះមិនមានទ្រព្យសម្បត្តិធំដុំផង លុះពេលភ្លើងឆេះនៅក្នុងផ្ទះមានធុំក្លិនអាល់កុល និងមានអាល់កុលស្រក់ចុះធុំក្លិនជាប់នឹងខ្លួនគាត់ទៀតផង ខណៈដែលទាំងផ្ទះរបស់គាត់មិនមានប្រើប្រាស់អាល់កុលផង ។
ម្ចាស់ផ្ទះបន្តថា បន្ទាប់ពីមានភ្លើងឆេះដោយមិនដឹងមូលហេតុខណៈកំពុងដេកលង់លក់ ពេលភ្ញាក់ឡើងមានជនសង្ស័យចាក់សោពីខាងក្រៅបែបនេះទៀតធ្វើឲ្យគាត់មានការភ័យខ្លាច ពេលពន្លត់ភ្លើងឆេះរលត់អស់ហើយ និងបានយកខ្នើយមុងភួយបោះចោលអស់ ហើយគាត់ និងក្រុមគ្រួសារបាននាំគ្នាចាក់សោផ្ទះទុកចោល រួចក៏នាំគ្នាទៅដេកនៅផ្ទះសំណាក់នៅក្បែរផ្ទះរបស់គាត់វិញ ។
ម្ចាស់ផ្ទះបន្តទៀតថា ខណៈពេលកំពុងតែដេកនៅផ្ទះសំណាក់នោះ ក៏ស្រាប់តែមានអ្នកជិតខាងបានទូរស័ព្ទប្រាប់ថា ផ្ទះរបស់គាត់មានភ្លើងឆាបឆេះម្ដងទៀត គាត់ក៏បាននាំប្រពន្ធមកផ្ទះវិញ ប៉ុន្តែផ្ទះរបស់គាត់ត្រូវភ្លើងកំពុងតែឆាបឆេះយ៉ាងខ្លាំងទៅហើយ ។ ភ្លាមៗនោះក៏ត្រូវបានប្រជាពលរដ្ឋនាំគ្នាជួយយកម៉ូតូចេញបាន២គ្រឿងតែឆេះអស់ខ្លះ ចំណែកសំភារៈ និងរបស់របរនៅក្នុងផ្ទះត្រូវអគ្គិភ័យឆាបឆេះខ្ទេចទាំងស្រុង។
ពាក់ព័ន្ធករណីអគ្គិភ័យខាងលើនេះ រថយន្តពន្លត់អគ្គិភ័យរបស់ស្នងការរាជធានីភ្នំពេញបានចុះមកអន្តរាគមន៍បាញ់ពន្លត់ចំនួន៣គ្រឿង ហើយបានបាញ់ទឹកអស់ចំនួន២គ្រឿង ភ្លើងក៏បានរលត់ទៅវិញផងដែរ ។
ចំពោះអគ្គិភ័យខាងលើនេះដែរ ម្ចាស់ផ្ទះបានអះអាងថា មានអ្នកលួចចូលទៅដុតផ្ទះរបស់គាត់ពិតប្រាកដណាស់ ខណៈពេលពួកគាត់កំពុងដេកលង់លក់ ភ្លើងក៏ឆេះថែមទាំងមានធុំក្លិនអាល់កុល និងផ្ទះត្រូវគេចាក់សោជាប់ពីខាងក្រៅទៀតផង ។ ខណៈពេលពន្លត់រលត់អស់ម្តងហើយ ពូកគាត់ក៏នាំគ្នាទៅដេកនៅផ្ទះសំណាក់ បែរជាមានភ្លើងឆេះម្តងទៀត ហើយឆេះខូចខាតតែរបស់របរក្នុងផ្ទះ និងជញ្ជាំងផ្ទះរោលខ្មៅប្រេះស្រាំអស់ហើយ ។
ទាក់ទិននឹងករណីខាងលើនេះ ម្ចាស់ផ្ទះសូមឲ្យសមត្ថកិច្ចជួយស្រាវជ្រាវរកមុខជនដៃដល់ដែលមកលួចដុតផ្ទះរបស់គាត់យកមកផ្តន្ទាទោសផង ៕ (កែសម្រួលដោយ ៖ បុប្ផា)
ចែករំលែកព័តមាននេះ