រាជធានីភ្នំពេញ៖ បន្ទាប់ពីការរក្សាភាពស្ងៀមស្ងាត់អស់រយៈពេល ៥ថ្ងៃកន្លងទៅសមាគមរោងចក្រកាត់ដេរនៅកម្ពុជា ហៅកាត់ថា GMAC នៅទីបំផុតបានចេញសេចក្តីថ្លែងការណ៍ បង្ហាញការសោកស្តាយយ៉ាងខ្លាំងចំពោះសេចក្តីសម្រេចុងក្រោយរបស់សហភាពអឺរ៉ុបដែលបានព្យួរផ្នែកខ្លះនៃកម្មវិធីប្រព័ន្ធអនុគ្រោះពន្ធ «គ្រប់មុខទំនិញលើកលែងតែសព្វាវុធ (EBA) សម្រាប់ប្រទេសកម្ពុជា សម្រេចកាលពីថ្ងៃទី១២ ខែកុម្ភៈ ឆ្នាំ២០២០ កន្លងទៅ ។
យោងតាមសេចក្តីប្រកាសព័ត៌មានកាលពីថ្ងៃទី១៧ ខែកុម្ភៈម្សិលមិញរបស់ GMACបានបង្ហាញថា EBA អនុញ្ញាតឱ្យបណ្តាប្រទេសអឺរ៉ុបនាំចូលផលិតពីប្រទេសកម្ពុជា (លើកលែងតែសព្វាវុធ) ដោយមិនយកពន្ធនិងគ្មានកូតា។ អ្នកទទួលបានអត្ថប្រយោជន៍សំខាន់ៗពីកម្មវិធីនេះគឺវិស័យកាត់ដេរ និងផលិតផលធ្វើដំណើររបស់កម្ពុជាដែលតំណាងដោយសមាគមរោងចក្រកាត់ដេរនៅកម្ពុជា។ ឧស្សាហកម្មទាំងនេះមានប្រមាណ ៧៥% នៃការនាំចេញទំនិញសរុបរបស់កម្ពុជានិងប្រមាណ ៩០% នៃការនាំចេញទៅសហភាពអឺរ៉ុប ដែលជាទីផ្សារធំបំផុតសម្រាប់ទំនិញដែលផលិតដោយបណ្តារោងចក្រតំណាងដោយ GMAC។
បើតាម GMAC វិស័យកាត់ដេរផ្តល់ការងារដល់ពលរដ្ឋជាង៧៥ម៉ឺននាក់និងផ្តល់ប្រាក់ចំណេញដោយផ្ទាល់ប្រមាណ ២០% ដល់គ្រួសារនៅទូទាំងប្រទេស ហេតុនេះសមាគមជំរុញឱ្យសហភាពអឺរ៉ុបធ្វើការពិចារណាឡើងវិញ។ សេចក្តីប្រកាសដដែលលើកឡើងថា «ការផ្តល់ការងារនៅក្នុងវិស័យទាំងនេះដែលគាំំទ្រដោយកម្មវិធីអនុគ្រោះពន្ធ EBA ឥឡូវមានចំនួនលើស៧៥ម៉ឺននាក់និងបានរួមចំណែកដល់ការទាញប្រជាជនកម្ពុជារាប់លាននាក់ចេញពីភាពក្រីក្រ ។ កម្មករភាគច្រើនបំផុតជាស្ត្រីដែលគ្រប់គ្រងគ្រួសារ មើលថែសុខភាពនិងសុខុមាលភាពរបស់កូនៗនិងផ្តល់ប្រាក់ចំណេញដោយផ្ទាល់ដល់គ្រួសារជាង២០% នៃគ្រួសារក្នុងប្រទេសកម្ពជា ។
ប្រភពដដែលបានស្នើសុំយ៉ាងដូច្នេះថា «សមាគមសូមជំរុញគណៈកម្មការអឺរ៉ុបនិងសមាជិកសភាអឺរ៉ុបពិចារណាឡើងវិញចំពោះសេចក្តីសម្រេចនេះដោយពិចារណាទៅលើគុណតម្លៃនៃកម្មវិធីនេះដែលបានដាក់ឱ្យអនុវត្តជិត២០ឆ្នាំកន្លងទៅ ជំនួយអភិវឌ្ឍន៍ កាត់បន្ថយភាពក្រីក្រ និងសេចក្តីថ្លៃថ្នូរនៃការងារ ។ កម្មវិធីEBA គឺជាជោគជ័យច្បាស់មួយនៅក្នុងប្រទេសកម្ពជាក្នុងការសម្រេចបាននូវគោលដៅទាំងនេះ។ការដកដោយផ្នែកនៃកម្មវិធីនេះនឹងបានត្រឹមតែធ្វើឱ្យបាត់បង់ការងារនិងនាំឱ្យមានភាពក្រីក្រ»។
សូមបញ្ជាក់ថាពាក់ព័ន្ធនឹងការសម្រេចរបស់គណៈកម្មការអឺរ៉ុបព្យួរផ្នែកខ្លះនៃ EBA ពីកម្ពុជា គឺត្រូវឆ្លងកាត់ការបោះឆ្នោតរបស់សភាអឺរ៉ុបមួយវគ្គទៀត ដូច្នេះបើសិនជាមានការសម្រេចណាមួយដោយសភាអឺរ៉ុបតាមអ្វីដែលគណៈកម្មការអឺរ៉ុបសម្រេចនោះ ការអនុវត្តន៍នៃការបង់ពន្ធ ២០% លើសម្លៀកបំពាក់ ស្បែកជើង សម្ភារៈធ្វើដំណើរ និងស្ករ.ស ជាដើមនឹងត្រូវអនុវត្តន៍នៅថ្ងៃទី ២ ខែសីហា ឆ្នាំ ២០២០ ។
យ៉ាងណាមិញ GMAC បានបន្តថា ជាផ្នែកនៃការប្តេជ្ញាចិត្តទៅវិញទៅមករបស់យើងចំពោះកម្មវិធីEBA សមាគមរោងចក្របានបង្កើតវប្បធម៌តម្លាភាពនិងគណនេយ្យភាពនៅក្នុងការអនុលោមភាពការងារនិងលក្ខខណ្ឌការងារ ។ នៅក្នុងការស្គាល់ថាជា កម្ពុជាកំរូសមាគមរោងចក្រកាត់ដេរនៅកម្ពុជាគឺជាសមាគមទីមួយមុនគេបំផុតក្នុងពិភពលោកដែលស្វាគមន៍អង្គការអន្តរជាតិការងារ(ILO)របស់អង្គការសហប្រជាជាតិដើម្បីបង្កើតកម្មវិធីត្រួតពិនិត្យបណ្តារោងចក្ររបស់យើងសម្រាប់អនុលោមភាពទៅតាមលក្ខខណ្ឌតម្រូវថ្នាក់ជាតិនិងអន្តរជាតិ។ គ្មានវិស័យណាមួយនៅក្នុងប្រទេសដទៃណាទទួលបាននូវអត្ថប្រយោជន៍ពីការអនុគ្រោះពន្ធទៅទីផ្សារសហភាពអឺរ៉ុប មានកំណត់ត្រានៃកិច្ចសហប្រតិបត្តិការជាមួយILOប្រសើរជាងកម្ពុជានោះទេ។
បន្ថែមពីលើនេះ GMAC ក៏បានគាំទ្រប្រតិបត្តិការប្រកបដោយប្រសិទ្ធភាពរបស់ក្រុមប្រឹក្សាអាជ្ញាកណ្តាលរបស់កម្ពុជាព្រមទាំងនវានុវត្តន៍ដទៃៗទៀតនៅក្នុងវិស័យទំនាក់ទំនងវិជ្ជាជីវៈដេលបានគាំទ្រការអភិវឌ្ឍចលនាសហជីពរឹងមាំមួយនៅក្នុងវិស័យកាត់ដេរយើង។ GMAC គោរពនិងគាំំទ្រការចូលរួមរបស់សហភាពអឺរ៉ុបក្នុងការកែលម្អគោលនយោបាយសិទ្ធមនុស្ស។ជាអកុសលការដកការជួយភ្លាមៗបែបនេះពីប្រជាពលរដ្ឋកម្ពុជារាប់សែននាក់មិនមែនជាវិធីដែលត្រូវបន្តទៅមុខនោះទេ។
បើតាម GMAC បានសង្កត់ធ្ងន់ថា « សេចក្តីសម្រេចរបស់សហភាពអឺរ៉ុបនឹងទំនងជាធ្វើឱ្យមានការភាន់ច្រលំពាក់ព័ន្ធនឹងស្ថានភាពពាណិជ្ជកម្មរបស់យើងដេលកំពុងឆ្ពោះទៅមុខ ហើយនឹងលើកទឹកចិត្តឱ្យអ្នកបញ្ជាទិញទៅទិញពីបណ្តាប្រទេសដទៃៗដែលមានការគោរពសិទ្ធសហជីពអន់ឆ្ងាយជាងកម្ពុជា ហើយទំនងជាបណ្តាលឱ្យមានការបាត់បង់ការងារដល់កម្មកររាប់ម៉ឺននាក់ ហើយភាគច្រើនបំផុតនៃពួកគេគឺជាសមាជិកសហជីព ហើយធ្វើឱ្យមានភាពក្រីក្រកាន់តែខ្លាំងឡើងនៅក្នុងប្រទេស។ធ្វើឱ្យវាកាន់តែលំបាកក្នុងការដំ
ឡើងប្រាក់ឈ្នួល និងអត្ថប្រយោជន៍សម្រាប់កម្មករដោយសារផលប៉ះពាល់អវេជ្ជមាននៃភាពប្រកួតប្រជែងមកលើវិស័យរបស់យើងដោយសារពន្ធដែលដាក់ដោយសហភាពអឺរ៉ុប»។
សមាជិក GMAC មានមោទនភាពចំពោះការរួមចំណែកដែលពួកគេបានធ្វើ ហើយនឹងបន្តធ្វើការរួមចំណែកដល់ការអភិវឌ្ឍសេដ្ឋកិច្ចកម្ពុជា។ យើងបានយល់ជាយួរមកហើយថាការធ្វើឱ្យជីវិតរបស់មនុស្សម្នាក់ប្រសើរឡើងគឺចាប់ផ្តើមជាមួយនឹងការមានដំបូលផ្ទះនិងអាហារបរិភោគ។សមាគមសូមជំរុញសហភាពអឺរ៉ុបផ្តល់អត្ថប្រយោជន៍ EBA ដូចដើមវិញសម្រាប់វិស័យរបស់យើងដើម្បីបុព្ធហេតុនៃការអភិវឌ្ឍប្រកបដោយចីរភាព និងប្រជាជនកម្ពុជារាប់សែននាក់ដែលបានទទួលអត្ថប្រយោជន៍ពីកម្មវិធី EBA ដើម្បីចាកចេញពីភាពក្រីក្រ លើកកម្ពស់សិទ្ធិរបស់ពួកគេនៅកន្លែងការងារនិងផ្គត់ផ្គង់គ្រួសាររបស់ពួកគេ ។
លោក ហេងសួរ៖ទោះគ្មាន EBAកម្ពុជានៅតែលើកកម្ពស់លក្ខខណ្ឌការងារកម្មករជាអាទិភាពជានិច្ច
លោក ហេង សួរ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានសង្កត់ធ្ងន់ថា ទោះបីមាន ឬគ្មាន EBA ពីសហភាពអឺរ៉ុប ក៏កម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពសិទ្ធិសេរីភាពរបស់កម្មករនិយោជិត ជាអាទិភាពរបស់រាជរដ្ឋាភិបាលកម្ពុជាជានិច្ច រយៈពេល២០ឆ្នាំមកនេះ កម្ពុជាមិនដែលងាកចេញពីគោលនយោបាយនេះនោះទេ។ខណៈមានការរិះគន់ចំពោះការសម្រេចដកផ្នែកខ្លះនៃ EBA ដែលសហភាពអឺរ៉ុបទើបតែធ្វើដាក់កម្ពុជានាពេលថ្មីៗមកនោះ លោក ហេង សួរ បានបញ្ជាក់ថា កម្ពុជាមិនមែនជាប្រទេសដែលអាក្រក់ដូចដែលគេបានចោទនោះទេ កម្ពុជាតែងតែប្រៀបធៀបខ្លួនឯងជាមួយប្រទេសដទៃផ្សេងទៀត ហើយមានអង្គការអន្តរជាតិខាងការងារ (ILO) គម្រោង BFC និងម្ចាស់ពាណិជ្ជសញ្ញា (Brand) ទាំងអស់ជាសាក្សីថា កម្ពុជាអនុវត្តបានល្អយ៉ាងណាខ្លះក្នុងរយៈពេល២០ឆ្នាំមកនេះ ពាក់ព័ន្ធនឹងលក្ខខណ្ឌការងារ និងសេរីភាពរបស់អង្គការវិជ្ជាជីវៈ។
បើតាមលោក ហេង សួរ នៅពេលអឺរ៉ុបសម្រេចដកផ្នែកខ្លះនៃ EBA វាមិនមែនដោយសារកម្ពុជាមិនបានផ្ដល់លក្ខខណ្ឌដល់ការងារកម្មករនិយោជិត រឺសិទ្ធសេរីភាពទៅឱ្យអង្គការវិជ្ជាជីវៈនោះទេ ប៉ុន្តែវាដោយសារបញ្ហានយោបាយ ដែលប្រទេសមួយចំនួនតម្រូវកម្ពុជាធ្វើតាមគោលនយោបាយការបរទេសរបស់ពួកគេ ដែលជាការអនុវត្តស្ដង់ដាពីរ។ តែទោះជាយ៉ាងណា ពួកគេមិនគួរភ្ជាប់លក្ខខណ្ឌការងារទៅនឹងនយោបាយនោះឡើយ។ លោករដ្ឋលេខាធិការបានបន្តថា «ជនជាតិកម្ពុជាទាមទារយុត្តិធម៌ កម្ពុជាមិនចង់បានលើសគេទេ ប៉ុន្តែសុំឱ្យមានសមភាពក្នុងការសម្រេចចិត្ត ហើយសូមឱ្យមានសុភវិនិច្ឆ័យនូវអ្វីដែលជាការខិតខំរបស់កម្ពុជា»។ តែទោះជាយ៉ាងណាបើតាមលោករដ្ឋលេខាធិការ កម្ពុជាបានត្រៀមនូវអ្វីដែលជាកញ្ចប់ឆ្លើយតបទៅនឹងផលប៉ះពាល់ណាមួយ ដែលប៉ះពាល់ទៅលើវិស័យពាណិជ្ជកម្មកម្ពុជា ដោយសារតែការសម្រេចចិត្តដោយអយុត្តិធម៌។ ទោះបីជាមាន ឬគ្មានEBA រាជរដ្ឋាភិបាលកម្ពុជាបានតាំងចិត្តរួចហើយថា ការលើកកម្ពស់លក្ខខណ្ឌការងារ ការគោរពនូវសេរីភាពរបស់កម្មករនិយោជិត វាគឺជាអាទិភាព ដូច្នេះបានជាកម្ពុជាភ្ជាប់ពាណិជ្ជកម្មទៅនឹងលក្ខខណ្ឌការងារ។
រយៈពេល២០ឆ្នាំមកនេះ កម្ពុជាមិនបានងាកចេញពីគោលនយោបាយនេះទេ សូម្បីតែផែនការយុទ្ធសាស្ត្រអភិវឌ្ឍន៍វិស័យការងារ ២០១៩-២០២៣ ក៏កម្ពុជានៅតែបញ្ជាក់យ៉ាងច្បាស់ពីភាពចាំបាច់នៃការធានាលក្ខខណ្ឌការងារ សេរីភាពអង្គការវិជ្ជាជីវៈនៅកម្ពុជា ដើម្បីធានាថាផលិតផលដែលផលិតបាននៅកម្ពុជា គឺជាផលិតផលដែលមានភាពស្អាតស្អំ និងគោរពតាមស្ដង់ដាអន្តរជាតិ ហើយអនុសញ្ញាអន្តរជាតិនានាដែលកម្ពុជាបានផ្ដល់សច្ចាប័ន កម្ពុជានៅតែបន្តពិនិត្យ និងបន្តសហការយ៉ាងជិតស្និទ្ធជាមួយអង្គការ ILO បើទោះបីគេមិនជឿលើកម្ពុជា ក៏គេជឿលើអ្វីដែលជាយន្តការរបស់អង្គការ ILO ដែលកំពុងតែអនុវត្តនៅ
កម្ពុជានេះស្រាប់៕ កែសម្រួលដោយ ៖ សុឃាក់
ចែករំលែកព័តមាននេះ