ខេត្តបន្ទាយមានជ័យ ៖ នាថ្ងៃទី១៨ ខែកុម្ភៈ ឆ្នាំ២០២០នេះ លោកវសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះ បានឲ្យកងកម្លាំងនគរបាលផ្នែកសណ្តាប់ធ្នាក់ចរាចរណ៍នៃអធិការដ្ឋាននគរបាលស្រុក ដឹកនាំដោយលោកវរសេនីយ៍ទោ…
ខេត្តបន្ទាយមានជ័យ ៖ នាថ្ងៃទី១៨ ខែកុម្ភៈ ឆ្នាំ២០២០នេះ លោកវសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះ បានឲ្យកងកម្លាំងនគរបាលផ្នែកសណ្តាប់ធ្នាក់ចរាចរណ៍នៃអធិការដ្ឋាននគរបាលស្រុក ដឹកនាំដោយលោកវរសេនីយ៍ទោ ប៉ៅ មិច អធិការរង ទទួលផែ្នកសណ្តាប់ធ្នាប់ចរាចរណ៍ ដឹកនាំកម្លាំងជំនាញចំនួន៥នាក់ និងនិមន្តព្រះសង្ឃចំនួន៥អង្គ សូត្រមន្តប្រោះព្រំនៅស្រុកព្រះនេត្រព្រះ លើកំណាត់ផ្លូវជាតិលេខ៦ ចាប់ពីព្រំប្រទល់ក្រុងសិរីសោភ័ណដល់ព្រំប្រទល់ស្រុកក្រឡាញ់ខេត្តសៀមរាបដើម្បីបញ្ចៀសគ្រោះកាច និងបណ្តេញឧបទ្រពចង្រៃចេញឲ្យឆ្ងាយ កុំឲ្យប្រជាពលរដ្ឋជួបបញ្ហាគ្រោះថ្នាក់ផ្សេងៗពេលធ្វើដំណើរលើដងផ្លូវជាតិលេខ៦នេះ និងសូមឲ្យមានសេចក្ដីសុខសេចក្ដីចម្រើនដល់ប្រជាពលរដ្ឋដែលធ្វើដំណើរតាមផ្លូវនេះចាប់ពីព្រំប្រទល់ក្រុងសិរីសោភ័ណ ខេត្តបន្ទាយមានជ័យ រហូតទៅដល់ព្រំប្រទល់ស្រុកក្រឡាញ់ ខេត្តសៀមរាប។
ជាមួយគ្នានោះដែរ លោកមាស ប្ញទ្ធី អធិការនគរបាលស្រុកព្រះនេព្រះក៏បានអំពាវនាវដល់អ្នកបើកបរយានយន្តទាំងអស់ ត្រូវគោរពច្បាប់ចរាចរណ៍ទាំងអស់គ្នា ពេលបើកបរត្រូវមានការប្រុងប្រយ័ត្ន ជិះម៉ូតូត្រូវពាក់មួកសុវត្ថិភាពទាំងអ្នកបើកបរនិងអ្នករួមដំណើរ ពេលបើកបររថយន្តត្រូវពាក់ខ្សែក្រវាត់ ពេលបើក បរមិនត្រូវវ៉ាជែងនិងបើកលើសល្បឿនកំណត់ឡើយ ។ ដើម្បីសុវត្ថិភាពពេលបើកបរ គឺចាប់ផ្តើមពីអ្នកបើកបរគោរពច្បាប់ចរាចរណ៍ ។
សូមបញ្ជាក់ថា ស្រុកព្រនេត្រព្រះ គឺជាស្រុកមួយក្នុងចំណោមស្រុក ក្រុង ទាំង៩ ក្នុងខេត្តបន្ទាយមានជ័យ ដែលតែងកើតមានបញ្ហាគ្រោះថ្នាក់ចរាចរណ៍ជាញឹកញាប់ ។ បើយោងតាមការប្រជុំរបស់ស្នងការដ្ឋាននគរបាលខេត្តបន្ទាយមានជ័យ ទាក់ទងនឹងបញ្ហាគ្រោះថ្នាក់ចរាចរណ៍កន្លងមកនោះ គឺស្រុក ក្រុងដែលជួបបញ្ហាគ្រោះថ្នាក់ចរាចរណ៍ច្រើនជាងគេ គឺស្រុកមង្គលបូរី ស្រុកព្រះនេត្រព្រះ ស្រុកស្វាយចេក ស្រុកអូរជ្រៅ ស្រុកថ្មពួក និងក្រុងប៉ោយប៉ែត ។
ក្នុងកិច្ចប្រជុំនោះដែរ លោកឧត្តមសេនីយ៍ទោអាត់ ខែម ស្នងការនគរបាលខេត្ត ក៏បានណែនាំដល់លោកអធិការនគរបាលស្រុក ក្រុង កំណត់ទីតាំងនិងចំណុចដែលតែងកើតមានគ្រោះថ្នាក់ចរាចរណ៍ញឹកញាប់ជាងគេ ដោយដាក់ស្លាកសញ្ញាឬក៏ដាក់កម្លាំងនគរបាលចរាចរណ៍នៅប្រចាំការទីនោះ ដើម្បីពញ្ញាក់ស្មារតីអ្នកបើកបរឱ្យមានការប្រុងប្រយ័ត្ន ពេលធ្វើដំណើរទៅដល់ចំណុចនោះ និងម្យ៉ាងវិញទៀតក្នុង១ឆ្នាំម្តងឲ្យលោកអធិការនិមន្តព្រះសូត្រនិមន្តប្រោះព្រំតាមដងផ្លូវដើម្បីរំដោះគ្រោះចង្រៃជាដើម ៕ (កែសម្រូលដោយ ៖ ធីតា)
ចែករំលែកព័តមាននេះ