រាជធានីភ្នំពេញ ៖ លោកតាម្នាក់មានវ័យប្រមាណជា៧០ទៅ៨០ឆ្នាំជាអ្នកធាក់ស៊ីក្លូត្រូវរថយន្តមួយគ្រឿងម៉ាកកាមរីហាយប្រ៊ីតបុកក្នុងទិសដៅស្របគ្នា និងអូសជនរងគ្រោះជាង១០០ម៉ែត្រ បណ្តាលឱ្យបាត់បង់ជីវិតភ្លាមៗនៅកន្លែងកើតហេតុ ចំណែករថយន្តបើកគេចបាត់ស្រមោល ។
ហេតុការណ៍ខាងលើនេះបានកើតឡើងកាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី១៨ ខែកុម្ភៈ ឆ្នាំ២០២០ នៅចំណុចក្បែររង្វង់មូលវិមានឯករាជ្យ តាមបណ្តោយផ្លូវសុរាម្រិត ស្ថិតនៅក្នុងសង្កាត់ចតុមុខ ខណ្ឌដូនពេញ ។
ជនរងគ្រោះដែលបាត់បង់ជីវិតខាងលើឈ្មោះកង អឿន ភេទប្រុស អាយុប្រមាណជា៧០ទៅ៨០ឆ្នាំ ជាអ្នកធាក់ស៊ីក្លូ ស្នាក់នៅមិនពិតប្រាកដ មានស្រុកកំណើតនៅសង្កាត់ព្រែកហូល ខណ្ឌច្បារអំពៅ ។
បើតាមសាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញលោកតាម្នាក់ជាអ្នកធាក់ស៊ីក្លូ និងមានកំប៉ុងអេតចាយជាច្រើននៅលើស៊ីក្លូនោះទៀតផង ហើយលោកតាបានធាក់ស៊ីក្លូធ្វើដំណើរតែម្នាក់ឯងតាមបណ្តោយផ្លូវសុរាម្រិតក្នុងទិសដៅពីកើតទៅលិច ។
តាមប្រភពដដែលបានបន្តថា លុះពេលលោកតាធាក់ស៊ីក្លូមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកកាមរីហាយប្រ៊ីត ពណ៌ស ស៊េរីឆ្នាំ២០០៧ មិនចាំស្លាកលេខនោះទេ បានបើកបរស្របទិសគ្នាជាមួយនឹងស៊ីក្លូ ប៉ុន្តែគេមិនដឹងថារថយន្តមួយគ្រឿងខាងលើជិះគ្នាប៉ុន្មាននាក់នោះទេ ដោយបើកបរក្នុងល្បឿនយ៉ាងលឿនហើយបុកស៊ីក្លូពេញទំហឹង បណ្តាលឱ្យក្រឡាប់ស៊ីក្លូជ្រុះសម្បកកំប៉ុងអេតចាយធ្លាក់រាយប៉ាយពេញផ្លូវ រីឯលោកតាជាអ្នកធាក់ស៊ីក្លូវិញបានជាប់នៅក្រោមរថយន្តអូសជាង១០០ម៉ែត្រ បណ្តាលឱ្យបាត់បង់ជីវិតភ្លាមៗនៅកន្លែងកើតហេតុ ចំណែករថយន្តបង្កវិញមិនបានឈប់នៅដោះស្រាយនោះទេក៏បើកគេចបាត់ស្រមោល បន្សល់ទុកតែសពជនរងគ្រោះនៅកន្លែងកើតហេតុ ដោយមិនទាន់ មានក្រុមគ្រួសារ ឬសាច់ញាតិមកទទួលនោះទេ ។
ក្រោយពេលកើតហេតុ ជនរងគ្រោះត្រូវបានដឹកយកទៅតម្កល់ទុកបណ្តោះអាសន្ននៅវត្តទួលដើម្បីរង់ចាំក្រុមគ្រួសារ និងសាច់ញាតិមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ