រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មានការប្រឈមមុខដាក់គ្នា និងទំនាស់ពាក្យសំដីគ្នាយ៉ាងបែកផ្សែងជាមួយមន្ត្រីនគរបាលចរាចរណ៍នៅលើដងផ្លូវ បន្ទាប់ពីស្ត្រីរូបនេះជិះម៉ូតូអត់ស្លាកលេខ និងឈប់លើគំនូស.ស ហើយពុំព្រមឱ្យផាកពិន័យ ទៅតាមច្បាប់ចរាចរណ៍នោះ បង្កឱ្យមានការភ្ញាក់ផ្អើលយ៉ាងខ្លាំងកាលពីម៉ោងប្រមាណ១និង៣០នាទីរសៀល ថ្ងៃទី១៧ ខែកុម្ភៈ ឆ្នាំ២០២០ នៅស្តុបដេអិន តាមបណ្តោយមហាវិថី ព្រះនេរុហ៍ កែវនឹងវិថីកម្ពុជាក្រោយ ក្នុងសង្កាត់ផ្សារដេប៉ូទី៣ ខណ្ឌទួលគោក ។
សេចក្តីរាយការណ៍បន្តថា ស្ត្រីដែលមានទំនាស់គ្នាជាមួយនគរបាលពុំត្រូវបានឱ្យស្គាល់អត្តសញ្ញាណឡើយ ដោយជិះម៉ូតូម៉ាក ឃ្លិច សេរីឆ្នាំ២០២០ ពណ៌សលាយក្រហម អត់ស្លាកលេខ។
តាមប្រភពព័ត៌មានឱ្យដឹងថា នៅមុនកើតហេតុ គេឃើញស្ត្រីរូបនោះជិះម៉ូតូ១គ្រឿងធ្វើដំណើរតាមមហាវីថីព្រះនេរុហ៍ (ផ្លូវលេខ២១៥) ពីជើងទៅត្បូង ខណៈពេលមកដល់កន្លែងកើតហេតុ ក៏ឈប់ស្តុបលើគំនូស.ស ថែមទាំងម៉ូតូគ្មានស្លាកទៀត ហើយក៏ត្រូវកម្លាំងនគរបាលប្រចាំការនៅគោលដៅស្តុប ហៅធ្វើការផាកពិន័យ ។
តាមព័ត៌មានឱ្យដឹងបន្តថា ខណៈនោះនគរបាលក៏ទាមទារផាកពិន័យចំនួន២៥០០០រៀល តែស្ត្រីរូបនោះអះអាងថា អត់មានលុយ សុំឱ្យតែ១ម៉ឺនរៀល តែនគរបាលមិនព្រមទាមទារយកទៅផាកពិន័យនៅការិយាល័យ ហើយក៏មានទំនាស់គ្នា និងបានទាញទូរស័ព្ទថតគ្នា ទៅវិញទៅមក។
ប្រភពដដែលបន្តទៀតថា នៅក្នុងហេតុការណ៍នោះ បើតាមស្ត្រីរូបនោះបានឱ្យដឹងថា នាងបានវាសដៃទៅ ក៏ត្រូវមុខនគរបាលម្នាក់ ហើយត្រូវមន្ត្រីនគរបាលរូបនោះអះអាងថា នាងវាយមុខមួយដៃផងដែរ។ ស្ត្រីរូបនោះក៏បានទទួលនូវកំហុសដែលជិះម៉ូតូអត់ស្លាកលេខ ព្រោះម៉ូតូទើបតែទិញជិះយកទៅកឹបស្លាកលេខ និងជិះឈប់លើគំនូស.ស (សម្រាប់ស្មើជើងដើរ)។
តាមនគរបាលឱ្យដឹងថា ដោយសារតែស្ត្រីរូបនោះជិះម៉ូតូមិនគោរពច្បាប់ចរាចរណ៍ សមត្ថកិច្ចក៏បានហៅផាកពិន័យចំនួន២៥០០០រៀល តែគាត់អត់មានលុយមានតែ១ម៉ឺនរៀលក៏មានបញ្ហាទំនាស់គ្នា បន្ទាប់មកសមត្ថកិច្ចទាមទារយកទៅផាកនៅការិយាល័យ។ នគរបាលរូបនោះឱ្យដឹងទៀតថា លោកមិនចង់បានការផាកពិន័យនោះទេ គឺចង់ឱ្យមនុស្សចេះទទួលនូវកំហុសរបស់ខ្លួន។
បន្ទាប់ពីមានបញ្ហាចម្រុងសម្រាស់គ្នា ស្ត្រីជាម្ចាស់ម៉ូតូរូបនោះក៏ត្រូវនគរបាលនាំយកទៅស្នាក់ការគោលដៅនៅក្រោយព្រះរម្យរាជវាំង ដើម្បីធ្វើការផាកពិន័យតាមច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ