ប្រទេសស៊ីរី ៖ សារព័ត៌មានផ្លូវការស៊ីរីរាយការណ៍ថា កងទ័ពរដ្ឋាភិបាលស៊ីរីកាលពីថ្ងៃទី១៦កុម្ភៈ វាយលុកដណ្ដើមយកបានផ្នែកមួយធំដែលពួកឧទ្ទាមកាន់កាប់ក្នុងខេត្តអាឡែប។
ជាមួយការវាយរុលទៅមុខនេះ របបស៊ីរីដណ្ដើមត្រួតត្រាបណ្ដាមូលដ្ឋាននៅជុំវិញក្រុងអាឡែប ជាទីក្រុងធំទី២របស់ប្រទេស ដោយបន្តការវាយលុកប្រឆាំងទីតាំងធំចុងក្រោយរបស់ពួកជីហាដនិងពួកឧទ្ទាម នៅភាគពាយ័ព្យប្រទេស។ ជាមួយជោគជ័យថ្មីនេះកងទ័ពស៊ីរីបានរុញច្រានពួកសត្រូវ ឲ្យខ្ទាតឆ្ងាយពីបណ្ដាច្រកចូលក្រុងអាឡែប ហើយការពារសន្តិសុខទីក្រុងនោះ ដែលជាទីប្រជុំខេត្តមានឈ្មោះដូចគ្នានេះដែរ។
ជួយទ្រទ្រង់ដោយការវាយប្រហារតាមអាកាសរបស់សម្ព័ន្ធមិត្តរុស្ស៊ី កងទ័ពស៊ីរីបានធ្វើការវាយលុកលើតំបន់អ៊ីដលីប ព្រមទាំងតំបន់នានា ជុំវិញខេត្តនេះ។ បន្ទាប់ពីការប្រយុទ្ធនិងការវាយប្រហារតាមអាកាស កងទ័ពស៊ីរីដណ្ដើមត្រួតត្រាបណ្ដាមូលដ្ឋាននិងភូមិទាំងឡាយ ដែលព័ទ្ធជុំវិញក្រុងអាឡែប ដែលនោះជាលើកដំបូងចាប់តាំងពីឆ្នាំ២០១២មក ដោយធានាដល់កិច្ចការពារទីក្រុងនោះនិងការពារការបាញ់គ្រាប់ផ្លោង ពីសំណាក់ពួកជីហាដនិងពួកឧទ្ទាម។
កងទ័ពស៊ីរីបានវាយរុលទៅមុខយ៉ាងលឿន ចូលភាគខាងជើងនិងភាគខាងលិចខេត្តអាឡែប ក្រោយការដកថយរបស់ពួកសត្រូវ ហើយដណ្ដើមយកបានភូមិនិងមូលដ្ឋានជិត៣០៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ