ខេត្តកំពង់ឆ្នាំង ៖ ប្រជាពលរដ្ឋ១៨គ្រួសារ រស់នៅភូមិអណ្ដូងប្រេង ឃុំព្រៃមូល ស្រុករលាប្អៀរ បានសម្ដែងនូវការព្រួយបារម្ភ បន្ទាប់មន្ត្រីសុរិយោដីបានធ្វើការវាស់វែងដីធ្លីជាប្រព័ន្ធ និងត្រូវបានបិទផ្សាយជាសាធារណៈទៅហើយ ស្រាប់តែមានស្ត្រីម្នាក់នៅភ្នំពេញមកប្ដឹងទាស់ដោយ…
ខេត្តកំពង់ឆ្នាំង ៖ ប្រជាពលរដ្ឋ១៨គ្រួសារ រស់នៅភូមិអណ្ដូងប្រេង ឃុំព្រៃមូល ស្រុករលាប្អៀរ បានសម្ដែងនូវការព្រួយបារម្ភ បន្ទាប់មន្ត្រីសុរិយោដីបានធ្វើការវាស់វែងដីធ្លីជាប្រព័ន្ធ និងត្រូវបានបិទផ្សាយជាសាធារណៈទៅហើយ ស្រាប់តែមានស្ត្រីម្នាក់នៅភ្នំពេញមកប្ដឹងទាស់ដោយ អះអាងថា ប្រជាពលរដ្ឋបានរំលោភយកដីគាត់ទៅវិញ ។
មិនត្រឹមតែប៉ុណ្ណឹង ត្រូវបានតុលាការចេញដីការក្សាការពារ តាមបណ្តឹងរបស់ស្ត្រីរូបនោះ មិនអនុញ្ញាតឲ្យមន្ត្រីសុរិយោដីចេញប្លង់កម្មសិទ្ធិទៀតផង ។
ជួបជាមួយក្រុមអ្នកសារព័ត៌មាននៅព្រឹកថ្ងៃទី16 ខែកុម្ភៈ ឆ្នាំ2020 ប្រជាពលរដ្ឋបានប្រាប់អ្នកសារព័ត៌មានថា ដីរបស់ពួកគាត់ដែលត្រូវបានស្ត្រីមួយរូបប្ដឹងទាមទារមិនអនុញ្ញាតឲ្យមន្ត្រីសូរិយោដីចេញប្លង់នោះមានចំនួនជាង៨ហិកតា ដោយក្នុងនោះមានដីធ្វើស្រែ ដីធ្វើចម្ការ និងដីលំនៅឋាន ។
ពួកគាត់បានបញ្ជាក់ថា ពួកគាត់បានកាន់កាប់ អាស្រ័យផលតាំងពីឆ្នាំ១៩៨៤ មកម្ល៉េះ ដោយទទួលស្គាល់ពីអាជ្ញាធរភូមិ-ឃុំទៀតផង ។ នៅឆ្នាំ២០១៨ គ្រាដែលមន្ត្រីជំនាញសុរិយោដីចុះវាស់វែងដីធ្លីជាប្រព័ន្ធ ពួកគាត់ក៏បានចូលរួមវាស់ជាមួយសូរិយោដីដែរ។ ក្រោយពេលការវាស់វែងត្រូវបានបញ្ចប់ មន្ត្រីជំនាញបានបិទផ្សាយជាសាធារណៈរួចទៅហើយ។
ប៉ុន្តែស្រាប់តែក្រោយពីការបិទផ្សាយជាសារធារណៈ ក៏មានស្ត្រីម្នាក់ឈ្មោះ ទូច សុផានី នៅរាជធានីភ្នំពេញ បានប្ដឹងពួកគាត់ថា បានទន្ទ្រានកាន់កាប់លើដីរបស់គេទៅវិញ ។ បន្ទាប់មកតុលាការបានចេញដីការក្សាការពារ មិនឲ្យពួកគត់ ដូរលក់ដូរលើដីនោះទេ តែអាចអាស្រ័យផលបាន និងមិនឲ្យមន្ត្រីសូរិយោដីចេញប្លង់កម្មសិទ្ធិឱ្យទេ ។
ហេតុនេះហើយ ទើបពួកគាត់សូមសំណូមពរដល់តុលាការ មេត្តាជួយផ្ដល់យុត្តិធម៌ដល់ពួកគាត់ផង ជាពិសេសសម្ដេចអគ្គមហាសេនាបតីតេជោ ហ៊ុន សែន និងសម្ដេច ប៊ុន រ៉ានី ហ៊ុនសែន សូមមេត្តាជួយពួកគាត់ទាំង១៨គ្រួសារនេះផង ។
ជុំវិញបញ្ហានេះ ភាគីម្ខាង គឺអ្នកស្រី ទូច សុផានី ដែលនៅរាជធានីភ្នំពេញ ភ្នាក់ងារយើងមិនអាចសុំធ្វើការទំនាក់ទំនងបានទេ ។
ព័ត៌មានពិស្តាមានផ្សាយនៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ