រាជធានីភ្នំពេញ ៖ រាជរដ្ឋាភិបាលនឹងអភិវឌ្ឍន៍តំបន់ផ្សេងៗជាប់មាត់សមុទ្រ ដើម្បីទាក់ទាញភ្ញៀវទេចរឲ្យកាន់តែច្រើនបន្ថែមទៀត ហើយខិតខំដោះស្រាយបញ្ហាជូនក្រុមអាជីវករនៅតំបន់ទាំងនោះ ។ នេះបើតាមលោករដ្ឋមន្ត្រីក្រសួងបរិស្ថានសាយ សំអាល់ ។
យោងតាមបណ្តាញសង្គមរបស់ក្រសួងបរិស្ថានបានឲ្យដឹងថា លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងាររដ្ឋាភិបាលចុះជួយខេត្តព្រះសីហនុនៅអំឡុងកិច្ចប្រជុំជាមួយក្រុមអាជីវកដែលរកទទួលទានក្នុងវិស័យធុរកិច្ច និងសភាពាណិជ្ជកម្មនៅខេត្តព្រះសីហនុ កាលពីថ្ងៃទី១៥ ខែកុម្ភៈនេះ ដើម្បីពង្រឹងផលិតភាពរបស់ខ្លួន និងអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរឱ្យមកទស្សនាកម្សាន្តនៅឆ្នេរសមុទ្រកម្ពុជា និងកន្លែងទេសចរណ៍ផ្សេងទៀត នៅក្នុងខេត្តជាប់មាត់សមុទ្រមួយនេះឱ្យកាន់តែច្រើនឡើង ។
ក្នុងជំនួបលោកសាយ សំអាល់បានបញ្ជាក់ថា៖ «យើងទាំងអស់គ្នាត្រូវរួមគ្នាបន្តកសាងកេរ្តិ៍ឈ្មោះ និងសក្តានុពលរបស់ខេត្តព្រះសីហនុបន្ថែមទៀតព្រមទាំងបង្កើនការផ្សព្វផ្សាយទៅកាន់ពិភពលោក ដើម្បីទាក់ទាញភ្ញៀវទេសចរមកកម្សាន្តដោយខិតខំជួយផ្សព្វផ្សាយបង្កើនការងារ និងប្រាក់ចំណូលជូនប្រជាពលរដ្ឋ និងបង្ហាញពីទំនុកចិត្តដល់ភ្ញៀវទេសចរទាំងផ្នែកសេវាកម្ម បដិសណ្ឋារកិច្ច និងផាសុកភាពរបស់ភ្ញៀវទេសចរ ។
ដូច្នេះសូមបងប្អូនពង្រឹងសេវាកម្មរបស់ខ្លួនឱ្យបានល្អដោយចូលរួមអនុវត្តស្តង់ដាអាស៊ាន ព្រោះយើងចង់ឱ្យខេត្តព្រះសីហនុជាទិសដៅទេសចរណ៍សម្រាប់ប្រជាជននៃសមាគមប្រជាជាតិអាស៊ានដែលអាចមកលម្ហែកាយនៅថ្ងៃចុងសបា្តហ៍របស់ពួកគេ» ។ លោករដ្ឋមន្ត្រីក៏បានគូសបញ្ជាក់ឲ្យដឹងថា រាជរដ្ឋាភិបាលកម្ពុជាបាន និងកំពុងកសាងខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណងរបស់កម្ពុជាដោយសារតែខេត្តមាត់សមុទ្រមួយនេះពោពេញដោយសក្តានុពលការទូតសេដ្ឋកិច្ចទេសចរណ៍ ។
លោករដ្ឋមន្ត្រីថា ៖«ហេតុដូច្នេះបានជារាជរដ្ឋាភិបាលកម្ពុជាបានវិនិយោគលើហេដ្ឋារចនាសម្ព័ន្ធនៅក្នុងខេត្តព្រះសីហនុ ដោយអនុញ្ញាតប្រើប្រាស់ថវិកាចំនួន៣០០លានដុល្លារ ដើម្បីស្ថាបនាផ្លូវថ្នល់ចំនួន៣៤ ខ្សែប្រវែងជាង៩០គីឡូម៉ែត្រ រួមនឹងការកសាង ប្រព័ន្ធលូទឹកភ្លៀង លូទឹកកខ្វក់ និងការរៀបចំឆ្នេរសមុទ្រឡើងវិញឱ្យមានសោភ័ណភាព» ។
ជាមួយគ្នានេះសភាពាណិជ្ជកម្ម ខេត្តព្រះសីហនុ តំណាងឱ្យអ្នកប្រកបអាជីវកម្មនៅខេត្តព្រះសីហនុក៏បាននាំយកនូវសំណើមួយចំនួន ដើម្បីអាជ្ញាធរខេត្ត និងរាជរដ្ឋាភិបាលជួយដំណោះស្រាយ ។ ចំពោះសំណើដែលបានលើកឡើងត្រូវបានឯកឧត្តមប្រធានក្រុមការងាររាជរដ្ឋាភិបាលទទួលយកមកពិនិត្យ និងជួយដោះស្រាយ ។ លោកក៏បានស្នើដល់អាជីវករ និងប្រជាពលរដ្ឋដែលជួបប្រទះបញ្ហាសូមផ្តល់ប ញ្ជីបញ្ហាដែលជួបប្រទះ ដើម្បីងាយស្រួលដោះស្រាយ ។ លោកបានគូសបញ្ជាក់ថា ៖ «យើងខ្ញុំនឹងខិតខំប្រឹងប្រែងជួយដោះស្រាយក្តីកង្វល់របស់បងប្អូនឱ្យអស់លទ្ធភាពព្រោះយើងខ្ញុំជាអ្នកបម្រើបងប្អូនប្រជាពលរដ្ឋ»៕
ចែករំលែកព័តមាននេះ