រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ដីឡូតិ៍មួយកន្លែងជិត៥ហិចតា ត្រូវបានអគ្គិភ័យឆាបឆេះអស់ទាំងស្រុង បង្កឲ្យមានការភ្ញាក់ផ្អើលដល់ប្រជាពលរដ្ឋ ប្តឹងសមត្ថកិច្ចហៅរថយន្តពន្លត់អគ្គីភ័យមកភ្លាមៗ កាលពីម៉ោង១០យប់ ថ្ងៃទី១៦ ខែកុម្ភៈ ឆ្នាំ២០២០ នៅដីឡូតិ៍មួយកន្លែង ស្ថិតក្នុងភូមិកន្ទោកជើង សង្កាត់កន្ទោក ខណ្ឌកំបូល។
តាមប្រភពពីប្រជាពលរដ្ឋនៅកន្លែងកើតហេតុ បាននិយាយថា នៅមុនពេលកើតហេតុ មានភ្លើងបានឆាបឆេះក្នុងដីឡូតិ៍ខាងលើ ដោយគេសង្ស័យថា មានអ្នកលួចដុត ។ ទីតាំងខាងលើនេះ គឺដោយមានរបងព័ទ្ធជុំវិញ ហើយនៅខាងក្រៅរបងមានផ្ទះប្រជាពលរដ្ឋ និងរោងចក្រជាច្រើនកន្លែងផងដែរ ។
តាមសំដីសមត្ថកិច្ចនៅទីតាំងកន្លែងកើតហេតុ បានបញ្ជាក់ប្រាប់ថា កន្លែងឆេះខាងលើនេះ ទោះជាស្ថិតនៅក្នុងរបងក៏ដោយ តែខ្លាចអណ្តាតភ្លើងឆាបឆេះរាលដាលដល់ផ្ទះប្រជាពលរដ្ឋ និងរោងចក្រ ដូច្នេះសមត្ថកិច្ចបានហៅរថយន្តពន្លត់អគ្គិភ័យមកជួយបាញ់ពន្លត់ភ្លាមៗផងដែរ ។ ក្នុងនោះដោយមានរថយន្តពន្លត់អគ្គិភ័យរបស់ខណ្ឌកំបូល មកជួយពន្លត់ចំនួន១គ្រឿង និងរថយន្តរបស់ស្នងការនគរបាលរាជធានីភ្នំពេញ បានមកជួយពន្លត់ចំនួន២បន្ថែម សរុបចំនួន៣រថយន្ត ទើបមិនឆេះរាលដាលដល់ផ្ទះប្រជាពលរដ្ឋ ៕ (កែសម្រួលដោយ ៖ បុប្ផា)
ចែករំលែកព័តមាននេះ