រាជធានីភ្នំពេញ ៖ បុរសម្នាក់ជិះម៉ូតូសង្ស័យទាក់ដៃចង្កូតគ្នាដួលខ្ទាតចូលក្រោមរថយន្តកុងតឺន័រកិន បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុ ចំណែកបើកបររថយន្ដបានរត់គេចខ្លួនបាត់ស្រមោល ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង៧និង៤៥នាទីយប់ ថ្ងៃទី១៦ ខែកុម្ភៈ ឆ្នាំ២០២០ តាមបណ្តោយផ្លូវបេតុងច្រកចូលផ្សារទួលពង្រ ជិតស្តុបទួលពង្រ ក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ។
ភាគីខាងរថយន្ដកុងតឺន័រមួយគ្រឿងខាងលើ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣A-៣៥៨១ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។ ចំណែកភាគីខាងម៉ូតូមួយគ្រឿងខាងលើម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ ១CF-៤៧៥០ បើកបរដោយបុរសម្នាក់មិនស្គាល់អត្តសញ្ញាណ បានបាត់បង់ជីវិតនៅនឹងកន្លែងកើតហេតុ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញបុរស រងគ្រោះជិះម៉ូតូម្នាក់ឯងក្នុងទិសដៅពីត្បូងទៅជើងក្នុងល្បឿនលឿន លុះមកដល់ចំណុចកើតហេតុ ស្រាប់តែទាក់ដៃចង្កូតគ្នាជាមួយនឹងម៉ូតូ១គ្រឿងផ្សេងទៀតមិនស្គាល់ម៉ាក ហើយដួលម៉ូតូបោកនឹងផ្លូវ ចំណែកបុរសរងគ្រោះបានខ្ទាតចូលក្រោមរថយន្តកុងតឺន័រមួយគ្រឿងខាងលើដែលកំពុងតែបើកបរក្នុងទិសដៅស្របគ្នា បណ្ដាលឲ្យកិនចំក្បាលបុរសរងគ្រោះបែកទាំងមួកសុវត្ថិភាពទៀត ហើយជនរងគ្រោះក៏បានបាត់បង់ជីវិតភ្លាមៗនៅនឹងកន្លែងកើតហេតុតែម្ដង។ ភ្លាមៗនោះដែរអ្នករថយន្ដកុងតឺន័របានរត់គេចខ្លួនបាត់ស្រមោល ។
បន្ទាប់ពីកើតហេតុ គេឃើញបងប្អូននិងក្រុមគ្រួសាររបស់បុរសរងគ្រោះបានមកដល់កន្លែងកើតហេតុ ដោយមិនជឿថាជនរងគ្រោះបាត់បង់ជីវិតទេ ក៏នាំគ្នាធ្វើចលនាឱ្យ ប៉ុន្តែជាអកុសលជនរងគ្រោះបានបាត់បង់ជីវិតទៅហើយ ។ ភ្លាមៗនោះកំលាំងសមត្ថកិច្ចនគរបាលចោមចៅទី១បានចុះមកដល់កន្លែងកើតហេតុនឹងជួយធ្វើចរាចរណ៍ ដោយបើកយករថយន្តកុងតឺន័រចេញពីកន្លែងកើតហេតុទៅដាក់អែបខាងដើម្បីកុំឲ្យមានការកកស្ទះ ។
ក្រោយពេលកើតហេតុ ផ្នែកជំនាញចរាចរណ៍ខណ្ឌពោធិ៍សែនជ័យបានប្រគល់ទៅផ្នែកជំនាញចរាចរណ៍រាជធានីភ្នំពេញយករថយន្តកុងតឺន័រ និងម៉ូតូទៅរក្សាទុក រង់ចាំធ្វើការដោះស្រាយនៅពេលក្រោយ ចំណែកជនរងគ្រោះត្រូវសមត្ថកិច្ចប្រគល់ទៅឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ