ខេត្តបាត់ដំបង៖ កសិករដែលដាំដំណាំស្វាយកែវរមៀតបានត្អូញត្អែរយ៉ាងខ្លាំងអំពីតំលៃទីផ្សារ ដែលបច្ចុប្បន្នបានធ្លាក់ចុះស្ទើរពាក់កណ្ដាល បើប្រៀបធៀបទៅនឹងតម្លៃកាលពីឆ្នាំកន្លងទៅ ។ ការធ្លាក់ចុះនៃតម្លៃស្វាយ កែវរមៀតត្រូវបានកសិករម្ចាស់ចំការនិងឈ្មួញកណ្តាលឆ្លើយតបរៀបជះទឹកដាក់គ្នា ។ កសិករខ្លះចោទថា «ស្វាយធ្លាក់ថ្លៃដោយសារឈ្មួញកណ្ដាល ក្រឡុកទីផ្សារ» ខណៈឈ្មួញឆ្លើយតបវិញថា «តំលៃស្វាយធ្លាក់ចុះដោយសារពេលនេះជារដូវប្រមូលផលស្វាយ (សំបូរស្វាយ) និងតម្លៃគឺឲ្យ ទៅតាមទីផ្សារជាក់ស្ដែង»។
បើតាមការសង្កេតជាក់ស្ដែងក្នុងពេលនេះ កសិករដែលមានដំណាំស្វាយកែវរមៀត ស្ទើរគ្រប់ទីកន្លែង កំពុងតែត្អូញត្អែអំពីតំលៃស្វាយធ្លាក់ចុះនេះ ខណៈប៉ុន្មានឆ្នាំចុងក្រោយនេះម្នាក់ៗបានបង្កើនការដាំដំណាំស្វាយកែវរមៀតនេះកាន់តែច្រើនឡើង ។
កសិករនៅស្រុកបាណន់ម្នាក់ គឺលោកកង ប៊ុន បាននិយាយថាតំលៃស្វាយកែវរមៀតក្នុងពេលនេះ បានដាំក្បាលចុះយ៉ាងកំហុក បើធៀបនឹងឆ្នាំមុន។ កសិករវ័យ៦០ឆ្នាំប្លាយរូបនេះ បាននិយាយយ៉ាងដូច្នេះថា «កាលពីឆ្នាំមុនក្នុងខែនេះ ខ្ញុំប្រមូលផលស្វាយលក់បានថ្លៃគួរសម តែដល់ពេលនេះបែរជាផ្លែស្វាយធ្លាក់ថ្លៃស្ទើរពាក់កណ្ដាល»។ លោក កង ប៊ុន បានបញ្ជាក់ថា ផ្លែស្វាយគាត់ដែលប្រមូលផលរាល់រដូវមាន២ប្រភេទ គឺប្រភេទស្វាយសម្រាប់ឈ្មួញនាំចេញទៅរោងចក្រក្រៅស្រុក និង ប្រភេទស្វាយសម្រាប់នាំចេញដែរ តែសម្រាប់ដាក់លក់នៅតាមទីផ្សារ (ស្វាយច្រកថង់នៅលើដើម)។ ឆ្នាំមុនស្វាយសម្រាប់ចូលរោងចក្រ គាត់លក់បានតំលៃចន្លោះពី១០០០រៀល ដល់ ១៤០០រៀល ក្នុងមួយគីឡូក្រាម។ រីឯស្វាយច្រកកញ្ចប់សម្រាប់លក់លើទីផ្សារ លក់បានតំលៃចន្លោះពី១៨០០រៀល ដល់ ២៣០០រៀល ក្នុង១គីឡូក្រាម តែពេលនេះស្វាយទាំង២ប្រភេទនេះ គាត់លក់បានតំលៃស្ទើរមិនបានពាក់កណ្ដាលឆ្នាំទៅម៉ិញផង។ គាត់មិនដឹងអំពីមូលហេតុ នៃការធ្លាក់ចុះតំលៃនេះទេ តែបើតាមការស្វែងយកខ្លះៗនិងម្ចាស់ចំការដទៃទៀតដែលនិយាយតៗគ្នា ទំនងដោយសារក្រុមឈ្មួញកណ្ដាលក្រឡុកទីផ្សារតែម្ដង។
ដោយឡែកកសិករដទៃទៀតក៏បានត្អូញត្អែរ និង បានយល់ឃើញដូច្នេះដែរ ចំពោះទីផ្សារផ្លែស្វាយធ្លាក់ចុះនេះ។ ផ្ទុយពីការយល់ឃើញរបស់កសិករខាងលើនេះ លោក ពឿន ពុច ឈ្មួញកណ្ដាលម្នាក់ នៅឃុំឈើទាល ស្រុកបាណន់ បានផ្ដល់បទសម្ភាសន៏ជាមួយកោះសន្តិភាពថា តំលៃស្វាយ កែវរមៀតនៅពេលនេះ ពិតជាធ្លាក់ថ្លៃស្ទើរពាក់កណ្ដាលមែន បើប្រៀបធៀបទៅនឹងទីផ្សារកាលពីប៉ុន្មានខែមុននេះ និង ឆ្នាំទៅម៉ិញ។
ឈ្មួញខាងលើបានបញ្ជាក់ថា «សព្វថ្ងៃខ្ញុំទិញតែប្រភេទស្វាយដែលនាំចេញទៅប្រទេសថៃ សម្រាប់ចូលរោងចក្រតែប៉ុណ្ណោះ។ សព្វថ្ងៃស្វាយប្រភេទនេះ ខ្ញុំទិញពីកសិករដល់ចំការ ក្នុងតំលៃចន្លោះពី៥០០ទៅ៦០០រៀល ក្នុង១គីឡូក្រាម តែបើឃើញផ្លែល្អនិងធំៗបន្តិច ខ្ញុំអាចទិញក្នុងតំលៃដល់៧០០រៀលដែរ»។
លោកពឿន ពុច បានបកស្រាយអំពីការធ្លាក់ចុះនៃទីផ្សារយ៉ាងដូច្នេះថា « ខ្ញុំធ្លាប់ឮម្ចាស់ចំការត្អូញត្អែរអំពីតំលៃផ្លែស្វាយធ្លាក់ចុះនេះដែរ។ ពួកគាត់ខ្លះចោទថា បណ្ដាលមកឈ្មួញក្រឡុកទីផ្សារ មិនមែនអញ្ចឹងទេ..! គឺសព្វថ្ងៃនេះតំលៃស្វាយធ្លាក់ចុះ ដោយសារតែរដូវនេះសំបូរស្វាយ»។ គាត់បានពន្យល់បន្ថែមទៀតថា សព្វថ្ងៃនេះកសិករចាប់ផ្ដើមប្រមូលផលផ្លែស្វាយធម្មតាផង (ស្វាយដែលផ្លែតាមរដូវកាលមិនប្រើថ្នាំ) និងផ្លែស្វាយដែលប្រើថ្នាំបញ្ជាឲ្យចេញផលខុសរដូវផង ទើបសំបូរស្វាយនៅលើទីផ្សារ ដែលជាហេតុធ្វើឲ្យធ្លាក់ថ្លៃ
យ៉ាងគំហុកបែបនេះ។ លោកបានបន្តថា ប៉ុន្តែបើរដូវណាដែលមានតែស្វាយបញ្ជាផ្លែខុសរដូវ គឺមានទីផ្សារ
ខ្ពស់ហើយ ព្រោះពេលនោះមិនសូវសំបូរស្វាយ។ ដូច្នេះតំលៃស្វាយធ្លាក់ចុះនៅពេលនេះ មិនមែនមកពីឈ្មួញក្រឡុកទីផ្សារទេគឺដោយសារខែនេះសំបូរស្វាយ និង ទីផ្សារនៅប្រទេសក្បែរខាងធ្លាក់ចុះដែរ។
ដោយឡែកឈ្មួញកណ្ដាលមួយរូបទៀតក៏បានលើកឡើងស្រដៀងគ្នា នឹងការបកស្រាយរបស់លោកពឿន ពុច ដែរអំពីទីផ្សារស្វាយកែវរមៀតធ្លាក់ចុះយ៉ាងគំហុកនេះ។
អ្នកស្រី ធួន នី ជាឈ្មួញកណ្ដាលទទូលទិញស្វាយកែវមៀតប្រចាំផ្សារទំនើប «ភូពុយ» ក្នុងក្រុងបាត់ដំបង បាននិយាយថា កន្លងមកអ្នកស្រីមិនធ្លាប់ទទូលទិញប្រភេទផ្លែស្វាយសម្រាប់នាំចេញទៅកាន់រោងចក្រក្រៅប្រទេសទេ អ្នកស្រីទទូលទិញតែប្រភេទផ្លែស្វាយល្អ (ស្វាយច្រកថង់លើដើម) តែជាប្រភេទស្វាយសម្រាប់នាំចេញដែរ។ អ្នកស្រីបាននិយាយយ៉ាងដូច្នេះថា «រឿងទីផ្សារស្វាយមិនទៀងទាត់ទេ វាអាស្រ័យលើទីផ្សារនាំចេញ និងទៅតាមរដូវកាលនៃការប្រមូលផល មិនមែនមកពីឈ្មួញកណ្ដាលក្រឡុកទីផ្សារ ទើបធ្វើឲ្យតំលៃស្វាយធ្លាក់ចុះនោះទេ»។ ឈ្មួញរូបនេះបានបញ្ជាក់ថាកាលពីជាង១ខែមុននេះ ផ្លែស្វាយកែវរមៀតសម្រាប់នាំចេញដាក់លក់លើទីផ្សារធំៗ ជាពិសេសនាំចេញទៅប្រទេសវៀតណាម នៅមានតំលៃខ្ពស់នៅឡើយ គឺគាត់ទទូលទិញក្នុងតំលៃចន្លោះពី១៨០០រៀល ដល់ ២៣០០រៀល ក្នុង១គីឡូក្រាម។ ក៏ប៉ុន្តែសព្វថ្ងៃនេះ ស្វាយប្រភេទនេះ គាត់ទទូលទិញចូលត្រិមតែតំលៃចន្លោះពី៨០០រៀល ដល់១០០០រៀល តែប៉ុណ្ណោះ គឺធ្លាក់ចុះស្ទើរពាក់កណ្ដាលពិតមែន ។
គួរកត់សម្គាល់ដែរថា ប៉ុន្មានឆ្នាំចុងក្រោយនេះ សម្រាប់ប្រជាកសិករនៅខេត្តបាត់ដំបង ហាក់បង្កើនសន្ទុះយ៉ាងខ្លាំង ក្នុងការពង្រីកផ្ទៃដីដាំដំណាំស្វាយកែវល្មៀតនេះ ដោយសារតែពួកគេមើលឃើញថា ស្វាយកែវរមៀតនេះមានទីផ្សារល្អ ទាំងនៅក្នុងស្រុក និងការនាំចេញ។ ព្រោះតែមើលបែបនេះហើយ ទើបកសិករមួយចំនួនបានសម្រេចបង្កើនការដាំដុះដំណាំស្វាយនេះស្ទើរគ្រប់ទីកន្លែង។ ប៉ុន្តែមិនដូចការរំពឹងទុកទេសម្រាប់ទីផ្សារស្វាយកែវរមៀតនេះ ព្រោះតំលៃឡើងចុះដូចទឹកជំនន់ដែរ ដែលបណ្តាលឲ្យកសិករដេកមិនលក់បក់ក៏មិនល្ហើយ ដោយសារតែទីផ្សារត្រូវពឹងលើប្រទេសជិតខាងស្ទើរទាំងស្រុង។
ពាក់ព័ន្ធនឹងសន្ទុះនៃការកើនឡើងរបស់កសិករដាំដំណាំស្វាយកែវរមៀតនេះ ប្រធានមន្ទីរកសិកម្ម រុក្ខាប្រមាញ់ និង នេសាទខេត្តបាត់ដំបង លោក ឈឹម វជិរា ធ្លាប់បានប្រាប់កោះសន្តិភាព ដោយទទូលស្គាល់ថា បច្ចុប្បន្នប្រជាកសិករនៅក្នុងខេត្តបាត់ដំបង ពិតជាកំពុងផ្ដោតខ្លាំងទៅលើដំណាំស្វាយកែវរមៀតនេះមែន ព្រោះតែពួកគាត់សំឡឹងឃើញទីផ្សារល្អទៅអនាគត។ ប៉ុន្តែយ៉ាងណា លោកបានបញ្ជាក់ដែរថាតំលៃទីផ្សារដំណាំកសិកម្ម មិនទៀងទាត់ទេ គឺវាអាស្រ័យទៅលើទីផ្សារជាក់ស្ដែង និងទៅតាមរដូវកាលនៃការប្រមូលផល៕ កែសម្រួលដោយ ៖ សុឃាក់
ចែករំលែកព័តមាននេះ