ខេត្តសៀមរាប ៖ ត្រសក់ផ្អែមស្រុកបន្ទាយស្រី ដែលធ្លាប់តែមានកេរ្តិ៍ឈ្មោះល្បី ប្រឈមមុខនឹងការខាតបង់ទាំងស្រុង លើការប្រមូលផលរបស់ខ្លួនក្នុងឆ្នាំនេះ ។ ដោយទីផ្សារត្រសក់ផ្អែមត្រូវបានលក់ចេញទៅតាមសណ្ឋាគារ ភោជនីយដ្ឋាន ផ្សារទំនើប…
ខេត្តសៀមរាប ៖ ត្រសក់ផ្អែមស្រុកបន្ទាយស្រី ដែលធ្លាប់តែមានកេរ្តិ៍ឈ្មោះល្បី ប្រឈមមុខនឹងការខាតបង់ទាំងស្រុង លើការប្រមូលផលរបស់ខ្លួនក្នុងឆ្នាំនេះ ។ ដោយទីផ្សារត្រសក់ផ្អែមត្រូវបានលក់ចេញទៅតាមសណ្ឋាគារ ភោជនីយដ្ឋាន ផ្សារទំនើប និងតំបន់ទេសចរណ៍នានានៅក្នុងខេត្តសៀមរាប ស្រាប់តែឆ្នាំនេះតម្រូវការត្រសក់ផ្អែមធ្លាក់ចុះយ៉ាងគំហុករហូតដល់ទៅ៩០% ដែលមិនអាចអោយអ្នកដាំលក់ចេញបាន ទោះបីជាលក់ក្នុងតម្លៃថោកយ៉ាងណាក៏ដោយ ។ នេះបើយោងទៅតាមផេកហ្វេសប៊ុករបស់លោក ឃឹម ហ្វីណង់ – khim Finan ចុះផ្សាយថ្ងៃទី១៦ ខែកុម្ភៈនេះ ។
លោកបន្តថា សប្តាហ៍នេះ គឺជាសប្តាហ៍ប្រមូលផល ហើយប្រសិនបើនៅតែបន្តលក់មិនចេញក្នុងរយៈពេល២សប្តាហ៍ទៀតទេ ត្រសក់ផ្អែមរាប់សិបតោននេះនឹងត្រូវបោះចោលទាំងស្រុង ហើយពួកគាត់នឹងមិនមានទុនគ្រប់គ្រាន់សម្រាប់ទូទាត់ថ្លៃជួលដី បង់ការប្រាក់ធនាគារ ថ្លៃពូជ និងកម្មករ ហើយក៏នឹងមិនមានទឹកចិត្ត ដើម្បីបន្តដាំទៀតដែរ ។ ខ្ញុំបានសម្របសម្រួលរៀបចំអោយមានការលក់ត្រសក់ផ្អែមទ្រង់ទ្រាយធំមួយ ពីសំណាក់សហគមន៍អ្នកដាំត្រសក់ផ្អែមបន្ទាយស្រី នៅក្នុងផ្សារហេរីថេក ក្នុងក្រុងសៀមរាប រយៈពេលមួយសប្តាហ៍ពេញ គិតចាប់ពីថ្ងៃទី២០ កុម្ភៈនេះ រហូតដល់ថ្ងៃទី២៦ កុម្ភៈ ដោយតម្លៃពិសេសត្រឹមតែ១ដុល្លារក្នុង១គីឡូក្រាម និង១០គីឡូថែមជូន១គីឡូដោយឥតគិតថ្លៃ ។
លោកសូមអំពាវនាវដល់បងប្អូនទាំងអស់គ្នា ជាពិសេសអ្នកខេត្តសៀមរាប ចូលរួមកម្មវិធីនេះនៅផ្សារហេរីថេកអោយបានច្រើនកុះករ ដើម្បីជួយទិញត្រសក់ផ្អែមរបស់ពួកគាត់ក្នុងតម្លៃពិសេស និងដើម្បីជួយស្រោចស្រង់ និងលើកទឹកចិត្តដល់សហគមន៍អ្នកដាំត្រសក់ផ្អែមបន្ទាយស្រីក្នុងគ្រាអាសន្នមួយនេះ ។
បញ្ជាក់: តម្លៃនេះថោកជាងតម្លៃទីផ្សារប្រហែលពាក់កណ្តាល បានត្រឹមតែអាចអោយពួកគាត់ស្រង់ដើមវិញយកទៅដាំបន្តទៀតតែប៉ុណ្ណោះ ៕
ចែករំលែកព័តមាននេះ