ខេត្តបន្ទាយមានជ័យ ៖ គ្រោះថ្នាក់លើផ្លូវដែករវាងរថភ្លើងបុកគ្រឿងចក្រឈូសដីមួយគ្រឿងជារបស់ក្រុមហ៊ុនធ្វើផ្លូវជាតិលេខ៥ បណ្តាលឱ្យអ្នកបើកបរគ្រឿងចក្រម្នាក់រងរបួសធ្ងន់ ចំណែករថភ្លើង និងគ្រឿងចក្រឈូសដីបានរងការខូចខាតធ្ងន់ធ្ងរទាំងសងខាង។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៧និង៥៥នាទីព្រឹកថ្ងៃទី១៦ ខែកុម្ភៈ ឆ្នាំ២០២០ នៅចំណុចមុខរោងម៉ាស៊ីនកិនស្រូវឥណ្ឌា ស្ថិតក្នុងភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
ជនរងគ្រោះម្នាក់ខាងលើឈ្មោះរឿង វាសនា ភេប្រុស អាយុ៣២ឆ្នាំ នៅភូមិកំពង់ថ្ម ឃុំកំពង់ថ្ម ស្រុកកំពង់ធំ ខេត្តកំពង់ធំ ជាអ្នកបើកបរគ្រឿងចក្រឈូសដី។
តាមប្រភពព័ត៌មានពីនគរបាលបានឲ្យដឹងថា មុនពេលកើតហេតុ គេឃើញរថភ្លើងបានធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែមានគ្រឿងចក្រឈូសដីមួយគ្រឿងបានបើកឆ្លងកាត់ផ្លូវរថភ្លើងនោះ ហើយរថភ្លើងក៏បានបុកបណ្តាលឱ្យក្រឡាប់គ្រឿងចក្រឈូសដីសង្កត់លើអ្នកបើកបររងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបូរី ។ ចំណែកគ្រឿងចក្រឈូសដីនិងរថភ្លើងបានរងការខូចខាតធ្ងន់ទាំងសងខាង ។
តាមប្រភពដដែលបានបញ្ជាក់ថា មូលហេតុបណ្តាលឲ្យថ្នាក់ចរាចរណ៍ខាងលើនេះកើតឡើង គឺបង្កឡើងដោយគ្រឿងចក្រឈូសដីបើកបំពានផ្លូវអាទិភាពរបស់រថភ្លើង។
ក្រោយពេលកើតហេតុ តំណាងភាគីក្រុមហ៊ុនទាំងសងខាងបានសម្របសម្រួលដោះស្រាយគ្នានៅកន្លែងកើតហេតុ ដើម្បីបញ្ចប់រឿង៕ (កែសម្រួលដោយ ៖ ធីតា)
ចែករំលែកព័តមាននេះ