រាជធានីភ្នំពេញ ៖ មន្ទីរពេទ្យកាល់ម៉ែត្រប្តេជ្ញាចិត្តចូលរួមចំណែកយ៉ាងសកម្មលើការពង្រើកនូវវិសាលភាព ផ្នែកវិទ្យុសាស្ត្រ ដើម្បីសំរួលដល់ការវិភាគ រករោគវិនិច្ឆ័យ និងការព្យាបាលអោយកាន់តែមានប្រសិទ្ធភាពខ្ពស់ឡើងថែមទៀត ។ នេះជាការប្តេជ្ញា របស់លោកសាស្ត្រាចារ្យ…
រាជធានីភ្នំពេញ ៖ មន្ទីរពេទ្យកាល់ម៉ែត្រប្តេជ្ញាចិត្តចូលរួមចំណែកយ៉ាងសកម្មលើការពង្រើកនូវវិសាលភាព ផ្នែកវិទ្យុសាស្ត្រ ដើម្បីសំរួលដល់ការវិភាគ រករោគវិនិច្ឆ័យ និងការព្យាបាលអោយកាន់តែមានប្រសិទ្ធភាពខ្ពស់ឡើងថែមទៀត ។ នេះជាការប្តេជ្ញា របស់លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត បានលើកឡើងនៅក្នុងមហាសន្និបាតលើកទី១២ របស់សមាគមអ្នកបច្ចេកទេសវិទ្យុសាស្ត្រកម្ពុជាប្រចាំឆ្នាំ ២០២០ ស្តីអំពី «ការលើកកម្ពស់ អ្នកបច្ចេកទេសវិទ្យុសាស្ត្រ និងការព្យាបាលមហារីកនៅកម្ពុជា» កាលពីព្រឹកថ្ងៃទី១៥ ខែកុម្ភៈ ឆ្នាំ២០២០ នាមន្ទីរពេទ្យកាល់ម៉ែត រាជធានីភ្នំពេញ ។
លោកសាស្ត្រាចារ្យ ឈាង រ៉ា បានប្តេជ្ញាថា មន្ទីរពេទ្យកាល់ម៉ែត និងខិតខំប្រឹងប្រែង និងធ្វើការប្តេជ្ញាចិត្តក្នុងការចូលរួមចំណែកយ៉ាងសកម្ម លើការពង្រើកនូវវិសាលភាពផ្នែកវិទ្យុសាស្ត្រ តាមរយៈការអភិវឌ្ឍន៏ទៅលើសំណង់អគារ, ការបំពាក់នូវបរិក្ខារវេជ្ជសាស្ត្រ ទំនើបចុងក្រោយ និងចូលរួមជួយបណ្តុះ បណ្តាលធនធានមនុស្សផ្នែកវិទ្យុសាស្ត្រនេះអោយបានកាន់តែច្រើន និងប្រកបដោយចំណេះដឹង និងគុណភាពខ្ពស់ ដើម្បីសំរួលដល់ការវិភាគរករោគវិនិច្ឆ័យ និងការព្យាបាលអោយកាន់តែមានប្រសិទ្ធភាពខ្ពស់ឡើងថែមទៀត ។
លោកសាស្ត្រាចារ្យ ឈាង រ៉ា បានបន្តថា ស្របតាមគោលនយោបាយរបស់ក្រសួងសុខាភិបាល និងរាជរដ្ឋាភិបាលកម្ពុជាក្នុងការចូលរួមកាត់បន្ថយភាពក្រីក្រ ដោយឈរលើយុទ្ធសាស្ត្រអភិវឌ្ឍន៍វិស័យសុខាភិបាល ស្របតាមគោលនយោបាយដឹកនាំដ៏ឈ្លាសវៃប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដឹកនាំសម្រេចបាននូវសុខសន្តិភាព និងការអភិវឌ្ឍន៍លើគ្រប់វិស័យ។
លោកសាស្ត្រាចារ្យឈាង រ៉ា បានអោយដឹងថា សព្វថ្ងៃនេះ ប្រព័ន្ធបច្ចេកវិទ្យាមានការរីកចំរើនយ៉ាងឆាប់រហ័ស ហើយផ្នែកវេជ្ជសាស្ត្រគឺមានម៉ាស៊ីនជាច្រើនសំរាប់ត្រួតពិនិត្យ និងព្យាបាលជម្ងឺ ដូចជាម៉ាស៊ីនព្យាបាលជំងឺមហារីក(Radiation Therapy), ម៉ាស៊ីនអ៊ឹម-អ-អាយ(MRI), ម៉ាស៊ីនស៊ីធីស្កេន (CT Scan), ម៉ាស៊ីនអេនជីអូហ្គ្រាសហ្វី (Angiography), ម៉ាស៊ីនថតឆ្លុះដោយកាំរស្មីអ៊ិចគឺសុទ្ធសឹងជាម៉ាស៊ីនដែលទំនើបៗ និងប្រើបច្ចេកវិទ្យា ចុងក្រោយដើម្បីប្រកួតប្រជែងលើទីផ្សារ និងដើម្បីផ្តល់នូវរោគវិនិច្ឆ័យជូនអ្នកជំងឺ និងគ្រូពេទ្យព្យាបាលបានយ៉ាងច្បាស់លាស់ និងជាទីទុកចិត្ត។
លោកសាស្ត្រាចារ្យ ឈាង រ៉ា បានបញ្ជាក់ថា អ្នកបច្ចេកទេសវិទ្យុសាស្ត្រទាំងអស់ មិនត្រឹមតែជាអ្នកបញ្ជាម៉ាស៊ីនប៉ុណ្ណោះទេ ថែមទាំងដើរតួរនាទីយ៉ាងសំខាន់ ក្នុងការរុករករោគវិនិច្ឆ័យ ក៏ដូចជាព្យាបាលអ្នកជំងឺបានយ៉ាងមានប្រសិទ្ធភាពខ្ពស់ ដោយការប្រើនូវចំណេះ និងជំនាញនានាដែលខ្លួន ដែលបានសិក្សារៀនសូត្រកន្លងមក និង តាមរយៈសមត្ថភាពដ៏ល្អ ក្នុងការប្រើប្រាស់។
លោកអគ្គនាយកមន្ទីរពេទ្យកាល់ម៉ែត បានធ្វើការថ្លែងអំណរគុណចំពោះ សាស្ដ្រាចារ្យ វេជ្ជបណ្ឌិត និងអ្នកបច្ចេកទេសជាតិ-អន្តរជាតិដែលបានចូលរួមចែករំលែកនូវ វប្បធម៌ និង ចំណេះដឹងល្អៗ មកពីប្រទេសអូស្ត្រាលី, ជប៉ុន, សិង្ហបុរី, ហុងកុង, ម៉ាកាវ, ម៉ាឡេស៊ី, បង់ក្លាដេស,វៀតណាម និងថៃផងដែរ ដើម្បីជួយគាំទ្រ និងធ្វើបទបង្ហាញនៅក្នុងអង្គសន្និបាតសមាគមអ្នកបច្ចេកទេស វិទ្យុសាស្ត្រកម្ពុជា ដែលជាឱកាសដ៏ល្អក្នុងការជួបជុំក៏ដូចជាចែករំលែកនូវចំនេះដឹង និងផ្ដល់បទពិសោធន៏ល្អៗដល់អង្គសន្និបាតទាំងមូល៕ (កែសម្រួលដោយ ៖ ធីតា)
ចែករំលែកព័តមាននេះ