រាជធានីភ្នំពេញ ៖ ក្នុងទិវាថ្ងៃនៃក្ដីស្រលាញ់ ប្រជាជនទូទាំងពិភពលោកបានផ្ដល់នូវកាដូអនុស្សាវរីយ៍ទៅគ្នាវិញទៅមក និងផ្ដល់នូវការស្រលាញ់ការចែករំលែកអោយគ្នាផងដែរ ក្នុងនោះដើម្បីចូលរួមចំណែកក្ដីស្រលាញ់មួយនេះទៅកាន់មនុស្សជាច្រើន ក្រុមហ៊ុន ខ្មែរ ប៊ែវើរីជីស បានបន្តបរិច្ចាគទឹកពិសាបរិសុទ្ធកម្ពុជាទៅមន្ទីរពេទ្យ…
រាជធានីភ្នំពេញ ៖ ក្នុងទិវាថ្ងៃនៃក្ដីស្រលាញ់ ប្រជាជនទូទាំងពិភពលោកបានផ្ដល់នូវកាដូអនុស្សាវរីយ៍ទៅគ្នាវិញទៅមក និងផ្ដល់នូវការស្រលាញ់ការចែករំលែកអោយគ្នាផងដែរ ក្នុងនោះដើម្បីចូលរួមចំណែកក្ដីស្រលាញ់មួយនេះទៅកាន់មនុស្សជាច្រើន ក្រុមហ៊ុន ខ្មែរ ប៊ែវើរីជីស បានបន្តបរិច្ចាគទឹកពិសាបរិសុទ្ធកម្ពុជាទៅមន្ទីរពេទ្យ ជាក់ស្ដែងក្នុងថ្ងៃទី១៤ កុម្ភៈ ២០២០ នេះ ក្រុមហ៊ុន ខ្មែរ ប៊ែវើរីជីស បានបរិច្ចាគទឹកបរិសុទ្ធដល់មន្ទីរពេទ្យកុមារជាតិចំនួន៩០០០កេស ដើម្បីចែកជូនបងប្អូនដែលយកបុត្រធីតាមកសម្រាកក្នុងមន្ទីរពេទ្យនេះផងដែរ ។
ថ្លែងនៅក្នុងពិធីប្រគល់ និងទទួលទឹកពិសារបរិសុទ្ធរបស់ក្រុមហ៊ុន ខ្មែរ ប៊ែវើរីជីស នៅមន្ទីរពេទ្យកុមារជាតិ លោកស្រី គង់ កុសល នាយិកាផ្នែកទីផ្សារនៃក្រុមហ៊ុន ខ្មែរ ប៊ែវើរីជីស បានអោយដឹងថា ថ្ងៃនេះជាថ្ងៃទី២ហើយ ដែលក្រុមហ៊ុនបានបរិច្ចាគទឹកបរិសុទ្ធដល់មន្ទីរពេទ្យធំៗចំនួន៥ នៅក្នុងប្រទេសកម្ពុជា ដែលសរុបមានចំនួន ៣៣០០០ កេស ក្នុងនោះរួមមាន មន្ទីរពេទ្យមិត្តភាពខ្មែរ-សូវៀត មន្ទីរពេទ្យកាល់ម៉ែត មន្ទីរពេទ្យកុមារគន្ធបុប្ផាទី៤ មន្ទីរពេទ្យព្រះកុសុមៈ និងមន្ទីរពេទ្យកុមារជាតិ ។
សម្រាប់ក្នុងថ្ងៃទី២នេះ មន្ទីរពេទ្យបានបរិច្ចាគទឹកបរិសុទ្ធទៅមន្ទីរពេទ្យពីរគឺមន្ទីរពេទ្យកុមារជាតិ និងមន្ទីរពេទ្យមិត្តភាពខ្មែ-រសូវៀត ដោយមន្ទីរពេទ្យកុមារជាតិទទួលបានទឹកបរិសុទ្ធកម្ពុជា ៩០០០ កេស និងមន្ទីរពេទ្យមិត្តភាពខ្មែរ-សូវៀតទទួលបាន ៥៥០០កេស ។
លោកស្រីបន្តថា គោលបំណងដែលក្រុមហ៊ុនបរិច្ចាគទឹកបរិសុទ្ធដល់មន្ទីរពេទ្យធំៗក្នុងប្រទេសកម្ពុជានាពេលនេះ គឺចង់អោយអ្នកជំងឺដែលកំពុងសម្រាកព្យាបាលនៅក្នុងមន្ទីរពេទ្យមានសុខភាពល្អប្រសើរឡើងវិញ ដោយពិសាទឹកដែលមានគុណភាព និងដើម្បីជួយកាត់បន្ថយការចំណាយរបស់អ្នកជំងឺនៅក្នុងមន្ទីរពេទ្យ ។ អ្វីដែលសំខាន់នោះ គឺក្រុមហ៊ុនមានគោលបំណងមួយទៀតនោះ ចង់តបស្នងដល់សង្គមដែលខ្លួនរស់នៅ និងធ្វើអាជីវកម្ម ។
លោកស្រីបន្ថែមថា ក្រុមហ៊ុននឹងបន្តផ្ដល់ជំនួយ ដើម្បីចូលរួមចំណែកក្នុងសង្គមកម្ពុជា តាមរយៈការផ្ដល់នូវភេសជ្ជៈដូចជាទឹកពិសានេះជាដើម ។ ពេលនេះ ក្រុមហ៊ុនបានជ្រើសរើសយកមន្ទីរពេទ្យធំៗដើម្បីផ្ដល់អំណោយសប្បុរសធម៌ហើយនៅពេលខាងមុខក្រុមហ៊ុននឹងផ្ដល់អំណោយនេះទៅដល់មន្ទីរពេទ្យតូចធំផ្សេងៗដែលមានតម្រូវការចាំបាច់ ។
តំណាងមន្ទីរពេទ្យកុមារជាតិ ក៏បានថ្លែងអំណរគុណដល់ក្រុមហ៊ុន ខ្មែរ ប៊ែវើរីជីស ដែលបានបរិច្ចាគទឹកបរិសុទ្ធដល់មន្ទីរពេទ្យសម្រាប់ចែកជូនមាតាបិតា ដែលយកបុត្រធីតារបស់ខ្លួនមកសម្រាក និងព្យាបាលក្នុងមន្ទីរពេទ្យ ហើយទឹកបរិសុទ្ធនេះពិតជាមានសារៈសំខាន់សម្រាប់ទារកដែលត្រូវការទឹកដែលមានគុណភាពសម្រាប់ឆុងទឹកដោះគោ និងទទួលទាន ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ