រាជធានីភ្នំពេញ ៖ ធនាគារ ជីប ម៉ុង ដែលទើបដំណើរការនៅក្នុងប្រទេសកម្ពុជាប្រមាណជាង១ឆ្នាំប៉ុណ្ណោះ តែទទួលបានការគាំទ្រច្រើនពីប្រជាពលរដ្ឋកម្ពុជា ដែលធ្វើឱ្យធនាគារនេះ បានបោះជំហានទៅមុខមួយកម្រិតទៀត ដោយបានបង្កើត…
រាជធានីភ្នំពេញ ៖ ធនាគារ ជីប ម៉ុង ដែលទើបដំណើរការនៅក្នុងប្រទេសកម្ពុជាប្រមាណជាង១ឆ្នាំប៉ុណ្ណោះ តែទទួលបានការគាំទ្រច្រើនពីប្រជាពលរដ្ឋកម្ពុជា ដែលធ្វើឱ្យធនាគារនេះ បានបោះជំហានទៅមុខមួយកម្រិតទៀត ដោយបានបង្កើត និងប្រកាសសម្ពោធជាផ្លូវការ ភ្នាក់ងារធនាគារបន្ថែមទៀត ដើម្បីសម្រួលដល់អតិថិជនដែលត្រូវការទទួលសេវាធនាគារពីជីបម៉ុង ។
យោងតាមប្រសាសន៍លោកឧកញ៉ា លាង ម៉េង ប្រធានក្រុមប្រឹក្សាភិបាលធនាគារ ជីប ម៉ុង បានថ្លែងក្នុងពិធីសម្ពោធភ្នាក់ងារធនាគារ ជីប ម៉ុង កាលពីរសៀលថ្ងៃទី១៤ កុម្ភៈ ២០២០ បានឱ្យដឹងថា ការបង្កើតភ្នាក់ងារធនាគារ ជីប ម៉ុង គឺដើម្បីឱ្យពលរដ្ឋដែលជាអតិថិជនរបស់ធនាគារ ជីប ម៉ុង និងពលរដ្ឋកម្ពុជាទាំងមូល អាចទទួលបាននូវសេវាកម្មរបស់ធនាគារ ជីប ម៉ុង កាន់តែមានភាពងាយស្រួល ដូចជាការដកដាក់ប្រាក់របស់អតិថិជននៅក្នុងប្រព័ន្ធធនាគាររបស់ជីបម៉ុង ។
លោកថា ៖ «ការអភិវឌ្ឍនៃបច្ចេកវិទ្យា ជាពិសេសនៅក្នុងបច្ចេកវិទ្យាហិរញ្ញវត្ថុ បានជះឥទ្ធិពលយ៉ាងខ្លាំងដល់អាកប្បកិរិយារបស់ប្រជាជនក្នុងការបង្វិល និងទូទាត់ប្រាក់។ ក្នុងនោះដែរ ធនាគារ ជីប ម៉ុង ជាស្ថាប័នហិរញ្ញវត្ថុឈានមុខគេបាន និងកំពុងខិតខំប្រឹងប្រែង ដើម្បីធ្វើការផ្តល់សេវាកម្មការបង្វិល និងទូទាត់ប្រាក់ដ៏មានប្រសិទ្ធភាពដែលមានភាពរហ័ស មានសុវត្ថិភាព ចំណេញទាំងពេលវេលា និងថវិកា សមស្របទៅតាមតម្រូវការរបស់អតិថិជន»។
លោកឧកញ៉ាបន្តថា ការបង្កើតភ្នាក់ងារធនាគាររបស់ជីបម៉ុង មិនមែនដើម្បីប្រកួតប្រជែងជាមួយភ្នាក់ងារវេរលុយផ្សេងៗក្នុងប្រទេសកម្ពុជានោះឡើយ ដោយសារតែយុទ្ធសាស្ត្រអាជីវកម្មរបស់ជីបម៉ុង និងក្រុមហ៊ុនផ្ទេរប្រាក់ផ្សេងៗមានភាពខុសគ្នា ដោយភ្នាក់ងារ ជីបម៉ុង មិនមែនបង្កើតឡើងដើម្បីផ្ដោតទៅលើតែការផ្ទេរប្រាក់ ដើម្បីយកកម្រៃសេវានោះទេ តែភ្នាក់ងារជីបម៉ុងនឹងមានបម្រើសេវាធនាគារជាច្រើន ដូច្នេះហើយទើបជីបម៉ុងត្រូវការជ្រើសរើសដៃគូដែលមានជំនាញច្បាស់លាស់ និងយុទ្ធសាស្ត្រត្រឹមត្រូវជាមួយខ្លួន ។
លោកឧកញ៉ាបន្ថែមថា ក្នុងឆ្នាំ ២០២០ នេះ ជីបម៉ុង មានយុទ្ធសាស្ត្របង្កើនសាខាធនាគារឱ្យបាន២៥ទីតាំង និងភ្នាក់ងារធនាគារឱ្យបាន៥០០កន្លែង នៅទូទាំងប្រទេស ដើម្បីជំរុញការធ្វើអាជីវកម្មធនាគាររបស់ខ្លួនកាន់តែទូលាយ បម្រើដល់ប្រជាពលរដ្ឋក្នុងប្រទេសកម្ពុជា ។
តាមរយៈភ្នាក់ងារធនាគារ ជីប ម៉ុង ប្រជាពលរដ្ឋកម្ពុជា មិនថានៅទីក្រុង ទីរួមខេត្ត ឬទីរួមស្រុកនានានោះទេ សូម្បីតែនៅតាមបណ្តា ភូមិ ឃុំ ដាច់ស្រយាលក៏អាចធ្វើការបង់វិក្កយបត្រផ្សេងៗ បញ្ចូលលុយទូរស័ព្ទ និងដក/ដាក់ប្រាក់ក្នុងគណនីធនាគារ ជីប ម៉ុង គ្រប់ពេលវេលា ដោយមានភាពរហ័ស និងសុវត្ថិភាពខ្ពស់ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ