តាមប្រភពព័ត៌មាន Bangkok Post បានឱ្យដឹងថា ក្រុមគ្រួសារនៃជនរងគ្រោះដោយសារការបាញ់ប្រហារដ៏សាហាវបំផុតក្នុងប្រវត្តិសាស្ត្ររបស់ប្រទេសនេះកំពុងសង្ឃឹមថា មនុស្សជាទីស្រលាញ់របស់ពួកគេ ដែលខ្លះនៅតែស្ថិតក្នុងការព្យាបាលកម្រិតធ្ងន់នឹងឆាប់ជាសះស្បើយ ។
លោក Boonthan Karun ជាឪពុករបស់លោក Pol Sgt Kritsada Karun មានប្រសាសន៍ថា គាត់និងក្រុមគ្រួសារសង្ឃឹមថា កូនប្រុសរបស់គាត់នឹងជាសះស្បើយ។ Pol Sgt Kritsada គឺជាសមាជិកម្នាក់នៃអង្គភាពប្រឆាំងភេរវកម្ម Arintharaj 26 ស្ថិតនៅក្រោមការិយាល័យប៉ូលីសក្រុងដែលបានប្រយុទ្ធជាមួយខ្មាន់កាំភ្លើងនៅខាងក្នុងផ្សារទំនើប Terminal 21 ក្នុងខេត្ត Nakhon Ratchasima ។ មន្ត្រីរូបនោះត្រូវបានគេបាញ់ចំក្បាល ក្នុងកំឡុងពេលប្រតិបត្តិការប៉ូលីសកាលពីថ្ងៃទី៨ ខែកុម្ភៈដើម្បីប្រយុទ្ធនឹងខ្មាន់កាំភ្លើង ហើយត្រូវបានបញ្ជូនទៅកាន់មន្ទីរពេទ្យម៉ាហារ៉ាជុ។ គាត់បាននៅកន្លែងព្យាបាលកម្រិតធ្ងន់ តាំងពីពេលនោះមក។
លោក Boonthan និយាយថាគាត់ដឹងថា វាជាការលំបាកសម្រាប់កូនប្រុសរបស់គាត់ក្នុងការជាសះស្បើយពេញលេញ ប៉ុន្តែបាននិយាយថាគាត់ត្រូវបានប្រាប់ដោយគ្រូពេទ្យថា កូនប្រុសរបស់គាត់ឈ្មោះ Pol Sgt Kritsada កំពុងមានភាពប្រសើរឡើងបន្តិចម្តងៗ។
ជាមួយគ្នានេះដែរ អភិបាលខេត្ត Nakhon Ratchasima លោក Wichian Chantharanothai បាននិយាយថា ការបរិច្ចាគសាធារណៈកំពុងហូរចូល ហើយចំនួនសរុបបានកើនឡើងដល់ ៥៨លានបាតកាលពីថ្ងៃសុក្រ។
ជាបឋម អាជ្ញាធរនឹងផ្តល់ប្រាក់ចំនួន ៣០០០០០បាតដល់ក្រុមគ្រួសារជនរងគ្រោះម្នាក់ៗ ដោយលោកបានបន្ថែមថារាល់ថវិកាទាំងអស់ ដែលបានបរិច្ចាគនឹងទៅដល់គ្រួសារនៃអ្នកដែលបានស្លាប់ឬរងរបួសនៅក្នុងការបាញ់ប្រហារនេះ៕ កែសម្រួលដោយ ៖ សុឃាក់
ចែករំលែកព័តមាននេះ