ខេត្តក្រចេះ ៖ បើតាមសេចក្តីរាយការណ៍បឋមបានឱ្យដឹងថា ក្មេងសិស្សសាលាវ័យជំងទង់ មានទាំងប្រុស ទាំងស្រីចំនួន៣នាក់ ដែលមានអាយុទើបតែ១៤ឆ្នាំ បានលង់ទឹកទន្លេបាត់បង់ជីវិតជាបន្តបន្ទាប់ ខណៈដែលជនរងគ្រោះ រួមនឹងមិត្តភក្តិជាច្រើននាក់ទៀតបាននាំគ្នាចុះទៅលេងទឹកនៅចុងខ្សាច់ឆ្នេរទន្លេមេគង្គ ហេតុការណ៍ខាងលើបង្កឱ្យមានការភ្ញាក់ផ្អើលនេះ កាលពីល្ងាចថ្ងៃទី១៣ ខែកុម្ភៈ ឆ្នាំ២០២០ នៅចំណុចភូមិថ្មី២ ឃុំខ្សាច់អណ្ដែត ស្រុកឆ្លូង។
សេចក្តីរាយការណ៍បន្តថា ក្មេងរងគ្រោះទាំង៣នាក់ ១-ឈ្មោះ ឡេ ចាន់រក្សា ភេទស្រី អាយុ១៤ឆ្នាំ ២-ឈ្មោះ ធិន ភក្ត្រា ភេទប្រុស អាយុ១៩ឆ្នាំ និង៣-ឈ្មោះ ខុន ធារ៉ា ភេទស្រី អាយុ១៤ឆ្នាំ ក្មេងប្រុស-ស្រីរងគ្រោះទាំង៣នាក់នេះ រស់នៅស្រុកឆ្លូង ខេត្តក្រចេះ។
បើតាមនគរបាលស្រុកឆ្លូងបាននិយាយថា ខណៈពេលកើតហេតុភ្លាមៗនោះ កម្លាំងនគរបាលបានចុះទៅដល់កន្លែងកើតហេតុធ្វើការជួយរក ក៏ប្រទះឃើញសពក្មេងប្រុស-ស្រីចំនួន២នាក់ ចំណែកក្មេងស្រីរងគ្រោះម្នាក់ទៀតត្រូវបានលិចបាត់ក្នុងទន្លេបាត់ ។ លុះរហូតដល់ព្រឹកថ្ងៃទី១៤ ខែកុម្ភនេះ ទើបត្រូវបានក្រុមគ្រួសារ ក៏ដូចជានគរបាលប្រទះឃើញ និងស្រង់ក្មេងស្រីរងគ្រោះចេញពីក្នុងទឹកទន្លេ។
អធិការនគរបាលស្រុកឆ្លូង លោក ឆុង តូរ៉ាន់ បាននិយាយថា នៅល្ងាចថ្ងៃកើតហេតុនោះ ក្មេងជំទង់ជាសិស្សមានគ្នា៦នាក់ បាននាំគ្នាចុះទៅលេងទឹកនៅឆ្នេរខ្សាច់ក្នុងឃុំខ្សាច់អណ្តែត ស្រុកឆ្លូង។ លុះមួយសន្ទុះក្រោយមក ក្មេងទាំងនោះក៏បានជួបហេតុការណ៍លង់ទឹកទន្លេមេគង្គតែម្តង និងបានលង់បណ្តាលឱ្យបាត់បង់ជីវិតចំនួន៣នាក់ ក្នុងនោះមានស្រី២នាក់។ ចំណែកមិត្តភក្តិគេ៣នាក់ផ្សេងទៀត ត្រូវបានអ្នកឃើញហេតុការណ៍ជួយសង្គ្រោះទាន់ ដោយបានបោះកង់ឡានឱ្យពួកគេតោង ទើបរួចផុតជីវិតបាន។ (កែសម្រួលដោយ ៖ បុប្ផា)
ចែករំលែកព័តមាននេះ