ខេត្តបន្ទាយមានជ័យ ៖ បុរសចំនួន៣នាក់បានបាត់បង់ជីវិតភ្លាមៗនៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយរវាងរថយន្តដឹកត្រីមួយគ្រឿងបុកជាមួយម៉ូតូមួយគ្រឿង ដែលបានកើតឡើងកាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១៤ខែកុម្ភ: ឆ្នាំ២០២០ លើកំណាត់ផ្លូវជាតិលេខ៥ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
ភាគីខាងម៉ូតូមួយគ្រឿងខាងលើជិះគ្នា៣នាក់ម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ប.មានជ័យ ១T-៧៤១៤ បើកបរដោយឈ្មោះ សម្បត្តិ វិនថាដា ភេទប្រុស អាយុ១៨ឆ្នាំ និងអ្នករួមដំណើរចំនួន២នាក់ទៀត ក្នុងនោះម្នាក់ឈ្មោះស៊ូ ថានុន ភេទប្រុស អាយុ២២ឆ្នាំ និងម្នាក់ទៀតឈ្មោះសាយ សុភី ភេទប្រុស អាយុ២៤ឆ្នាំ ។ ជនរងគ្រោះទាំង៣នាក់រស់នៅភូមិព្រៃទទឹង ឃុំភ្នំតូច ស្រុកមង្គលបូរី។ ជនរងគ្រោះទាំង៣នាក់បានបាត់បង់ជីវិតភ្លាមនៅនឹងកន្លែងកើតហេតុ ។
ចំណែកភាគីខាងរថយន្ត១គ្រឿងមានដឹកត្រីម៉ាកហ៊ីយ៉ាន់ដាយ ពណ៌ស ពាក់ស្លាកលេខ ប.មានជ័យ ៣A-១៥៤២ បើកបដោយឈ្មោះជួប ធូ ភេទប្រុស អាយុ៥០ឆ្នាំ រស់នៅភូមិព្រៃប្ញស្សី សង្កាត់ព្រះពន្លា ក្រុងសិរីសោភ័ណ ត្រូវសមត្ថកិច្ចចាប់ឃាត់ខ្លួន ។
តាមប្រភពព័ត៌មានពីនគរបាលចរាចរណ៍បានឲ្យដឹងថា មុនពេលកើតហេតុ ជនរងគ្រោះទាំង៣នាក់ជិះម៉ូតូ ម៉ូតូ១គ្រឿងម៉ាកហុងដាឌ្រីម ធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើ ស្រាប់តែមានរថយន្តដឹកត្រីមួយគ្រឿងធ្វើដំណើរមកដល់ បានបុកម៉ូតូយ៉ាងពេញទំហឹង បណ្តាលឱ្យអ្នកបើកបរម៉ូតូនិងអ្នករួមដំណើរបាត់បង់ជីវិតភ្លាមៗនៅនឹងកន្លែងកើតហេតុ រួចហើយរថយន្តបានបន្តទៅបុកបង្គោលភ្លើងបាក់អស់១ដើមថែមទៀត។ បន្ទាប់ពីកើតហេតុ អ្នកបើកបររថយន្តមិនបានរត់គេចខ្លួននោះទេ គឺនៅនឹងកន្លែងកើតហេតុ ។
បើតាមការរៀបរាប់ពីបើកបររថយន្តបានប្រាប់សមត្ថកិច្ចឱ្យដឹងថា មុនពេលកើតហេតុ អ្នកបើកបរម៉ូតូបានធ្វើដំណើរមកពីទិសខាងជើងទៅត្បូងចូលមកគន្លងផ្លូវរថយន្តមកខាងឆ្វេងដៃរបស់ខ្លួន និងមានល្បឿនលឿន ដោយគាត់មិនអាចគេចបាន ស្របពេលនោះម៉ូតូបានមកបុករថយន្តរបស់គាត់ចំពីមុខយ៉ាងពេញទំហឹង បន្ទាប់មករថយន្តរបស់គាត់ក៏រេចង្កូតទៅបុកនឹងបង្គោលភ្លើងតែម្តង ហើយគាត់ក៏មិនបានរត់ទៅណាដែរ។
ក្រោយពេលកើតហេតុ ជនរងគ្រោះទាំង៣នាក់ដែលបាត់បង់ជីវិតខាងលើ ត្រូវបានកម្លាំងនគរបាលជំនាញចរាចរណ៍បានដឹកយកទៅប្រគល់ជូនក្រុមគ្រួសារដើម្បីចាត់ចែងធ្វើបុណ្យតាមប្រពៃណី ។ បន្ទាប់ពីធ្វើការត្រួតពិនិត្យរួច អ្នកបើកបររថយន្តត្រូវបានសមត្ថកិច្ចកំពុងរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធី រីឯម៉ូតូនិងរថយន្តត្រូវបានសមត្ថកិច្ចយកទៅរក្សាទុកនៅស្នងការដ្ឋាននគរបាលខេត្ត ដើម្បីរង់ចាំធ្វើការដោះស្រាយនៅពេលក្រោយទផត៕ (កែសម្រួលដោយ ៖ ធីតា)
ចែករំលែកព័តមាននេះ