រាជធានីភ្នំពេញ ៖ ក្រសួងសុខាភិបាលបានបញ្ជាក់ថា ក្រោយពីធ្វើតេស្តចំពោះភ្ញៀវទេចរណ៍នៅលើនាវាឈ្មោះថា វេស្ទើដាម(Westerdam)ដែលជាកម្មសិទ្ធិរបស់ហូឡង់ អាមសេរិកាឡាញ ដែលចូលចតនៅកំពង់ផែខេត្តព្រះសីហនុ បានបង្ហាញថា មិនមានអ្នកផ្ទុកវីរុសកូរ៉ូណានោះទេ។
យោងតាមសេចក្តីប្រកាសព័ត៌មានរបស់ក្រសុខាភិបាលចេញផ្សាយកាលពីយប់ថ្ងៃទី១៣ ខែកុម្ភៈ ឆ្នាំ២០២០ បានបញ្ជាក់យ៉ាងដូច្នេះថា ៖ «ការធ្វើតេស្តដោយវិទ្យាស្ថានប៉ាស្ទ័រកម្ពុជា លើកវត្ថុសំណាក វិភាគរបស់អ្នកមានបញ្ហាសុខភាពចំនួន២០នាក់ដែលនៅលើនាវាវេស្ទើដាម ដែលចូលសំចតនៅកំពង់ផែខេត្តព្រះសីហនុបានបង្ហាញលទ្ធផលអវិជ្ជមានវីរុសកូរ៉ូណា (COVID-19) ហើយស្ថានភាពរបស់ពួកគាត់នៅពេលនេះមិនមានបញ្ហាអ្វីធំដុំគួរឲ្យព្រួយបារម្ភឡើយ»។
សូមបញ្ជាក់ថា ក្រោយពីនាវាទេសចរណ៍ប្រភេទខាងលើនេះមិនបានទទួលការអនុញ្ញាតឲ្យចូលចតចំនួន៥ប្រទេសហើយនោះ ក្នុងសណ្តានចិត្តមនុស្សធម៌ពិតប្រាកដ និងការសម្រេចដ៏មហិមា សម្តេចតេជោហ៊ុន សែន នាយករដ្ឋមន្ត្រី បានសម្រេចឲ្យនាវានេះចូលចតនៅកំពង់ផែខេត្តព្រះសីហនុ កាលពីវេលាម៉ោងប្រហែល៧ថ្ងៃទី១៣ ខែកុម្ភៈ ឆ្នាំ២០២០។
បន្ទាប់ចូលចតភ្លាម ក្រុមការងារឆ្លើយតបបន្ទាន់ថ្នាក់ជាតិនៃក្រសួងសុខាភិបាល និងថ្នាក់ខេត្តនៃមន្ទីសុខាភិបាល បានធ្វើដំណើរតាមកាណូតឡើងទៅលើនាវាទេចរណ៍នេះដែលស្ថិតនៅចំណុចសូន្យលើផ្ទៃសមុទ្រឆ្ងាយពីកំពង់ផែខេត្តព្រះសីហនុ ដើម្បីធ្វើការពិនិត្យសុខភាពតាមវិធានការចត្តាឡីស័កនៃច្បាប់សុខាភាពអន្តរជាតិឆ្នាំ២០០៥ ដែលមានអ្នកដំណើរចម្រុះចំនួន៤១សញ្ជាតិ សរុបមានចំនួន១.៤៥៥នាក់ និងបុគ្គលិកធ្វើការ រួមទាំងនាវិកចំនួន៨០២នាក់ សរុបចំនួន២២៥៧នាក់ នៅលើនាវានេះ។
ក្រោយពីធ្វើការសហការជាមួយក្រុមគ្រូពេទ្យរបស់នាវា និងការពិនិត្យដោយហ្មត់ចត់របស់ក្រុមគ្រូពេទ្យយើងបានរកឃើញមានភ្ញៀវទេសចរដែលមានបញ្ហាសុខភាពចំនួន២០នាក់ និងមានអាយុចាប់ពី២២ដល់ ៧៧ឆ្នាំ (ស្រី៩នាក់ និងប្រុស១១នាក់) ដែលមាន៧សញ្ជាតិ (ក្នុងនោះសញ្ជាតិអាមេរិក៧នាក់, ឥណ្ឌូនេស៊ី៤នាក់, ហ្វីលីពីន៣នាក់, ហូឡង់២នាក់, កាណាដា២នាក់, ប៊ែលហ្សិកម្នាក់ និងអង់គ្លេសម្នាក់)។
បន្ទាប់ពីពិភាក្សាបច្ចេកទេសក្នុងកិច្ចការការពាហេតុការណ៍ដែលអាចកើតឡើងជាយថាហេតុនិងដើម្បីឲ្យមានភាពជាក់លាក់ លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានសម្រេចឲ្យក្រុមការងារឆ្លើយតបបន្ទាន់របស់កម្ពុជាយកសំណាកវត្ថុវិភាគទាំង២០នាក់ រួចបញ្ជូនទៅវិទ្យាស្ថានប៉ាស្ទ័រកម្ពុជាតាមរយៈយន្តហោះ(អេលីកុងទែរ)ចំនួន២ជើង (ជើងទី១ចំនួន១៤សំណាក និងជើងទី២ចំនួន៦សំណាក) ។
លទ្ធផលជាផ្លូវការបានបង្ហាញអវិជ្ជមានវីរុសកូរ៉ូណាថ្មី នៅវេលាម៉ោង៨និង៣០នាទីយប់ថ្ងៃទី១៣ ខែកុម្ភៈ ដោយវិទ្យាស្ថានប៉ាស្ទ័រ៕ (កែសម្រួលដោយ ៖ ធីតា)
ចែករំលែកព័តមាននេះ