រាជធានីភ្នំពេញ ៖ ផ្ទះទុកចោលមួយកន្លែងត្រូវបានក្រុមអ្នករើសអេតចាយធ្វើជាជំរកស្នាក់នៅ និងស្តុកអីវ៉ាន់អេតចាយ ហើយគេមិនដឹងថា បណ្តាលមកពីមូលហេតុអ្វីនោះទេ ស្រាប់តែមានអគ្គីភ័យឆាបឆេះឡើងបង្កការភ្ញាក់ផ្អើលបងប្អូនប្រជាពលរដ្ឋនិងរថយន្តពន្លត់អគ្គីភ័យជាច្រើនគ្រឿងចុះមកជួយអន្តរាគមន៍។
ហេតុការណ៍ខាងលើនេះបង្កការភ្ញាក់ផ្អើលកើតឡើងកាលពីវេលាម៉ោង១០យប់ថ្ងៃទី១៣ ខែកុម្ភៈ ឆ្នាំ២០២០ នៅចំណុចទល់មុខវិទ្យាល័យទួលស្វាយព្រៃ ផ្លូវ១៩៩កែងនឹងផ្លូវ៣៥៨ សង្កាត់ទួលស្វាយព្រៃ១ ខណ្ឌបឹងកេងកង ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានអោយអោយដឹងថា ទីតាំងកើតហេតុខាងលើ ពីមុនជាកន្លែងបើកហាងលក់ស៊ុប បច្ចុប្បន្នបានបិទហាងឈប់លក់ដូរ ហើយទុកកន្លែងនេះចោល ធ្វើអោយក្រុមអ្នករើសអេតចាយបានយកទីតាំងនេះធ្វើជាជំរកស្នាក់នៅ ដោយមានផ្ទុកអីវ៉ាន់អេតចាយរញ៉េរញ៉ៃយ៉ាងអនាធិបតេយ្យ ។
តាមប្រភពដដែលបានបន្តទៀតថា លុះមកដល់វេលាម៉ោងកើតហេតុខាងលើ ស្រាប់តែឃើញមានផ្សែងនិងអណ្ដាតភ្លើងហុយខ្មួលខ្មាញ់ចេញពីកន្លែងកើតហេតុខាងលើ ដោយមិនដឹងមូលហេតុ ព្រោះកន្លែងនោះមានសភាពរញ៉េរញ៉ៃខ្លាំងពេក ទើបពួកគាត់ជាប្រជាពលរដ្ឋបានរាយការណ៍ប្រាប់សមត្ថកិច្ចមូលដ្ឋាននិងរថយន្តពន្លត់អគ្គីភ័យចំនួន៦គ្រឿងចេញមកជួយអន្តរាគមន៍ ក្នុងនោះមានរថយន្តបង្ការនិងពន្លត់អគ្គីភ័យរបស់ស្នងការរាជធានីភ្នំពេញមកចំនួន៥គ្រឿង និងរថយន្តពន្លត់អគ្គីភ័យរបស់ក្រុមហ៊ុនស្រាបៀរចំនួន១គ្រឿង បានចូលរួមបាញ់ពន្លត់ដោយប្រើប្រាស់ទឹកអស់ចំនួន២រថយន្ដ ទើបភ្លើងបានរលត់ទៅវិញនៅវេលាម៉ោង១១យប់ថ្ងៃដដែល ។
ក្នុងហេតុការណ៍នេះដែរ មិនបណ្ដាលឲ្យមានគ្រោះថ្នាក់ដល់មនុស្ស និងរាលដាលដល់ផ្ទះ អ្នកជិតខាងនោះទេ គឺគ្រាន់តែខូចខាតសំភារៈអេតចាយអស់មួយចំនួនតែប៉ុណ្ណោះ ។ ចំពោះករណីនេះដែរ បើតាមការសន្និដ្ឋានគឺអាចមកពីក្រុមអ្នករើសអេតចាយដុតទានទុកចោល ទើបបណ្ដាលឲ្យកើតមានអគ្គិភ័យឆេះរាលដាលបែបនេះ ៕ (កែសម្រួលដោយ ៖ ធីតា)
ចែករំលែកព័តមាននេះ