ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវកងកម្លាំងនគរបាលស្រុកម៉ាឡៃធ្វើការស្រាវជ្រាវបង្ក្រាបចាប់ឃាត់ខ្លួនកាលពី១៣ ខែកុម្ភៈ នៅចំណុចមាត់អូរព្រំដែនកម្ពុជា-ថៃ ក្រោយពីជនសង្ស័យយកកូនកាំបិតចាក់ជនរងគ្រោះជាមិត្តភក្តិបណ្តាលឲ្យបាត់បង់ជីវិត ខណៈបញ្ជូនទៅសង្គ្រោះនៅមន្ទីរ ព្រោះតែរឿងមាន់ជនរងគ្រោះជុះអាចម៍ដាក់កន្លែងគេដេក ។…
ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវកងកម្លាំងនគរបាលស្រុកម៉ាឡៃធ្វើការស្រាវជ្រាវបង្ក្រាបចាប់ឃាត់ខ្លួនកាលពី១៣ ខែកុម្ភៈ នៅចំណុចមាត់អូរព្រំដែនកម្ពុជា-ថៃ ក្រោយពីជនសង្ស័យយកកូនកាំបិតចាក់ជនរងគ្រោះជាមិត្តភក្តិបណ្តាលឲ្យបាត់បង់ជីវិត ខណៈបញ្ជូនទៅសង្គ្រោះនៅមន្ទីរ ព្រោះតែរឿងមាន់ជនរងគ្រោះជុះអាចម៍ដាក់កន្លែងគេដេក ។ អំពើហិង្សានេះបានកើតឡើងកាលពីម៉ោង៦និង៥០នាទីយប់ ថ្ងៃទី១២ ខែកុម្ភៈ ឆ្នាំ២០២០ នៅចំណុចភូមិអូរសំព័រ ឃុំម៉ាឡៃ ស្រុកម៉ាឡៃ ។
សេចក្តីរាយការណ៍បានឲ្យដឹងថា ជនសង្ស័យខាងលើឈ្មោះ សៀប វិន ហៅខួច ភេទប្រុស អាយុ៣២ឆ្នាំ មានស្រុកកំណើតនៅភូមិបន្ទាយជ័យ ឃុំបន្ទាយជ័យ ស្រុកចំការលើ ខេត្តកំពង់ចាម ក្រោយពីធ្វើសកម្មភាពរួចបានរត់គេចខ្លួន។ ចំណែកជនរងគ្រោះឈ្មោះ រតនា ភេទប្រុស អាយុ៣៣ឆ្នាំ នៅភូមិអូរអណ្តូង ឃុំបន្ទាយនាង ស្រុកមង្គលបូរី ហើយជនរងគ្រោះ និងជនសង្ស័យ គឺជាមិត្តភក្តិនឹងគ្នា ហើយក៏ជាកម្មករសំណង់ជាមួយគ្នា។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានបន្តថា ក្រោយពីកើតមាននៅអំពើហិង្សានោះ និងទទួលបានព័ត៌មានមក កងកម្លាំងនគរបាលនៃអធិការដ្ឋាននគរបាលស្រុកម៉ាឡៃ បានសហការជាមួយកម្លាំងនគរបាលវរសេនាតូចការពារព្រំដែនគោកលេខ៨១៥ ចុះអនុវត្តតាមបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ ធ្វើការស្រាវជ្រាវតាមប្រមាញ់មុខសញ្ញាជាជនសង្ស័យ លុះរហូតឈានដល់ការបង្ក្រាបចាប់ឃាត់ខ្លួនបាននៅម៉ោង៧និង៣០នាទីព្រឹក ថ្ងៃទី១៣ ខែកុម្ភៈ ឆ្នាំ២០២០ នៅចំណុចមាត់អូរព្រំដែនកម្ពុជា-ថៃ ស្ថិតក្នុងភូមិអូរសំព័រ ឃុំអូរសំព័រ ស្រុកម៉ាឡៃ ខណៈពេលដែលជនសង្ស័យរូបនេះកំពុងព្យាយាមរត់ឆ្លងដែនទៅប្រទេសថៃ ប្រតិបត្តិនេះបានប្រើប្រាស់រយៈពេល១៣ម៉ោងប៉ុណ្ណោះ ។
លោកអធិការបញ្ជាក់ថា ក្រោយពេលចាប់ខ្លួន រួចធ្វើការសាកសួរ ជនសង្ស័យសារភាពថា មុនកើតហេតុ រូបគេ នឹងជនរងគ្រោះមានជម្លោះពាក្យសំដីនឹងគ្នា។ ដោយដំបូងឡើយ រូបគេខឹងនឹងមាន់របស់ជនរងគ្រោះ វាមកជុះអាចម៍ដាក់កន្លែងខ្លួនដេក ក្រោយមករូបគេក៏និយាយលេងថា «គេបានវាយមាន់នោះងាប់បាត់ហើយ» ធ្វើឲ្យជនរងគ្រោះខឹង រួចជេរម្តាយ ក៏កើតជាជម្លោះឈានដល់ការវាយតប់គ្នាតែម្តង។
ជនសង្ស័យសារភាពទៀតថា ដោយសារតែខ្លួនគេមិនអាចវាយឈ្នះជនរងគ្រោះក៏យកកូនកាំបិតចុងស្រួចចាក់ទៅលើជនរងគ្រោះជាច្រើនកាំបិត បណ្តាលឲ្យរងបួសធ្ងន់ ក្រោយមកក៏បាត់បង់ជីវិតតែម្តង បន្ទាប់ពីធ្វើសកម្មភាពរួចគេបានរត់គេចខ្លួនបំណងចូលទៅប្រទេសថៃ ។
លោកអធិការបញ្ជាក់ថា ដោយផ្អែកទៅលើចម្លើយសារភាព និងការប្រព្រឹត្តជាក់ស្តែងរបស់ជនសង្ស័យរូបនេះ រួមទាំងវត្ថុតាងផងនោះ ជនសង្ស័យត្រូវបានកម្លាំងនគរបាលជំនាញព្រហ្មទណ្ឌ រៀបចំសណុះរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់។
គួររំលឹកថា កាលពីយប់ថ្ងៃទី១២ ខែកុម្ភៈ នៅកន្លែងធ្វើការសំណង់មួយកន្លែង មានករណីឃាតកម្មដោយជនរងគ្រោះឈ្មោះរតនា ត្រូវបានជនសង្ស័យឈ្មោះ អូន ខួច បានចាក់ចំដើមទ្រូង បណ្តាលរបួសធ្ងន់ ហើយត្រូវបានបញ្ជូនទៅមន្ទីពេទ្យបង្អែកស្រុកម៉ាឡៃ ប៉ុន្តែដោយសារជនរងគ្រោះហូរឈាមច្រើនពេក ក៏បណ្តាលបាត់បង់ជីវិតតែម្តង ចំណែកជនសង្ស័យដែលជាជនដៃដល់បានគេចខ្លួនបាត់ស្រមោល ។ លុះដល់ថ្ងៃទី១៣ ខែកុម្ភៈនេះ ជនសង្ស័យរូបនេះក៏ត្រូវបានឃាត់ខ្លួនបាន ខណៈបំរុងរត់គេចខ្លួនឆ្លងដែនទៅប្រទេសថៃ ។ (កែសម្រួលដោយ ៖ បុប្ផា)
ចែករំលែកព័តមាននេះ