ចិន ៖ ការលេងវីឌីអូហ្គេមនៅក្នុងប្រទេសចិនកំពុងតែមានប្រជាប្រិយភាពខ្ពស់ ខណៈដែលមនុស្សភាគច្រើនស្នាក់នៅក្នុងផ្ទះដើម្បីការពារខ្លួនពីការឆ្លងជំងឺកូរ៉ូណាថ្មី ។ ជាធម្មតាក្នុងឱកាសបុណ្យចូលឆ្នាំថ្មីដែលនឹងប្រព្រឹត្តិទៅនៅខែមករា ឬកុម្ភៈជារៀងរាល់ឆ្នាំ អ្នកលេងហ្គេមនៅក្នុងប្រទេសចិន មានពេលវេលាច្រើនក្នុងការលេងក្នុងរដូវឈប់សម្រាក ។ ប៉ុន្តែនៅឆ្នាំនេះ បន្ទាប់ពីការផ្ទុះឡើងនៃវីរុសឆ្លង អាជ្ញាធរបានសំរេចចិត្តពន្យារថ្ងៃឈប់សម្រាកជិត ៣សប្តាហ៍នៅកន្លែងជាច្រើន ដែលទុកឱ្យមនុស្សរាប់លាននាក់មានពេលវេលាច្រើន។
វីរុសនេះដែលបានលេចមុខជាលើកដំបូងនៅទីក្រុង Wuhan ប្រទេសចិនកាលពីខែធ្នូ គឺជាជំងឺផ្លូវដង្ហើមបង្កគ្រោះថ្នាក់ដល់អាយុជីវិតដែលបានឆ្លងដល់មនុស្សជាង ៥៩០០០ នាក់នៅទូទាំងពិភពលោក និងបានសម្លាប់មនុស្សជាង ១៣០០ នាក់។ ករណីភាគច្រើនគឺនៅចិនដីគោកដោយសារតែចេញទៅក្រៅជួបគ្នាមិនបាន មនុស្សជាច្រើនបានទាក់ទងគ្នាតាមប្រព័ន្ធអ៊ីនធើណេត ។ Zhanchao Yang អាយុ២៤ឆ្នាំ ដែលជាកម្មករសំណង់មកពីទីក្រុង Dongguan ខេត្ត Guangdong ប្រទេសចិន បានប្រាប់សារព័ត៌មាន CNN ថា៖«ក្នុងឆ្នាំថ្មី យើងតែងតែសម្រាកនៅផ្ទះ។ នៅប៉ុន្មានសប្តាហ៍នេះ ខ្ញុំនៅលេងវីឌីអូហ្គេមជាញឹកញាប់»។
Yang បានធ្វើដំណើរទៅកាន់ស្រុកកំណើតរបស់គាត់នៅ Kaifeng ខេត្ត Henan ក្នុងឱកាសបុណ្យចូលឆ្នាំថ្មី។ ពេលត្រលប់ទៅ Dongguan ខេត្ត Guangdong វិញ គាត់ត្រូវស្នាក់នៅដាច់ឆ្ងាយពីគេនៅផ្ទះរយៈពេល ១៤ថ្ងៃ មុនពេលគាត់អាចត្រឡប់មកធ្វើការបាន។ អ្នកស្រុក Guangdong ដែលមិនបានធ្វើដំណើរទៅទីក្រុងនិងខេត្តផ្សេងទៀត ត្រូវបានអនុញ្ញាតឱ្យត្រឡប់ទៅធ្វើការវិញនៅថ្ងៃទី៩ ខែកុម្ភៈ។
យោងតាមក្រុមហ៊ុនស្រាវជ្រាវ Niko Partners ដែលជាក្រុមហ៊ុនស្រាវជ្រាវផ្តោតលើឧស្សាហកម្មហ្គេមនៅអាស៊ីបានឱ្យដឹងថា ហ្គេមទូរស័ព្ទរបស់ក្រុមហ៊ុន Tencent ដែលមានឈ្មោះថា «Honor of Kings» កំពុងតែត្រូវប៉ាន់យ៉ាងខ្លាំងនៅក្នុងសប្តាហ៍ ដែលប្រជាជនចិនត្រូវសម្រាកពីការងារ។
ក្រុមហ៊ុន Niko Partners បានសរសេរនៅក្នុងរបាយការណ៍ថា៖ «យើងសន្មតថា ផលប៉ះពាល់បានមកពីជំងឺកូរ៉ូណាថ្មី គឺធ្វើឱ្យអ្នកលេងវីឌីអូហ្គេមមានការកើនឡើង និង ឱ្យពួកគេមានពេលច្រើនក្នុងការលេង»។
ខណៈដែលមេរោគឆ្លងនេះបានបណ្តាលឱ្យមានការលុបចោលការប្រកួតហ្គេម ESport នៅពាសពេញប្រទេសចិន និង ធ្វើឱ្យមនុស្សចំណាយពេលច្រើននៅផ្ទះ។ ការដោតឡូតហ្គេមនៅលើ Apple AppStore មានការកើនឡើងដល់ទៅ ២៧.៥% ខណៈដែលប្រាក់ចំណូលកើនឡើង ១២.១%។ នេះបើតាមការលើកឡើងរបស់ក្រុមស្រាវជ្រាវទីផ្សារ Sensor Tower ៕
ប្រភព ៖ CNN , កែសម្រួលដោយ ៖ សំណាង
ចែករំលែកព័តមាននេះ