មកទល់នឹងពេលបច្ចុប្បន្នដើម្បីទទួលបានការចូលចិត្តច្រើននិងចុះក្នុងសង្គមនុស្សមួយចំនួនព្យាយាមធ្វើសឹងគ្រប់បែបយ៉ាងបង្ហាញឱ្យគេឃើញថាអស្ចារ្យឡូយឆាយ។
ប៉ុន្តែទោះជាយ៉ាងណាអ្នកគួរចាំថាគ្មាននរណាម្នាក់កើតមកល្អឥតខ្ចោះឡើយ! យើងមិនអាចផ្គាប់ចិត្តមនុស្សបានគ្រប់គ្នាទេ ហើយក៏មិនគួរព្យាយាមធ្វើគ្រប់យ៉ាងកែប្រែខ្លួនឯងខុសសភាពដើមហួសហេតុដើម្បីនរណាដែរ។ ចូរធ្វើខ្លួនជាខ្លួនឯងទើបអ្នកអាចទទួលបានសុភមង្គលពិតប្រាកដ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីចំណុចមួយចំនួនដែលអ្នកមិនគួរធ្វើដើម្បីតែផ្គាប់ចិត្តនរណាម្នាក់ ៖
១. ដើរលេងដើម្បីអួតគេជាងដើម្បីសប្បាយចិត្តខ្លួនឯង ៖ មនុស្សមួយចំនួននាពេលបច្ចុប្បន្នមិនមែនដើរលេងដើម្បីការសប្បាយខ្លួនឯងប៉ុន្មានទេ ប៉ុន្តែគឺដើម្បីថតរូបភាពបង្ហោះអួតអ្នកដ៏ទៃនៅលើបណ្តាញសង្គមទៅវិញ។ តាមពិតទៅដើម្បីសុខភាពផ្លូវចិត្តខ្លួនឯងល្អប្រសើរអ្នកគួរបញ្ឈប់ទម្លាប់កាន់តែទូរសព្ទនេះ ហើយផ្ដោតអារម្មណ៍លើទេសភាពនិងរំភើបជាមួយអ្វីដែលធម្មជាតិបានផ្ដល់ឱ្យ។
២. ទិញរបស់ថ្លៃៗជាកាដូណាត់ជួបគ្នា ព្រោះខ្លាចគេបដិសេធ ៖ សម័យនេះមនុស្សមួយចំនួនព្យាយាមទាក់ទាញចំណាប់អារម្មណ៍ដៃគូខ្លួនតាមរយៈការបង្ហាញពីភាពឡូយឆាយក្លែងក្លាយជំនួសភាពស្មោះត្រង់។ នេះក៏ព្រោះតែភាគីម្ខាង ឬទាំងសងខាងតែម្ដងមិនច្បាស់ថាតើដៃគូខ្លួនមានភាពពេញចិត្តមកលើខ្លួន ឬអត់ទើបព្យាយាមរករបស់ថ្លៃៗមកធ្វើជាជំនួយ។ ទោះជាយ៉ាងណាត្រូវចាំថាភាពស្មោះត្រង់តែងជួយលើកលក្ខណៈសម្បត្តិល្អប្រសើររបស់អ្នកជានិច្ច។ ហើយប្រសិនបើគេស្រឡាញ់អ្នកមែន គេនឹងសម្គាល់មើលលើភាពស្មោះត្រង់របស់អ្នកជាងលើរបស់របរផ្សេងៗ។
៣. ព្យាយាមធ្វើអ្វីដែលមិនមែនជាខ្លួនឯង ៖ ដើម្បីទទួលបានចំណាប់អារម្មណ៍ពីអ្នកដទៃមនុស្សមួយចំនួនព្យាយាមសំដែងហួសហេតុពេកដូចជាដល់ថ្នាក់កែប្រែឥរិយាបទផ្ទាល់ខ្លួន ការស្លៀកពាក់ និងធ្វើជារួសរាយជ្រុលខុសធម្មតា។ ការកែប្រែខ្លួនឯងទាំងស្រុងឱ្យដូចនរណាម្នាក់ គឺមិនមែនជាវិធីដ៏ប្រសើរដើម្បីទទួលបានការស្ងោចសរសើរពីអ្នកដទៃឡើយ។
៤. បង្អួតទំនាក់ទំនងស្នេហារបស់ខ្លួននៅលើបណ្តាញសង្គម ៖ នាពេលបច្ចុប្បន្ននេះ គូស្នេហ៍ភាគច្រើនចូលចិត្តបង្ហាញទំនាក់ទំនងស្នេហាខ្លួនតាមបណ្តាញសង្គមដើម្បីបញ្ជាក់ពីភាពស្មោះត្រង់រវាងគ្នានិងបង្ហាញពីភាពរឹងមាំនៃក្ដីស្រឡាញ់របស់ពួកគេទៅកាន់អ្នកដទៃ។ ទោះជាយ៉ាងណាការធ្វើបែបនេះហាក់ដូចជាត្រឹមការសំដែងឱ្យឃើញ។ គូស្នេហ៍ដែលមិនច្បាស់ចិត្តពីស្ថានភាពនៃទំនាក់ទំនងស្នេហា ឬអារម្មណ៍របស់ដៃគូរបស់ខ្លួន គឺមានទំនោរប្រើប្រាស់បណ្ដាញសង្គមដើម្បីឱ្យខ្លួនឯងមានអារម្មណ៍ប្រសើរជាងមុន ឬបំបាត់ភាពតានតឹងអំពីទំនាក់ទំនងស្នេហាខ្លួនតាមរយៈការអានមតិយោបល់ល្អៗពីមិត្តក្នុងបណ្ដាញសង្គម។
៥. បោះបង់ក្ដីស្រមៃរបស់ខ្លួនឯងចោល ៖ ការមានក្ដីស្រមៃនិងសេចក្ដីប្រាថ្នាផ្ទាល់ខ្លួន គឺជាកត្តាដ៏ប្រសើរបំផុតមួយដើម្បីជម្រុញការតស៊ូបន្តដំណើរក្នុងជីវិត! ហើយកាន់តែពិសេសនោះ គឺនៅពេលអ្នកបានខំប្រឹងអស់ពីលទ្ធភាពចំណាយញើសឈាម រួមទាំងទឹកភ្នែកដើម្បីសម្រេចឱ្យបាន។
ប្រសិនបើអ្នកបោះបង់ចោលក្ដីស្រមៃខ្លួនឯងដើម្បីតែការពេញចិត្តរបស់នរណាម្នាក់ នោះការខំប្រឹងពុះពារតាំងពីដើមមករបស់អ្នក គឺនឹងប្រែជាគ្មានប្រយោជន៍អ្វីបន្តិចទេ។ ដូច្នេះអ្នកដាច់ខាតមិនគួរបោះបង់ចោលនូវក្ដីស្រមៃរបស់ខ្លួនយ៉ាងងាយដើម្បីតែនរណាម្នាក់ឡើយ។ កុំធ្វើបែបនេះដាក់ខ្លួនឯងអី! ក៏ព្រោះអ្នកសមនឹងទទួលបានអ្វីដែលប្រសើរបំផុត (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ