ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ខណៈជិតដល់ថ្ងៃចូលរោងការទៅហើយនោះ បែរជាជួបកើតរឿងអកុសលទៅវិញ ដោយត្រូវដីបាក់សង្កត់ពីលើបណ្តាលឱ្យបាត់បង់ជីវិតភ្លាមៗតែម្តង ខណៈកំពុងជីកដីដំបូកយកមកធ្វើឡតិ៍ដុតធ្យូង។ ហេតុការណ៍នេះបានកើតឡើងនៅម៉ោង១២និង៣០នាទីរសៀល ថ្ងៃទី១២ ខែកុម្ភៈ ឆ្នាំ២០២០ ស្ថិតនៅចំណុចគោកស្រែសាម៉ ខាងជើងភូមិចំងាយ១០០០ម៉ែត្រ ក្នុងស្រុកស្រីស្នំ ។
បើតាមលោកឧត្តមសេនីយ៍ ភឹង ចិន្តារ៉េត ស្នងការរងខេត្តសៀមរាបបានប្រាប់ឱ្យដឹងនៅព្រឹកថ្ងៃទី១៣ ខែកុម្ភៈ នេះថា ជនរងគ្រោះខាងលើមានឈ្មោះ ណិត ចាប ភេទប្រុស អាយុ២៣ឆ្នាំ មុខរបរកសិករ រស់នៅក្នុងភូមិត្រាំកង់ ឃុំស្លែងស្ពាន ស្រុកស្រីស្នំ ខេត្តសៀមរាប និងមានស្រុកកំណើតនៅភូមិជ្រាបចាស់ ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ ។
លោកឧត្តមសេនីយ៍ បានបញ្ជាក់ទៀតថា មុនពេលកើតហេតុ នៅថ្ងៃទី១២ ខែកុម្ភ: ជនរងគ្រោះបាននាំគូដណ្តឹងរបស់ខ្លួនដែលជិតដល់ថ្ងៃរៀបការទៅហើយ គឺត្រូវចូលរោងនៅថ្ងៃទី១៨ ខែមីនា ឆ្នាំ២០២០ ខាងមុខនេះ ក៏នាំគ្នាទៅជីកដីដំបូកយកមកធ្វើឡតិ៍ដុតធ្យូងនៅចំណុចខាងលើ ស្រាប់តែដីបាក់ធ្លាក់សង្កត់ពីលើបុរសរងគ្រោះ បណ្តាលឱ្យបាត់បង់ជីវិតនៅនឹងកន្លែងកើតហេតុនោះតែម្តង។
លោកស្នងការរងបន្តថា ក្រោយពីទទួលបានព័ត៌មាននេះភ្លាម ប៉ុស្តិ៍រដ្ឋបាលស្លែងស្ពាន បានចុះទៅដល់កន្លែងកើតហេតុ ដើម្បីធ្វើការពិនិត្យ និងធ្វើកោសលវិច្ច័យ ដោយបានពិនិត្យឃើញថា ជនរងគ្រោះពិតជាដីបាក់សង្កត់ពិតប្រាកដមែន។ បច្ចុប្បន្ន ជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ