រាជធានីភ្នំពេញ ៖ ក្នុងពេលធនធានមនុស្សក្នុងវិស័យបច្ចេកទេសកម្ពុជាហាក់នៅមានកម្រិតនៅឡើយ ធៀបនឹងបណ្ដាប្រទេសនានា កម្ពុជាគ្រោងចំណាយទុនប្រមាណជិត៩០លានដុល្លារអាមេរិក ដើម្បីវិនិយោគទៅលើវិស័យអប់រំធនធានមនុស្សក្នុងវិស័យបច្ចេកទេស ដោយបានបើកជាវគ្គបណ្ដុះបណ្ដាលខ្លីៗពីជំនាញបច្ចេកទេស ក្រោមការគ្រប់គ្រងពីក្រសួងការងារ និងបណ្ដុះបណ្ដាលវិជ្ជាជីវៈ ។
យោងតាមសេចក្តីប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈបានអោយដឹងថា មូលនិធិប្រមាណ ៨៨,២៣លានដុល្លារអាមេរិក ត្រូវបានវិនិយោគលើគ្រឹះស្ថានអប់រំ បណ្ដុះបណ្ដាលបច្ចេកទេស និងវិជ្ជាជីវៈនៅកម្ពុជា ក្នុងការអនុវត្តគម្រោងរយៈពេល៥ឆ្នាំ ពីខែកញ្ញា ឆ្នាំ២០១៩ ដល់ខែតុលា ឆ្នាំ ២០២៤ ក្រោមថវិកាកម្ចីរបស់ធនាគារអភិវឌ្ឍន៍អាស៊ី និងទីភ្នាក់ងារបារាំងសម្រាប់ការអភិវឌ្ឍ ។
សេចក្តីប្រកាសព័ត៌មានដដែលនេះបានបន្តថា មូលនិធិនេះជាយន្តការមួយ ដើម្បីជួយជ្រោមជ្រែងក្នុងការផលិតនូវធនធានមនុស្សឱ្យចំគោលដៅ និងទទួលបានទិន្នផលខ្ពស់ ។ ភ្នាក់ងារអនុវត្តគម្រោង រួមមាន ក្រសួងការងារ និងបណ្តុះបណ្តាលវិជ្ជាជីវៈ ។ ការវិនិយោគនេះទៀតសោតផ្តោតទៅលើមូលដ្ឋានហេដ្ឋារចនាសម្ព័ន្ធដូចជា អគារសិក្សា អន្តេវាសិកដ្ឋាន រោងជាង ឧបករណ៍ សម្ភារបរិក្ខារ ការអភិវឌ្ឍសមត្ថភាពបុគ្គលិកគ្រូ ព្រមទាំងថវិកាបណ្តុះបណ្តាល និងគាំទ្រសកម្មភាពផ្សេងៗទៀត ។
លោក ពេជ សោភ័ន រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ និងជានាយកគម្រោងផងដែរនោះលើកឡើងថា តាមរយៈគម្រោងនេះនឹងចូលរួមពង្រឹងគុណភាពនៃការផ្គត់ផ្គង់កម្លាំង ពលកម្មជំនាញក្នុងឧស្សាហកម្មនៃវិស័យអាទិភាពទាំង៤ រួមមាន កម្មន្តសាល សំណង់ អគ្គិសនី និងអេឡិចត្រូនិក ។ លើសពីនេះគម្រោងនឹងចូលរួមពង្រឹងតួនាទីរបស់ក្រុមប្រឹក្សាជំនាញតាមវិស័យ និងភ្ជាប់ទំនាក់ទំនងក្នុងការអភិវឌ្ឍជំនាញ ដោយផ្តោតលើការផ្តល់ជំនាញថ្មីការបណ្តុះបណ្តាល ជំនាញឡើងវិញ និងការបំប៉នជំនាញបន្ថែមដល់កម្លាំងពលកម្មដែលកំពុងបំពេញការងារទាំងវិស័យសាធារណៈ និងឯកជន ។
បើតាមការបញ្ជាក់ពីលោក ទាង សាក់ ប្រធានានាយកដ្ឋានស្ដង់ដារ និងកម្មវិធីសិក្សា នៃក្រសួងការងារនិងបណ្ដុះបណ្ដាលវិជ្ជាជីវៈធ្លាប់បានលើកឡើងថា ជាទូទៅតម្រូវការធនធានជំនាញវាកំពុងមានតម្រូវការខ្ពស់មានកំណើនខ្ពស់ ហើយវិស័យបច្ចេកវិទ្យាកាន់តែលឿនក៏ត្រូវការអ្នកជំនាញដែលស្របនឹងស្ថានភាពកាន់តែខ្លាំងដែរ ចឹងហើយធនធានមនុស្សក្នុងវិស័យសំណង់ក៏ទាមទារអោយមានសមត្ថភាពខ្ពស់ផងដែរ ដូច្នេះហើយទើបក្រសួងការងារជំរុញអោយគ្រឹះស្ថានបណ្ដុះបណ្ដាលទាំងអស់ពង្រឹងគុណភាពបណ្ដុះបណ្ដាលជំនាញអោយខ្លាំងជាងមុន មានគុណភាពឃ្លាំងជាងមុន ៕ កែសម្រួលដោយ ៖ សុឃាក់
ចែករំលែកព័តមាននេះ