ខេត្តស្វាយរៀង ៖ អគ្គីភ័យបានឆាបឆេះចម្ការអំពៅស្ករយ៉ាងសន្ធោសន្ធៅឆេះអស់ចំនួន៨៣ហិកតា បណ្តាលឱ្យរងការខូចខាតអស់ទាំងស្រុង ខណៈសមត្ថកិច្ចដាក់ការសង្ស័យថាមានជនមិនស្គាល់មុខលួចដុតហើយបានចុះអង្កេតស្រាវជ្រាវស៊ើបអង្កេតដើម្បីរកជនសង្ស័យយកមកផ្តន្ទាទោសតាមច្បាប់។
ហេតុការណ៍ខាងលើនេះបានកើតឡើងកាលពីម៉ោង៦យប់ថ្ងៃទី១១ ខែកុម្ភៈ ឆ្នាំ២០២០ រហូតដល់ម៉ោង៩និង៥៥យប់ថ្ងៃដដែល ទើបក្រុមហ៊ុនពន្លត់ភ្លើងរលត់អស់ទាំងស្រុង ។
បើតាមលោកថាច់ រតនា ប្រធានមន្ទីរកសិកម្មរុក្ខាប្រមាញ់និងនេសាទខេត្តបានប្រាប់ឲ្យដឹងថា ករណីអគ្គិភ័យបានឆាបឆេះចម្ការអំពៅខាងលើនេះ គឺជារបស់ក្រុមហ៊ុនសុផាត សំណាង បណ្តាលឱ្យរងការខូចខាតអស់ចំនួន៨៣ហិកតា ស្ថិតនៅភូមិបាត់ថង់ ឃុំគគីរសោម ស្រុកស្វាយទាប ខេត្តស្វាយរៀង ត្រង់ចំណុចចន្លោះពីបង្គោល១៥៣ ទៅបង្គោល១៥៤ ឃ្លាតពីខ្សែបន្ទាត់ព្រំដែនប្រហែល១,៨០០ម៉ែត្រ។
លោកប្រធានមន្ទីរកសិកម្មរុក្ខាប្រមាញ់ និងនេសាទខេត្តបានបន្តឲ្យដឹងថា បច្ចុប្បន្ននេះ អំពៅកំពុងតែធ្លាក់ថ្លៃ ហើយចំពោះអំពៅដែលត្រូវភ្លើងឆេះខាងលើនេះ ខាងមន្ទីរនឹងសម្រួលនាំចេញទៅរោងចក្រ ព្រោះទុកនៅយូរអត់បាននោះទេអាចខូចគុណភាពទឹកយកស្ករ និងក្រុមហ៊ុនប្រមូលទិញអំពៅស្ករខាងវៀតណាមគេមិនទទួលទិញ បើកាប់ប្រមូលផលភ្លាមៗនេះអាចគ្រាន់តែធ្លាក់ថ្លៃបន្តិចប៉ុណ្ណោះ តែបើទុកយូរអាចខាតទាំងស្រុង ។
បច្ចុប្បន្ន សមត្ថកិច្ចកំពុងតែធ្វើការស្រាវជ្រាវរកមុខសញ្ញាដើម្បីយកមកផ្តន្ទាទោសតាមផ្លូវច្បាប់ឲ្យខាងតែបាន៕ (កែសម្រួលដោយ ៖ ធីតា)
ចែករំលែកព័តមាននេះ