ខេត្តកំពត ៖ អភិបាលខេត្តកំពតបានលើកឡើងថា ចាប់ពីថ្ងៃនេះទៅ រដ្ឋបាលខេត្តកំពតមិនអនុញ្ញាតឲ្យប្រជាពលរដ្ឋ ឬជនណាម្នាក់បូមខ្សាច់ចាក់តាមមាត់ព្រែកនៅខាងក្រោយដីកម្មសិទ្ធិរបស់ខ្លួនបានទេ ហើយបើមានសាឡង់បូមខ្សាច់នៅតាមដងព្រែកកំពង់បាយ អាជ្ញាធរ និងសមត្ថកិច្ចជំនាញត្រូវតែចាប់តែម្តង មិនថាសាឡង់នោះ គេថាជារបស់ចៅហ្វាយខេត្តក៏ដោយ។
ថ្លែងក្នុងពិធីប្រកាសដាក់ឲ្យដំណើរការរចនាសម្ព័ន្ធថ្មី ដែលរដ្ឋបាលក្រុងកំពតបានធ្វើឡើងកាលពីរសៀលថ្ងៃទី១១ ខែកុម្ភៈ ឆ្នាំ២០២០ នៅសាលប្រជុំសាលាខេត្តកំពតលោក ជាវ តាយ អភិបាលខេត្តកំពត បានលើកឡើងថា មាត់ព្រែកកំពង់បាយមានសោភ័ណ្ឌភាពស្អាតណាស់ ហើយប្រសិនបើរៀបចំបានត្រឹមត្រូវ ព្រែកមួយនេះនឹងអាចទាក់ទាញភ្ញៀវទេសចរជាតិ និងអន្តរជាតិបានកាន់តែច្រើន។ ម្យ៉ាងទៀតដីមាត់ព្រែកកំពង់បាយ នាពេលបច្ចុប្បន្ន កំពុងត្រូវប៉ាន់ ពិសេសសម្រាប់ជនបរទេសមកវិនិយោគធ្វើបឹងហ្គាឡូ ឬកន្លែងលំហែផ្សេងៗជាដើម។ ដូច្នេះហើយទើបប្រជាពលរដ្ឋមួយចំនួន ពិសេសអ្នកមានប្រាក់ មានខ្សែក្រាស់ ចេះតែខំស្វែងរកឧបាយធ្វើយ៉ាងណា ដើម្បីរំលោភយកដីមាត់ព្រែកជាកម្មសិទ្ធិ។
លោកអភិបាលខណ្ឌបានបន្តថា ជាក់ស្តែងចាប់ពីចំណុចគល់ស្ពានថ្មី មករហូតដល់រូបសំណាក់ព្រះបាទអង្គឌួង ឃើញមានអ្នកលួចបូមខ្សាច់ចាក់មាត់ព្រែកច្រើន ហើយលោកយល់ឃើញថា មូលហេតុនៃការបូមខ្សាច់ដាក់តាមមាត់ព្រែកនៅខាងក្រោយដីកម្មសិទ្ធិរបស់ពួកគេមានពីរ គឺទី១-ប៉ុនប៉ងរំលោភយកដី និងទី២-ឆ្លៀតឱកាសធ្វើការសាងសង់សំណង់ផ្សេងៗ។ ដូច្នេះរដ្ឋបាលខេត្ត និងក្រុងត្រូវសហការគ្នាទប់ស្តាត់ឲ្យខាងតែបាន។
លោកអភិបាលខេត្តបានបញ្ជាក់ទៀតថា បច្ចុប្បន្នឈ្មោះរបស់អភិបាលខេត្តមានមនុស្សយកទៅប្រើប្រាស់ច្រើន ពិសេសរឿងខុសច្បាប់ និងរឿងរសើបៗតែម្តង។ ដោយឡែករឿងបូមខ្សាច់ចាក់តាមមាត់ព្រែកកំពង់បាយនេះក៏ដូចគ្នាដែរ សុទ្ធតែនិយាយថាមានការអនុញ្ញាត ឬសម្របសម្រួលជាមួយអភិបាលខេត្តរួចហើយ។
លោកអភិបាលខេត្តបានដាក់បញ្ជាថា ឲ្យតែឃើញសាឡង់បូមខ្សាច់ចាក់មាត់ព្រែក អាជ្ញាធរ និងសមត្ថកិច្ចនៅទីតាំងនោះ ត្រូវតែចាប់ទាំងអស់ ទោះគេថាជារបស់ចៅហ្វាយខេត្តអនុញ្ញាតឲ្យបូមក៏ដោយ ហើយបើខ្លាចមិនហ៊ានធ្វើ លោកនឹងចុះទៅធ្វើខ្លួនឯងផ្ទាល់តែម្តង។
សូមបញ្ជាក់ថា ការដាក់ឱ្យដំណើរការរចនាសម្ព័ន្ធថ្មីនៃរដ្ឋបាលក្រុងកំពតជាព្រឹត្តិការណ៍ប្រវត្តិសាស្ត្រ ដែលរាជរដ្ឋាភិបាលបានដាក់ចេញនូវការកែទម្រង់ប្រព័ន្ធគ្រប់គ្រង រដ្ឋបាលសាធារណៈនៅថ្នាក់ក្រោមជាតិ តាមគោលនយោបាយ វិមជ្ឈការ និងសហវិមជ្ឈការ ក្នុងការទទួលខុសត្រូវលើការគ្រប់គ្រង ការចាត់ចែង និងការប្រើប្រាស់សិទ្ធិអំណាច និងធនធានរបស់ខ្លួន សម្រាប់ការផ្តល់សេវា និងការអភិវឌ្ឍន៍មូលដ្ឋាន ឆ្លើយតបទៅនឹងតម្រូវការ របស់ប្រជាពលរដ្ឋប្រកបដោយប្រសិទ្ធភាព៕ (កែសម្រួលដោយ ៖ ធីតា)
ចែករំលែកព័តមាននេះ