រាជធានីភ្នំពេញ ៖ ធនាគារ ជីបម៉ុង បានប្រកាសបើកដំណើរការសាខាចំនួន២បន្ថែមក្នុងថ្ងៃតែមួយ ដើម្បីផ្ដល់ជូនសេវាធនាគារដល់អតិថិជនរបស់ខ្លួន ដែលកំពុងគាំទ្រប្រតិបត្តិការធនាគារថ្មីមួយនេះ ដោយសាខាទាំង២នេះនឹងបម្រើសេវាកម្មជូនអតិថិជនរៀងរាល់ថ្ងៃ ពោលគឺ៧ថ្ងៃក្នុងមួយសប្ដាហ៍ និងបើកចាប់ពីម៉ោង៨ព្រឹក…
រាជធានីភ្នំពេញ ៖ ធនាគារ ជីបម៉ុង បានប្រកាសបើកដំណើរការសាខាចំនួន២បន្ថែមក្នុងថ្ងៃតែមួយ ដើម្បីផ្ដល់ជូនសេវាធនាគារដល់អតិថិជនរបស់ខ្លួន ដែលកំពុងគាំទ្រប្រតិបត្តិការធនាគារថ្មីមួយនេះ ដោយសាខាទាំង២នេះនឹងបម្រើសេវាកម្មជូនអតិថិជនរៀងរាល់ថ្ងៃ ពោលគឺ៧ថ្ងៃក្នុងមួយសប្ដាហ៍ និងបើកចាប់ពីម៉ោង៨ព្រឹក ដល់ម៉ោង៨យប់ ។
ថ្លែងនៅក្នុងសន្និសីទសារព័ត៌មានក្នុងពិធីសម្ពោធសាខាធនាគារទាំង២កាលពីព្រឹកថ្ងៃទី១២ កុម្ភៈ ២០២០ នៅសាខាបាក់ទូក លោកឧកញ៉ា លាង ម៉េង ប្រធានក្រុមប្រឹក្សាភិបាលធនាគារ ជីបម៉ុង បានមានប្រសាសន៍ថា ការបើកសាខាជាបន្តបន្ទាប់របស់ធនាគារ ជីបម៉ុង នៅក្នុងប្រទេសកម្ពុជា គឺដើម្បីផ្ដល់ជូនអតិថិជនដែលបានចាប់ផ្ដើមគាំទ្រតាំងពីដំបូងដោយធនាគារព្យាយាមបង្ខិតសេវាអោយកាន់តែជិតអតិថិជនរបស់ខ្លួន ។
លោកឧកញ៉ាបន្តថា ធនាគារ ជីបម៉ុង មានគម្រោងបើកសាខាអោយបាន២៥នៅក្នុងឆ្នាំ ២០២០នេះ ខណៈរហូតមកដល់ពេលនេះធនាគារជីបម៉ុងមានសាខាចំនួន៧ហើយ ដើម្បីរង់ចាំបម្រើសេវាជូនអតិថិជនរបស់ខ្លួន ។ ធនាគារ ជីបម៉ុង ក៏មានគម្រោងបើកសាខាអោយបានទូទាំងប្រទេស រហូតដល់៥០០សាខាឯណោះ ដើម្បីអោយអតិថិជនកាន់តែមានភាពងាយស្រួល បើទោះបីជាធនាគារ ជីបម៉ុង ជាធនាគារ ឌីជីថលក្ដី ។
លោកឧកញ៉ាបន្ថែមថា សាខា២ដែលបើកដំណើរការនៅពេលនេះ គឺជាសាខាពិសេសជាងសាខាមុនៗ ដោយសាខា២នេះ នឹងបើកដំណើរការ៧ថ្ងៃក្នុងមួយសប្ដាហ៍ ហើយបើកដំណើរការពីម៉ោង៨ព្រឹកដល់ម៉ោង៨យប់ ដើម្បីអោយអតិថិជនដែលត្រូវការទឹកប្រាក់ប្រើប្រាស់ ឬត្រូវការសេវាធនាគារផ្សេងៗអាចមកកាន់សាខាទាំង២នេះបាន ។
គួរបញ្ជាក់ថា ធនាគារ ជីប ម៉ុង សាខាបាក់ទូក និងសាខា ណូរ៉ូ ម៉ល ចាប់ផ្ដើមផ្តល់ផលិតផល និងបម្រើសេវាកម្មធនាគារដ៏សំបូរបែបជូនអតិថិជន។ លោកអ្នកអាចអញ្ជើញមកសាខាថ្មីទាំង២នេះ ដើម្បីបើកគណនីសន្សំ គណនីបញ្ញើមានកាលកំណត់ ពិភាក្សាអំពីសេវាកម្មកម្ចីនានាជាមួយនឹងបុគ្គលិកជំនាញ ប្រកបដោយវិជ្ជាជីវៈខ្ពស់។ លើសពីលើនេះសាខាក៏មានបំពាក់ ម៉ាស៊ីន ATM និងម៉ាស៊ីនដាក់/ដកប្រាក់ សម្រាប់អតិថិជនធ្វើប្រតិបត្តិការ ដក ឬដាក់ប្រាក់បានគ្រប់ពេលវេលា។
ធនាគារ ជីប ម៉ុង សាខាបាក់ទូក ស្ថិតនៅជាន់ទី១ នៃអគារពាណិជ្ជកម្ម ជីប ម៉ុង បាក់ទូក អគារលេខ១៧៤ មហាវិថីសាធារណរដ្ឋឆេក សង្កាត់វាលវង់ ខណ្ឌ៧មករា រាជធានីភ្នំពេញ និងធនាគារ ជីប ម៉ុង សាខា ណូរ៉ូ ម៉ល ស្ថិតនៅជាន់ផ្ទាល់ដីនៃមជ្ឈមណ្ឌលផ្សារទំនើប ណូរ៉ូ ម៉ល ស្ថិតតាមបណ្ដោយមហាវិថីព្រះនរោត្តម កែងផ្លូវ៣៦០ ភូមិ៨ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
គិតត្រឹមថ្ងៃទី១២ ខែកុម្ភៈ ឆ្នាំ២០២០នេះ ធនាគារ ជីប ម៉ុង មានសាខាសរុបទាំងអស់៧ ដែលបានកំពុងបម្រើសេវាកម្មជូនអតិថិជន ហើយក៏មានសាខាជាច្រើនទៀតគ្រោងបើកទ្វារបន្ថែមក្នុងឆ្នាំ២០២០នេះផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ