រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ប្តីប្រពន្ធពីរនាក់បាននាំគ្នាចូលទៅផឹកស៊ី និងរាំកម្សាន្តនៅក្នុងក្លឹបចតុមុខ ក្រោយមកក៏បានជួបនឹងមិត្តចាស់ស្គាល់គ្នា៥ទៅ៦ឆ្នាំមកហើយ ក៏ផឹកជាមួយគ្នា១កែវ ស្រាប់តែត្រូវគេចោទថា លួចខ្សែ.ក ក៏នាំគ្នាព្រួតវាយស្ត្រីជាប្រពន្ធ បណ្តាលឱ្យរងរបួសយ៉ាងដំណំផ្អើលពេញផ្លូវ បង្កឱ្យមានការភ្ញាក់ផ្អើលកាលពីម៉ោង1និង30នាទីរំលងអធ្រាត្រឈានចូលថ្ងៃទី12 ខែកុម្ភៈ ឆ្នាំ2020 តាមបណ្តោយផ្លូវជាតិលេខ៥ នៅចំណុចមុខក្លឹបចតុមុខ ស្ថិតក្នុងសង្កាត់ស្រះចក ខណ្ឌដូនពេញ ។
សេចក្តីរាយការណ៍បន្តថា ជនរងគ្រោះមានឈ្មោះ គឹម គន្ធា ភេទស្រី អាយុ40ឆ្នាំ ស្នាក់នៅផ្លូវជាតិលេខ៥ សង្កាត់ស្រះចក ខណ្ឌដូនពេញ ក្បែរគល់ស្ពានជ្រោយចង្វារ ។
តាមប្រភពពីស្ត្រីរងគ្រោះបានឱ្យដឹងថា មុនកើតហេតុ រូបគាត់នឹងប្តីបាននាំគ្នាចូលទៅហូបចុកនៅក្នុងក្លឹបចតុមុខ តាមផ្លូវជាតិលេខ៥ ក្បែរនឹងគល់ស្ពានជ្រោយចង្វារ ខណៈពេលចូលផឹកស៊ីរហូតជិតដល់ម៉ោងកើតហេតុនោះ ប្តីគាត់បានចេញមកក្រៅមុន ចំណែករូបគាត់នៅជួបនឹងមិត្តភក្តិចាស់ជាជនបង្កដែលស្គាល់គ្នា5ទៅ6ឆ្នាំមកហើយ ក៏អង្គុយផឹកជាមួយគ្នាអស់១កែវ ហើយជជែកគ្នាលេង ស្រាប់តែជជែកបានបន្តិច ខាងជនបង្កមានគ្នា4ទៅ5នាក់បានចោទថា គាត់ជាអ្នកលួចយកខ្សែ.ក ក្រោយរូបគាត់ក៏បានចេញពីទៅខាងក្រៅតាមប្តីរបស់គាត់។
ប្រភពដដែលបន្តថា បន្ទាប់ពីឃើញដូច្នេះ ពួកគេក៏នាំគ្នាចេញពីក្នុងមកខាងក្រៅ រួចព្រួតគ្នាមកវាយរូបគាត់ឡើងផ្អើលពេញលើផ្លូវជាតិលេខ៥ មុខក្លឹបចតុមុខតែម្តង ។ សកម្មភាពវាយរូបគាត់នេះ ត្រូវបានឡាយផ្ទាល់ ហើយក៏ត្រូវកូនស្រីប្រុសរបស់គាត់បានឃើញ ក៏នាំគ្នាមកជួយរូបគាត់ និងបានស្រែកឡូឡាពេញតែផ្លូវ ។ ភ្លាមៗនោះដែរ ក្រុមជនបង្កក៏បានជិះម៉ូតូកង់បី រួចនាំគ្នាគេចខ្លួនបាត់ស្រមោលតែម្តងទៅ។
ស្ត្រីរងគ្រោះក៏បាននិយាយទៀតថា ក្រុមជនបង្កខាងលើនេះ គឺស្រីស្រលាញ់ស្រី ហើយសង្ស័យប្រចណ្ឌលើរូបគាត់ហើយមើលទៅ បានជារករឿងគាត់ និងព្រួតវាយគាត់បែបនេះ ។ ជនរងគ្រោះបន្តថា រូបគាត់ចំណាស់នេះហើយ មិនដែលមាននរណាធ្វើទង្វើបែបនេះនោះទេ គាត់មិនចង់ដាក់ពាក្យបណ្តឹងទេ ចង់វ៉ៃទៅលើជនបង្កវិញឱ្យធ្ងន់ធ្ងរ ប៉ុន្តែត្រូវបានកូនប្រុសស្រីគាត់ហាមឃាត់ រួចឱ្យទៅផ្ទះសិន ចាំគិតទៀត ។
ក្រោយពេលកើតហេតុខាងលើនេះ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលស្រះចក ដើម្បីឱ្យសមត្ថកិច្ចតាមស្រាវជ្រាវតាមចាប់ជនបង្កយកមកផ្តន្ទាទោសទៅតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ