ADផ្ទាំងផ្សព្វផ្សាយពាណិជ្ជកម្ម

មកដឹងពីមុខជំនាញដែលមហាសេដ្ឋីធំៗរៀននៅសាកលវិទ្យាល័យ

4 ឆ្នាំ មុន

១២ ខែ កុម្ភៈ ឆ្នាំ ២០២០ ម៉ោង ០៩:៤៩

ទោះជាអ្នកធ្លាប់លឺរឿងដ៏គួរឲ្យចាប់អារម្មណ៍របស់មហាសេដ្ឋីដែលបានជោគជ័យដោយមិនមានសញ្ញាប័ត្រថ្នាក់បរិញ្ញាពិតមែនក្តី មានមហាសេដ្ឋីជាច្រើនបានឆ្លងកាត់សាកលវិទ្យាល័យយ៉ាងត្រឹមត្រូវមុននឹងអាចឈានមករកភាពជោគជ័យដែលពួកគេមាននាពេលបច្ចុប្បន្ន ។ ហើយក្នុងសហរដ្ឋអាមេរិកវិញ បច្ចេកវិទ្យាគឺជាវិស័យដែលមហាសេដ្ឋីភាគច្រើនប្រឡូកចូល ។ ក្នុងចំណោមមនុស្សដែលមានទ្រព្យសម្បត្តិច្រើនជាងគេទាំង ១០រូបលើពិភពលោកនេះ មានពាក់កណ្តាលបានសិក្សាជំនាញវិស្វកម្ម ឬវិទ្យាសាស្ត្រកុំព្យូទ័រហើយ…

១. លោក ជេហ្វ បេសូស (Jeff Bezos) ៖
លោក បេសូស ជាបុរសដែលមានទ្រព្យសម្បត្តិច្រើនជាងគេលើលោក ។ មុនពេលលោកក្លាយជានាយកប្រតិបត្តិរបស់ Amazon លោកបេសូសបានបញ្ចប់ការសិក្សាពីសាកលវិទ្យាល័យ Princeton ក្នុងឆ្នាំ ១៩៨៦ ក្នុងផ្នែកវិស្វកម្មអគ្គិសនី និងវិទ្យាសាស្ត្រកុំព្យូទ័រ បន្ទាប់ពីប្តូរជំនាញពីរូបវិទ្យា ។

២. លោក ប៊ីក ហ្គេតស៍ (Bill Gates) ៖
លោក ហ្គេតស៍ បានរៀននៅសាកលវិទ្យាល័យ Harvard University បានពីរឆ្នាំមមុននឹងចាកចេញពីសាលានៅឆ្នាំ ១៩៧៥ ដើម្បីបង្កើតក្រុមហ៊ុន Microsoft ជាមួយនឹងមិត្តរួមថ្នាក់ គឺលោក ផល អេឡេន (Paul Allen) ។ លោកជានិស្សិតច្បាប់នៅសាលា Harvard តែលោកក៏បានចូលរួមថ្នាក់គណិតវិទ្យា និងវិទ្យាសាស្ត្រកុំព្យូទ័រដែរ ។ លោកបាននិយាយក្នុងកម្មវិធីមួយជាមួយនិស្សិត Havard កាលពីឆ្នាំ ២០១៨ ថា ប្រសិនបើឲ្យលោកជ្រើសរើសមុខជំនាញមួយសម្រាប់រៀននាពេលបច្ចុប្បន្ននេះ លោកនឹងជ្រើសរើសផ្នែកកម្មវិធី Software វិញ ឬ ផ្នែក Artificial Intelligence ។

៣. លោក ម៉ាក ឃ្យូបេន (Mark Cuban) ៖
បន្ទាប់ពីរៀនថ្នាក់យប់នៅសាកលវិទ្យាល័យ University of Pittsburgh ពេលដែលលោកនៅជាសិស្សថ្នាក់ទី ១១នៅវិទ្យាល័យ លោក ឃ្យូបេន បានបញ្ចប់ការសិក្សាមួយឆ្នាំមុនមិត្តដទៃ ។ មួយឆ្នាំក្រោយមក លោកបានប្តូរទៅសាកលវិទ្យាល័យ Indiana University ព្រោះវាមានមុខជំនាញដែលតម្រូវឲ្យលោកបង់ថ្លៃទាបជាងគេក្នុងចំណោមសាកលវិទ្យាល័យដែលមានកម្មវិធីបង្រៀនផ្នែកអាជីវកម្មទាំងអស់នាពេលនោះ ។

លោកបានបញ្ចប់ការសិក្សាក្នុងជំនាញគ្រប់គ្រង និងរដ្ឋបាលពីសាកលវិទ្យាល័យ Kelley School of Business ។ លោកគាំទ្រការសិក្សាថ្នាក់ខ្ពស់តែលោកមិនគាំទ្រការសិក្សាថ្នាក់អនុបណ្ឌិតទេ ព្រោះលោកគិតថាបច្ចុប្បន្នមនុស្សមានវិធីជាច្រើនក្នុងការរៀនលើអ៊ីនធើណែតដែលអាចផ្តល់ជាបទពិសោធន៍ល្អៗបាន ៕ កែសម្រួលដោយ ៖ សុឃាក់