លោក វ៉ារេន បាហ្វេត (Warren Buffett) ប្រៀបបានជាវិនិយោគិនដែលអស្ចារ្យជាងគេក្នុងជំនានថ្មីនេះ ប៉ុន្តែលោកក៏ជាបុគ្គលដែលត្រូវបានមនុស្សជាច្រើនទទួលស្គាល់ក្នុងផ្នែកដឹកនាំ និងការអភិវឌ្ឍន៍ខ្លួនផងដែរ ។ ដំបូន្មានមួយដែលប្រៀបបានជាច្បាប់សម្រាប់លោក បាហ្វេត គឺ តែងតែរៀនអ្វីថ្មីមួយមុនពេលចូលគេងជារៀងរាល់ថ្ងៃ ។
លោក បាហ្វេត គោរពតាមទម្លាប់នេះស្ទើរតែដូចលោកគោរពសាសនា ហើយវាជារូបមន្តដែលជួយឲ្យលោកជោគជ័យផងដែរ ។ ប្រាកដណាស់ រូបមន្តនេះមិនអាចឲ្យអ្នកទទួលបានលទ្ធផលភ្លាមៗបានទេ ព្រោះមនុស្សត្រូវការរយៈពេលវែងទើបអាចកសាងចំណេះដឹង និងជំនាញបានច្រើន ។ ប៉ុន្តែវាប្រៀបបានជាទម្លាប់ល្អមួយដែលនឹងជួយអ្នកនៅថ្ងៃមុខ ហើយវិធីដែលល្អជាងគេក្នុងការចាប់ផ្តើមទម្លាប់នេះគឺអ្វីដែលលោក បាហ្វេត ចូលចិត្តជាងគេ គឺការអាន ។
លោក បាហ្វេត មានទម្លាប់អានសៀវភៅដែលបានជួយបង្កើតមូលដ្ឋានដ៏រឹងមាំក្នុងការពង្រឹងចំណេះដឹងរបស់ខ្លូន ។ នៅថ្ងៃដែលលោកទំនេរ ឬថ្ងៃសម្រាក លោកចំណាយ ៨០% នៃថ្ងៃនោះលើការអាន ហើយលោកផ្តល់ដំបូន្មានដល់អ្នកដែលចង់សម្រេចដូចលោកឲ្យអានឲ្យបាន ៥០០ទំព័រជារៀងរាល់ថ្ងៃ ។ ហើយទម្លាប់នេះក៏តម្រូវឲ្យអ្នកព្យាយាមរកពេលដើម្បីអានផងដែរ ។ លោក បាហ្វេត ធ្លាប់និយាយថា «ខ្ញុំអានរូចគិត ។ ដោយហេតុដូចនេះទើបខ្ញុំចំណាយពេលជាច្រើនលើការអាន និងការគិត ដែលធ្វើឲ្យខ្ញុំអាចជៀសវាងធ្វើការសម្រេចចិត្តខុសដូចអ្នកដទៃក្នុងវិស័យនេះ ។ ខ្ញុំធ្វើវាព្រោះខ្ញុំចូលចិត្តជីវិតបែបនេះ» ។
លោក ប៊ីល ហ្គេតស៍ (Bill Gates) និងមហាសេដ្ឋីជាច្រើនទៀតក៏គិតដូចលោកដែរ ។ លោក ហ្គេតស៍អានសៀវភៅ ៥០ក្បាលក្នុងមួយឆ្នាំ ។ លោក ម៉ាក ឃ្យូបេន (Mark Cuban) វិញអានច្រើនជាង ៣ម៉ោងក្នុងមួយថ្ងៃទៅទៀត ។ ចំណែកឯលោក អ៊ីឡុន ម៉ាស (Elon Musk) វិញ បានអានសៀវភៅដើម្បីរៀនផលិតកាំជ្រួចទៅអាវកាសទៀតផង ។
ក្រៅពីសៀវភៅហើយ លោក បាហ្វេត ក៏ព្យាយាមពង្រីកចំណេះដឹងរបស់ខ្លួនដោយអានកាសែតដែរដូចជា The Wall Street Journal, Financial times, The New York Times, USA Today, Omaha World-Herald, និង American Banker ជាដើម ។
ការមានពេល ឬមិនមានពេលសម្រាប់ការអាន គឺមិនសំខាន់ទេ ។ មេរៀនដែលអ្នកអាចរៀនបានពីរូបមន្តរបស់លោក បាហ្វេត គឺអ្នកត្រូវតែបន្តអភិវឌ្ឍន៍ខ្លួនរាល់កាលៈទេសៈដែលអ្នកមាន ។ មិនមានមនុស្សច្រើនទេដែលអាចអានសៀវភៅបានយ៉ាងតិច ៥០០ទំព័រក្នុងមួយថ្ងៃ ប៉ុន្តែមនុស្សភាគច្រើនអាចយ៉ាងហោចណាស់ក៏បញ្ចប់បាន ១៥ ទៅ ២០ ទំព័រដែរមុនពេលចូលដំណេក ៕ កែសម្រួលដោយ ៖ សុឃាក់
ចែករំលែកព័តមាននេះ