រាជធានីភ្នំពេញ ៖ យោងតាមមន្ត្រីក្រសួង អប់រំបានអះអាងថា នៅក្នុងវិស័យកីឡាគឺនៅតែមានមន្ត្រីចោរ ដោយមន្ត្រីរូបនោះ បានដើរតួជាគ្រូបង្វឹកដើម្បីទាញយកផលប្រយោជន៍ក្នុងពេលកីឡាករត្រូវចេញទៅប្រកួតនៅក្រៅប្រទេស បើទោះជាខ្លួនមានឈ្មោះជាថ្នាក់ដឹកនាំសហព័ន្ធក៏ដោយ។ ក្រសួងបានចាត់ទុកមន្ត្រីនោះដើរតួជាចោរផង ជាប៉ូលិសផងដែលចាំ…
រាជធានីភ្នំពេញ ៖ យោងតាមមន្ត្រីក្រសួង អប់រំបានអះអាងថា នៅក្នុងវិស័យកីឡាគឺនៅតែមានមន្ត្រីចោរ ដោយមន្ត្រីរូបនោះ បានដើរតួជាគ្រូបង្វឹកដើម្បីទាញយកផលប្រយោជន៍ក្នុងពេលកីឡាករត្រូវចេញទៅប្រកួតនៅក្រៅប្រទេស បើទោះជាខ្លួនមានឈ្មោះជាថ្នាក់ដឹកនាំសហព័ន្ធក៏ដោយ។ ក្រសួងបានចាត់ទុកមន្ត្រីនោះដើរតួជាចោរផង ជាប៉ូលិសផងដែលចាំ បាច់ត្រូវលុបបំបាត់ជាបន្ទាន់ ។ ជាមួយនឹងការទម្លាយនេះ បានធ្វើឱ្យម្នាក់ៗ មានការភ្ញាក់ផ្អើលយ៉ាងខ្លាំង ហើយក៏មានការកោតសរសើរផងដែរចំពោះចំណាត់ការលុបបំបាត់មន្ត្រីទាំងនោះ ឱ្យអស់ពីក្នុងសហព័ន្ធកីឡាជាតិ។
លោក ស សុខា រដ្ឋលេខាធិការក្រសួងអប់រំ បានបញ្ជាក់ថា ក្រសួងនឹងលុបបំបាត់ឱ្យអស់នូវករណីមន្ត្រីចោរនៅក្នុងសហព័ន្ធ ដោយលោកចង់សំដៅទៅដល់មន្ត្រីសហព័ន្ធដែលបានទម្លាក់ខ្លួនពីប្រធានសហព័ន្ធ ឬពីអគ្គលេខាធិការមកធ្វើជាគ្រូបង្វឹក ដោយសារតែចង់ដឹកនាំកីឡាករចេញទៅប្រកួតនៅក្រៅប្រទេស និងចង់បានផលប្រយោជន៍នៅពេលកីឡាករដែលខ្លួនដឹកនាំ ទទួលបានមេដាយមាស ហើយត្រូវបានប្រាក់រង្វាន់ ។
លោកថា ពេលចេញទៅប្រកួតនៅក្រៅប្រទេសម្តងៗ តែងតែមានករណីថ្នាក់ដឹកនាំសហព័ន្ធ ដើរតួជាគ្រូបង្វឹក ហើយធ្វើឱ្យគ្រូបង្វឹកពិតប្រាកដ ដែលគ្មានឥទ្ធិពលអន់ចិត្ត និងក្លាយជារឿងអាស្រូវជារឿយៗនៅក្នុងវិស័យកីឡា ។ ដូច្នេះ ចាប់ពីឆ្នាំ២០២០ នេះតទៅ ក្រសួងអប់រំនឹងលុបបំបាត់មិនឲ្យកើតមាននូវបញ្ហាបែបនេះកើតឡើងទៀតទេ ដើម្បីផ្ដល់យុត្តិធម៌ពិតប្រាកដចំពោះគ្រូបង្វឹករបស់កីឡាករដែលខំប្រឹងប្រែង ។
នេះជាការលើកឡើងរបស់លោកស សុខា ក្នុងសន្និសីទសារព័ត៌មានក្រោយកិច្ចប្រជុំបូកសរុបការងារអនុវិស័យអប់រំកាយនិងកីឡាឆ្នាំ២០១៨-២០១៩ និងលើកទិសដៅអនុវត្តឆ្នាំ២០១៩-២០២០ កាលពីថ្ងៃទី៤ កុម្ភៈ ឆ្នាំ២០២០កន្លងទៅ ។
ជាក់ស្តែង សហព័ន្ធកីឡាកាយវប្បកម្ម បានកើតមានបញ្ហានេះរួចមកហើយ ដោយលោក មង្គល រស្មី ដែលជាប្រធានសហព័ន្ធនៅក្នុងពេលនោះបានឈរឈ្មោះជាគ្រូបង្វឹកនៅពេលកីឡាករ សំបូរ សុ ភ័ ណ្ឌ ត្រូវចេញប្រកួតនៅក្រៅប្រទេស ហើយឈ្នះមេដាយមាសពិភពលោក ។ ទង្វើនេះត្រូវបានគេយល់ថា ដើម្បីទទួលបានថវិកាលើកទឹកចិត្តពីរាជរដ្ឋាភិបាល ។
ក្រោយបញ្ហានេះកើតឡើងលោកមង្គល រស្មី ត្រូវបានសមាជិកបោះឆ្នោតទម្លាក់ពីប្រធានសហព័ន្ធដែលបច្ចុប្បន្ន គ្រប់គ្រងដោយលោកតឹក ប៊ុនវី ដែលជាអតីតអគ្គលេខាធិការ ៕ (កែសម្រួលដោយ ៖ បុប្ផា)
ចែករំលែកព័តមាននេះ