ខេត្តប៉ៃលិន ៖ រហូតមកដល់ព្រឹលថ្ងៃទី១១ ខែកុម្ភៈនេះ សម្រាប់ការប្រមូលផលដើមរដូវ គេសង្កេតឃើញផ្លែស្វាយកែវរមៀតមានការធ្លាក់ចុះគួរឱ្យកត់សម្គាល់ដែលធ្វើឱ្យកសិករម្នាក់ៗយំស្ទើរតែមិនចេញ ខណៈអ្នកខ្លះបានទុកផ្លែស្វាយរបស់ខ្លួនរហូតដល់ទុំពេញដើម ខ្លះទៀតបេះលក់ទាំងបង្ខំចិត្ត ទោះបីជាមានការធ្លាក់ចុះដល់កម្រិតណាក៏ដោយ ដើម្បីបានប្រាក់សម្រាប់យកទៅសងជំពាក់បំណុលមីក្រូហិរញ្ញវត្ថុ ។ ចំណែកអ្នកខ្លះទៀត និយាយរៀបរាប់ទាំងទឹកមុខស្រពោនថា ស្វាយកែវរមៀតឆ្នាំនេះខុសដាច់ស្រឡះពីឆ្នាំ២០១៩កន្លងទៅទាំងផ្លែស្វាយវេចខ្ចប់ថង់ និងផ្លែស្វាយខៀវអត់ខ្ចប់ថង់ ។
ប្រភពព័ត៌មានពីស្ត្រីម្នាក់ ឈ្មោះ ម៉ៅ សុជាតិ អាយុ៣២ឆ្នាំ ដែលប្តីឈ្មោះ អ៊ឹម ស៊ីអ៊ុន អាយុ៣៧ឆ្នាំ រស់នៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយមានចម្ការមួយកន្លែង ស្ថិតនៅចំណុចស្រង់ ក្នុងភូមិក្ងោក ឃុំស្ទឹងកាច់ ស្រុកសាលាក្រៅ បានរៀបរាប់ទាំងទឹកមុខស្រពាប់ស្រពោនឱ្យភ្នាក់ងារយើងដឹងថា គាត់បានដាំដំណាំស្វាយកែវរមៀត ជាង២៥០០ដើម ដោយបានទទួលផលជាច្រើនដងមកហើយ ។ គាត់បន្តទៀតថា ជារៀងរាល់ថ្ងៃគាត់ប្រមូលផលផ្លែស្វាយកែវរមៀតយកទៅលក់នៅប្រទេសថៃ តាមច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ហើយត្រូវបង់ថ្លៃនាំចេញឱ្យទាំងខាងសមត្ថកិច្ចខ្មែរ និងខាងថៃ ។ ប៉ុន្តែផ្លែស្វាយនៅដើមឆ្នាំថ្មីនេះ មានការធ្លាក់ចុះខ្លាំង ដោយផ្លែស្វាយខៀវអត់ខ្ចប់ថង់ ក្នុង១គីឡូក្រាម ឈ្មួញទិញត្រឹម៥បាត (ជាង៥០០រៀល) បើសិនជាល្អលេខ១ ពោល គឺស្វាយស្អាតបំផុតគ្មានប្រឡាក់អ្វីទាំងអស់ ។
ចំពោះកម្មករវិញ គាត់បានជួលពួកគេ គិតជាថ្ងៃដោយកម្មករប្រុស១ថ្ងៃ ជួលម្នាក់ក្នុងតម្លៃ៣០០០០រៀល ទៅ៣៥០០០រៀល ។ ចំណែកកម្មករស្រី១ថ្ងៃ ជួលក្នុងតម្លៃ២៥០០០រៀល ទៅ៣០០០០រៀល ហើយក្នុង១ថ្ងៃៗ គាត់ជួលកម្មករទាំងប្រុសទាំងស្រី ចាប់ពី៥ទៅ៦នាក់ ។ គាត់បន្ថែមទៀតទាំងអស់សង្ឃឹមឱ្យដឹងថា ដោយសារតែទីផ្សារផ្លែស្វាយកែវរមៀតមានការធ្លាក់ចុះយ៉ាងគំហុកបែបនេះ ដូច្នេះបន្ទាប់ពីបេះផ្លែស្វាយលក់រួចមិនសល់ប្រាក់ច្រើនប៉ុន្មាននោះទេ បានត្រឹមតែទប់ទល់ប៉ុណ្ណោះ ព្រោះកម្មករឡើងថ្លៃទិញថ្នាំបាញ់ស្មៅ ថ្នាំសម្លាប់សត្វល្អិត ជីពៅដើម ពៅផ្លែ ក្នុងតម្លៃខ្ពស់ ។
គាត់ក៏សំណូមពរដល់អាជ្ញាធរខេត្ត គ្រប់លំដាប់ថ្នាក់ ជាពិសេសខាងមន្ទីរកសិកម្ម ពាណិជ្ជកម្មខេត្ត ឱ្យជួយរកទីផ្សារជូនពួកគាត់ផង ព្រោះតម្លៃទីផ្សារកសិផលស្វាយកែវរមៀត មានការធ្លាក់ចុះខ្លាំងពេក ដូច្នេះកូនចៅជាកសិករ ពិតជាលំបាកខ្លាំងណាស់ មើលទៅពួកគាត់មិនដឹងជាគិតធ្វើអ្វីបន្តទៀតនោះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ