ខេត្តសៀមរាប ៖ ស្ថានភាពនៃការផ្ទុះឡើងនូវវីរូសកូរ៉ូណាបានធ្វើឲ្យប៉ះពាល់ដល់វិស័យទេសចរណ៍នៅគ្រប់ប្រទេសលើពិភពលោក ខណៈដែលប្រទេសចិនជាទីផ្សារទេសចរណ៍ដ៏ធំថែមទៀត ។ ដូច្នេះដើម្បីដោះស្រាយនូវផល់ប៉ះពាល់ចំពោះមុខ ក្រសួងទេសចរណ៍បានប្រកាសគាំទ្រលើកទឹកចិត្តដល់ភាគីពាក់ព័ន្ធ ទាំងវិស័យរដ្ឋនិងឯកជនរួមគ្នាបង្កើតព្រឹត្តិការណ៍កម្សាន្តឱ្យបានច្រើននៅតាមគោលដៅទេសចរណ៍នានា ដើម្បីជំរុញចលនាទេសចរផ្នៃក្នុងឱ្យកាន់តែផុសផុល សំដៅលើកកម្ពស់វិស័យទេសចរណ៍ជាតិ ក្នុងដំណាក់កាលផ្ទុះការរីករាលដាលនៃវីរុសកូរ៉ូណានេះ។
លោក ទិត ចន្ថា រដ្ឋមន្ត្រីស្តីទីក្រសួងទេសចរណ៍បានប្រកាសនូវការលើកទឹកចិត្តនោះនៅក្នុងកិច្ចប្រជុំការងារទេសចរណ៍ ជាមួយផ្នែកឯកជនក្នុងវិស័យទេសចរណ៍ ជាមួយលោក ទៀ សីហា អភិបាលខេត្តសៀមរាប ព្រមទាំងប្រតិបត្តិករទេសចរណ៍ វិស័យឯកជន តំណាងមន្ទីរ ស្ថាប័ន អង្គភាព ពាក់ព័ន្ធប្រមាណ១៥០នាក់នៅសាលាខេត្តសៀមរាប កាលពីថ្ងៃទី១០ ខែកុម្ភៈ ឆ្នាំ២០២០ កន្លងទៅនេះ ។
លោក ទិត ចន្ថា បានបញ្ជាក់ថា កម្ពុជានៅតែមានភ្ញៀវទេសចរអន្តរជាតិមកទស្សនា ប៉ុន្តែមានការថមថយខ្លះ ពិសេសគឺភ្ញៀវទេសចរចិនដោយសារបញ្ហាផ្ទុះការរីករាលដាលវីរុសកូរ៉ូណា។ លោកអះអាងបន្ថែមថា កម្ពុជាគ្មានករណីឆ្លងវីរុសកូរ៉ូណាទៀតនោះទេ។ លោកបញ្ជាក់បន្ថែមទៀតថា ខណៈនៅសៀមរាប-អង្គរ សកម្មភាពទេសចរនៅតែមានសកម្ម ភាពរស់រវើក ជាពិសេសភ្ញៀវទេសចរអឺរ៉ុបនៅតែមានច្រើន តែមានការថមថយខ្លះ ពិសេស ភ្ញៀវចិនមានការថមថយ ដោយសារប្រភពកំណើតរបស់គាត់មានបញ្ហាវីរុសកូរ៉ូណា ។
លោកបានបញ្ជាក់បន្តថា ប៉ុន្តែមកដល់ពេលនេះ មិនទាន់មានដំណោះស្រាយជាក់លាក់ណាមួយ សម្រាប់បញ្ហាធ្លាក់ចុះភ្ញៀវទេសចរ ក្នុងដំណាក់កាលផ្ទុះការរីករាលដាលវីរុសកូរ៉ូណានេះនៅឡើយទេ ដោយ លោកអះអាងថា បញ្ហានេះក្រសួងទេសចរណ៍មិនអាចធ្វើតែឯងបានទេ គឺមានការពាក់ព័ន្ធនឹងក្រសួង-ស្ថាប័ន ពាក់ព័ន្ធនឹងវិស័យឯកជនក្នុងវិស័យទេសចរណ៍នេះទៀតដែរ។ ទោះបីជាយ៉ាងណា លោករដ្ឋមន្ត្រីស្តីទីបានឲ្យដឹងថា ក្រសួង-ស្ថាប័នពាក់ព័ន្ធ ដែលជាសេនាធិការរបស់រាជរដ្ឋាភិបាល នឹងស្នើសុំទៅកាន់រាជរដ្ឋាភិបាល ដើម្បីទទួលបានដំណោះ ស្រាយជាក់លាក់ណាមួយក្នុងដំណាក់កាលលំបាកនេះ។
លោក ទិត ចន្ថា បានលើកឡើងថា មានបញ្ហាមួយចំនួនដែលតម្រូវឱ្យភាគីពាក់ព័ន្ធរួមគ្នា ដោះស្រាយ ដូចជាបញ្ហាពន្ធដារ អគ្គិសនី ការប្រាក់នៅធនាគារជាដើម សំដៅសម្រួលមធ្យោ បាយជូនក្រុមហ៊ុន ទីភ្នាក់ងារទេសចរណ៍ មូលដ្ឋានអាជីវកម្មសេវាកម្មទេសចរណ៍ ប្រតិបត្តិករ ទេសចរណ៍ជាដើម ដែលពួកគេកំពុងជួបបញ្ហាក្នុងការចំណាយច្រើន ខណៈចំណូលដែលផ្អែក លើការមកទស្សនា ការមកស្នាក់នៅ ឬការប្រើប្រាស់សេវាកម្មរបស់ភ្ញៀវទេសចរណ៍មានការធ្លាក់ចុះ ។
បន្ថែមលើនោះលោកក៏បានអំពាវនាវដល់ភាគីពាក់ព័ន្ធទាំងរដ្ឋ និងឯកជនត្រូវរួមគ្នាបង្កើតព្រឹត្តិការណ៍ទេសចរណ៍នៅតាមគោលដៅទេសចរណ៍ឱ្យបានច្រើន ជំរុញចលនាទេសចរផ្ទៃក្នុង ទាំងប្រជាពលរដ្ឋ និងភ្ញៀវអន្តរជាតិដែលកំពុងស្ថិតនៅកម្ពុជា គឺត្រូវដើរចេញទស្សនាឱ្យបានច្រើន។ ប៉ុន្តែផ្នែកឯកជនក៏ត្រូវសម្រួល ឬបញ្ចុះតម្លៃលក់កញ្ចប់ទស្សនកិច្ចដល់ភ្ញៀវ ក៏ដូចជាការបញ្ចុះ តម្លៃស្នាក់នៅសណ្ឋាគារ អាហារហូបចុក ការដឹកជញ្ជូន សេវាកម្មនានាជាដើម ដើម្បីលើកទឹក ចិត្តឱ្យមានការធ្វើដំណើរទេសចរណ៍ផ្ទៃក្នុង ព្រោះកាលណាមានសកម្មភាពទេសចរណ៍ច្រើន វាជួយសម្រាលការចំណាយនៅតាម មូលដ្ឋាន អាជីវកម្មទេសចរណ៍ ហើយជាសារសម្រាប់ផ្សព្វផ្សាយទៅកាន់ទេសចរក្រៅប្រទេស ដែលជាការទាក់ទាញភ្ញៀវពីក្រៅប្រទេសឱ្យមកទស្សនាកម្ពុជាបន្ថែមទៀត។
លោករដ្ឋមន្ត្រីស្ដីទីក្រសួងទេសចរណ៍បានសង្កត់ធ្ងន់ថា កម្ពុជានៅតែស្វាគមន៍វត្តមានទេស ចរអន្តរជាតិគ្រប់គ្នា ដោយមិនមានការរើសអើងអ្វីទាំងអស់ ប៉ុន្តែនៅតែមានការត្រួតពិនិត្យតាមបច្ចេកទេសវេជ្ជសាស្ត្រសុខាភិបាល និងសូមឱ្យមានការប្រុងប្រយ័ត្នទាំងអស់គ្នា។ លោកក៏បានរំលេចសារអំពាវនាវមួយឃ្លាថា «អង្គរឈរជាងមួយពាន់ឆ្នាំ រង់ចាំភ្ញៀវមកទស្សនា មិនភ័យរឿងកូរ៉ូណា» ៕ (កែសម្រួលដោយ ៖ ធីតា)
ចែករំលែកព័តមាននេះ