ខេត្តបាត់ដំបង ៖ បុរស២នាក់ត្រូវកម្លាំងផ្នែកប្រឆាំងគ្រឿងញៀនតាមក្របួច.កដល់មុខផ្ទះ កាលពីវេលាម៉ោង៣រសៀលថ្ងៃទី១០ កុម្ភៈ ស្ថិតនៅភូមិអូរកណ្ដោល ឃុំសន្តិភាព ស្រុកសំពៅលូន ដែលជាប់សង្ស័យពីបទជូញដូរគ្រឿងញៀនដែលច្បាប់បានហាមឃាត់ ។
មន្ត្រីអធិការរដ្ឋានស្រុកសំពៅលូនបានឱ្យដឹងថា ជនសង្ស័យទាំង២នាក់នោះ ម្នាក់ឈ្មោះ ខាន់ ខេង ភេទប្រុស អាយុ៥៣ឆ្នាំ និងម្នាក់ទៀតឈ្មោះ ឃុន សុឃាង ភេទប្រុស អាយុ៣០ឆ្នាំ ជនទាំង២នាក់រស់នៅចំណុចឃាត់ខ្លួនខាងលើ ។ មន្ត្រីដដែលបានប្រាប់ថា ជនសង្ស័យទាំង២នាក់នេះ ត្រូវបានមន្ត្រីជំនាញផ្នែកប្រឆាំងគ្រឿងញៀន នៃអធិការស្រុកដាក់ការសង្ស័យថា «ជាមុខសញ្ញាជួញដូរគ្រឿងញៀនយ៉ាងសកម្មដែលធ្វើសកម្មភាពនៅក្នុងមូលដ្ឋាន ហើយមន្ត្រីជំនាញបានតាមដានសកម្មជននេះរហូតឈានដល់ការឃាត់ខ្លួនតែម្ដង ថែមទាំងដកហូតបាននូវវត្ថុតាងថ្នាំញៀនមួយចំនួនផង។
យោងតាមរបាយការណ៍បឋមរបស់សមត្ថកិច្ច វត្ថុតាងដែលមន្ត្រីជំនាញដកហូតបានពីជនសង្ស័យមានដូចជាថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន០៤ថង់, ជញ្ជីងសម្រាប់ថ្លឹងគ្រឿងញៀនចំនួន០១, សម្ភារ:សំរាប់វិចខ្ចប់គ្រឿងញៀនលក់មួយចំនួន, ទូរស័ព្ទដៃចំនួន០៣គ្រឿង (ខូចមួយគ្រឿង), កាំបិត០១ដើម, ប្រាក់ដុល្លារចំនួន៩៥ដុល្លារ , ប្រាក់ថៃចំនួន៩,២៣០បាត និង ប្រាក់ខ្មែរចំនួនជាង៣,៤លានរៀល។
មន្ត្រីជំនាញនិយាយថា វត្ថុតាង (គ្រឿងញៀន) ត្រូវបានរកឃើញ ជាក់ស្ដែងនៅលើខ្លួនជនសង្ស័យ រីឯវត្ថុតាងដទៃទៀត ត្រូវមន្ត្រីជំនាញឆែករកឃើញនៅក្នុងផ្ទះ ដែលជននេះបានលាក់ទុក ។ ជាមួយគ្នានោះ ជនសង្ស័យក៏បានសារភាពទទូលស្គាល់កំហុសដែលខ្លួនបានប្រព្រឹត្ត ហើយក៏ទទូលស្គាល់វត្ថុតាងនានាដែលសមត្ថកិច្ចបានដកហូតដែរ។ ពេលនេះ មន្ត្រីជំនាញ កំពុងសួរនាំជនសង្ស័យទាំង២នាក់ ដើម្បីកសាងសំណុំរឿងចាត់ការតាមនីតិវិធីហើយ។
មានការគូសបញ្ជាក់ថា មួយរយ:ពេលចុងក្រោយនេះ កម្លាំងជំនាញផ្នែកប្រឆាំងគ្រឿងញៀន នៃអធិការស្រុកសំពៅលូន ហាក់បានប្រឹងប្រែងយ៉ាងខ្លាំងក្នុងការបង្ក្រាបបទល្មើសគ្រឿងញៀន និងបានឃាត់ខ្លួនជនប្រព្រឹត្តបានជាច្រើននាក់ផងដែរបញ្ជូនទៅតុលាការ។ ប៉ុន្តែយ៉ាងណា ក្រុមសង្គមងងិតដទៃទៀត នៅតែបន្តធ្វើសកម្មភាព បើទោះជាសមត្ថកិច្ខបង្ក្រាបបានជាបន្តបននទាប់ក្ដី៕
ចែករំលែកព័តមាននេះ