ខេត្តតាកែវ ៖ បើតាមសេចក្តីរាយការណ៍បឋមបានឱ្យដឹងថា មួយប៉ប្រិចភ្នែកប៉ុណ្ណោះ ផ្ទះឈើប្រក់ស័ង្កសីសង់នៅក្បែរៗគ្នាចំនួន៣ខ្នងត្រូវភ្លើងឆាបឆេះម៉ត់គ្មានសល់ សូម្បីទ្រព្យសម្បត្តិក៏មិនអាចប្រមូលយកចេញបាននោះទេ បង្កឱ្យមានការភ្ញាក់ផ្អើលគ្រប់ៗគ្នា ។ ហេតុការណ៍នេះកើតឡើងកាលពីវេលាម៉ោង៦និង៣០នាទីព្រឹក ថ្ងៃទី១១…
ខេត្តតាកែវ ៖ បើតាមសេចក្តីរាយការណ៍បឋមបានឱ្យដឹងថា មួយប៉ប្រិចភ្នែកប៉ុណ្ណោះ ផ្ទះឈើប្រក់ស័ង្កសីសង់នៅក្បែរៗគ្នាចំនួន៣ខ្នងត្រូវភ្លើងឆាបឆេះម៉ត់គ្មានសល់ សូម្បីទ្រព្យសម្បត្តិក៏មិនអាចប្រមូលយកចេញបាននោះទេ បង្កឱ្យមានការភ្ញាក់ផ្អើលគ្រប់ៗគ្នា ។ ហេតុការណ៍នេះកើតឡើងកាលពីវេលាម៉ោង៦និង៣០នាទីព្រឹក ថ្ងៃទី១១ ខែកុម្ភៈ ឆ្នាំ២០២០ ស្ថិតនៅភូមិចក សង្កាត់រកាក្នុង ក្រុងដូនកែវ ខេត្តតាកែវ។
សេចក្តីរាយការណ៍បន្តថា ម្ចាស់ផ្ទះខាងលើនេះ ទី១-ឈ្មោះ ឆូវ វាត ភេទប្រុស មានប្រពន្ធឈ្មោះ កែន សឿន មានផ្ទះឈើ៦គុណ៥ម៉ែត្រ ទី២-ឈ្មោះ ទូច សុង មានផ្ទះឈើ៥គុណ៦ និងម្ចាស់ផ្ទះទី៣-ឈ្មោះ ឈឹត ឧត្តម មានប្រពន្ធឈ្មោះ ទូច សាមឌី មានផ្ទះឈើ៥គុណ៦ដូចគ្នា។
បើតាមលោក កប សុខុម អធិការងនគរបាលក្រុងដូនកែវ បានឱ្យដឹងថា ករណីខាងលើនេះដែរ ម្ចាស់ផ្ទះបានប្រាប់ថា បណ្តាលមកពីទុស្សេខ្សែចរន្តអគ្គិសនីក្នុងផ្ទះ ក៏បង្កើតទៅជាភ្លើងឆេះរាលដាលតៗគ្នាអស់ផ្ទះ៣ខ្នងទាំងស្រុងតែម្តង ហើយខាងយើងទទួលបានព័ត៌មានយឺតពេក ទើបមិនអាចជួយអន្តរាគមន៍សង្គ្រោះផ្ទះទាំង៣ខ្នងនេះបាន។ ម្យ៉ាងទៀត អគ្គិភ័យនេះបានកើតឡើងយ៉ាងលឿនរហ័សជាទីបំផុត ព្រោះផ្ទះទាំង៣ខ្នងនេះធ្វើអំពីឈើ។
លោកអធិការរងបន្តថា ទោះបីជាបែបណា សមត្ថកិច្ចបានប្រើប្រាស់រថយន្តពន្លត់អគ្គិភ័យបាញ់ទឹកអស់៣រថយន្ត ដើម្បីគ្រប់គ្រងស្ថានការណ៍នេះមិនឲ្យឆេះរាលដាលបន្តទៀត ប៉ុន្តែផ្ទះទាំង៣ខ្នងខាងលើនោះ បានឆេះខ្ទេចអស់ទៅហើយ។ ចំពោះទ្រព្យសម្បត្តិដែលខូចខាតសរុបមាន ម៉ូតូ២គ្រឿង និងទ្រព្យសម្បត្តិមួយចំនួនផងដែរ។
នគរបាលក្រុងដូនកែវ ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ មុននឹងចេញក្រៅផ្ទះប្រកបរបររកទទួលទាននោះ សូមពិនិត្យភ្លើងទៀន ភ្លើងធូប ភ្លើងចង្ក្រាន្ត ជាពិសេសចរន្តអគ្គិសនីត្រូវបិទប៉ារ៉ែតភ្លើង ខ្លាចក្រែងទុស្សេខ្សែភ្លើងបង្កជាអគ្គិភ័យដូចករណីខាងលើនេះជាយថាហេតុ ព្រោះតែរដូវនេះជារដូវក្តៅ ដូច្នេះវាមានលក្ខណៈងាយស្រួលដល់អគ្គិភ័យឆាបឆេះបំផុត ហើយត្រូវមានការប្រុងប្រយ័ត្នទាំងអស់គ្នា។ (កែសម្រួលដោយ ៖ បុប្ផា)
ចែករំលែកព័តមាននេះ