រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា សម្តេចបានស្នើសុំដល់ប្រធានាធិបតីកូរ៉េ ដើម្បីសាងសង់ស្ពានអរិយក្សដែលកម្ពុជា និងកូរ៉េមិនទាន់មានស្ពានមិត្តភាពកម្ពុជា កូរ៉េនោះទេ ។ ថ្លែងក្នុងពិធីបើកការដ្ឋានស្តា និងសាងសង់ផ្លូវលេខ២ និងលេខ២២ ប្រវែងសរុបជាង៧២គីឡូម៉ែត្រ នាព្រឹក ថ្ងៃទី១១ ខែកុម្ភៈថា ខ្ញុំបាននិយាយផ្ទាល់ជាមួយលោក មូនជេ អ៊ីនប្រធានាធិបតីសាធារណរដ្ឋកូរ៉េតែម្តង ។
ខ្ញុំថា ឯកឧត្តមកម្ពុជាមានស្ពានមិត្តភាពជប៉ុន ស្ពានមិត្តភាពកម្ពុជា ចិន ក៏ប៉ុន្តែនៅមិនទាន់មានស្ពានមិត្តភាពកម្ពុជា កូរ៉េ ។ សម្តេចបានបញ្ជាក់ថា ៖«ពេលនោះប្រធានអង្គការបានទៅមើលកន្លែងនឹងសាងសង់ស្ពានតែម្តងព្រោះថា ឥឡូវនឹងតំបន់អរិយក្ស ជាតំបន់ដែលអភិវឌ្ឍន៍ ។ កូរ៉េបានផ្តល់កម្ចីហិរញ្ញប្បទាន មកកម្ពុជាឆ្នាំ២០១៩ -២០២៣ ចំនួន៧០០លានដុល្លារ ។ អីញ្ចឹងវាចំណុះដល់អាទិភាពដល់យើងដើម្បីស្នើសុំបែងចែកថវិការនៃឥណទានសម្រាប់ផ្តល់កម្ពុជាសម្រាប់គម្រោងស្ពាននឹងតែម្តង» ។
ជាមួយគ្នានោះដែរ សម្តេចតេជោបានលើកឡើងថា បើប្រជាកសិករធ្វើការផលិតកម្មករបានផលហើយ គ្មានផ្លូវដឹកជញ្ជូនទេ មិនអាចដោះស្រាយបានទេ សម្រាប់ជីវភាពប្រជាជន ។ សម្តេចតេជោក៏បានឲ្យដឹងថា ផ្លូវដែលសម្ពោធបើកដំណើរថ្ងៃនេះ មានជាង៧២គីឡូម៉ែត្រ ដោយក្នុងនោះមានផ្លូវជាតិលេខ២ មានចំនួនប្រវែង៦២.៥៦គីឡូម៉ែត្រ និងផ្លូវលេខ២២ មានចំនួនប្រវែង៩.៦១គីឡូម៉ែត្រ ដោយត្រូវចំណាយប្រាក់ហិរប្បទានរបស់សាធារណរដ្ឋកូរ៉េចំនួន៥៦លាន១សែនដុល្លារអាមេរិក ។ ប៉ុន្តែថវិការបដិភាពរបស់រាជរដ្ឋាភិបាលមានចំនួន១៩លាន ១សែន៦ម៉ឺនដុល្លារ ប៉ុន្តែបានចេញសាច់ប្រាក់ចំនួន១១លាន១សែន៦ម៉ឺន ចំណែកពន្ធស្មើ១២ភាគរយ មិនទាន់ចេញសាច់ប្រាក់ទេ ។
ការសាងសង់នេះត្រូវបានលើកលែងពន្ធ ។ សម្តេចបន្តថា បើរាជរដ្ឋាភិបាលគ្មានសាច់ប្រាក់ផ្ទាល់នោះទេ ក៏ផ្លូវនេះមិនអាចសាងសង់បាននោះទេ ៕
ចែករំលែកព័តមាននេះ