រាជធានីភ្នំពេញ៖ ខេត្តព្រះសីហនុគឺជាអាចជាខេត្តមាត់សមុទ្រមួយក្នុងចំណោមខេត្តមាត់សមុទ្រផ្សេងៗទៀតនឿកម្ពុជាដែលអាចដើរតួជាចលករក្នុងការជំរុញកំណើនសេដ្ឋកិច្ចជាតិនៅក្នុងរយៈពេល៥ឆ្នាំខាងមុខ បន្ទាប់រាជរដ្ឋាភិបាលបញ្ចប់នៃការរៀបចំផែនការមេសម្រាប់អភិវឌ្ឍន៍ខេត្តមួយនេះនាពេលដ៏ខ្លីខាងមុខនេះ។
ទន្ទឹមនឹងការរៀបចំផែនការមេរបស់រាជរដ្ឋាភិបាលកំពុងដំណើរបណ្តើរៗនោះ ខេត្តព្រះសីហនុដែលកំពុងមានកាស៊ីណូនិងសណ្ឋាគារធំៗវិនិយោគដោយវិនិយោគិនចិននារយៈពេលប៉ុន្មាន ៤ ទៅ ៥ ខែចុងក្រោយនេះគឺបានរងផលប៉ះពាល់មួយចំនួនតាមរយៈការចាកចេញរបស់ជនជាតិចិនក្រោយពីរាជរដ្ឋាភិបាលសម្រេចបិទនូវល្បែងអនឡាញ ។
យ៉ាងណាមិញ ក្រោយការចាកចេញយ៉ាងគំហុករបស់ជនជាតិចិននោះ ម្ចាស់ស្រុកមួយចំនួនក៏បានលង់ប្រាណវណ្ឌ.ក នឹងបំណុលធនាគារដោយសារតែបានខ្ចីប្រាក់យកមកសាងសង់កន្លែងជួលស្នាក់នៅឲ្យចិន ដែលខ្លះសង់មិនទាន់រួចរាល់ផង ស្រាប់តែជនជាតិចនចេញបានចាកចេញយ៉ាងច្រើនពីខេត្តព្រះសីហនុ ខណៈម្ចាស់អចលទ្រព្យផ្សេងទៀត មិនបានទទួលនូវប្រាក់ឈ្នួលពីចិន ដោយជនជាតិចិនទាំងនោះបានចាកចេញស្ងាត់ៗ ឬខ្លះមិនទាំងបង់ថ្លៃទឹក-ភ្លើងនោះទេ ។
ខណៈគ្រប់គ្នាហាក់កំពុងប្រហោងពោះនឹងបំណុលធនាគារ ឬម្ចាស់មីក្រូហិរញ្ញវត្ថុនោះ រាជរដ្ឋាភិបាលកម្ពុជាក៏បាននឹងកំពុងរុញការអភិវឌ្ឍន៍នូវហេដ្ឋារចនាសម្ព័ន្ធនៅខេត្តព្រះសីហនុឱ្យបានប្រសើរឡើងវិញ ក្នុងគោលបំណងទាក់ទាញអ្នកវិនិយោគសក្តានុពលដើម្បីចូលមកវិនិយោគនិងចូលរួមជំរុញកំណើនសេដ្ឋកិច្ចជាតិក្នុងរយៈពេលមធ្យមនិងរយៈពេលវែង ខណៈជនជាតិចិនមួយចំនួនដែលបានចេញពីទឹកដីកម្ពុជានិងខេត្តព្រះសីហនុកន្លងមកគឺពាក់ព័ន្ធតែរឿងបិទល្បែងអនឡាញប៉ុណ្ណោះ ហើយថ្នាក់ដឹកនាំប្រទេសនៅតែមានសុទិដ្ឋិនិយមថាវិនិយោគិនល្អៗពីចិននឹងចូលមកវិនិយោគបន្ថែមទៀតនៅកម្ពុជា ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថ្មីៗនេះថា ស្ថានភាពនៃការអភិវឌ្ឍន៍នៅខេត្តព្រះសីហនុ នាពេលកន្លងមក ការអភិវឌ្ឍន៍វិស័យសំណង់បានហក់ឡើងយ៉ាងលឿន ក្នុងនោះបន្ទាប់ពីរាជរដ្ឋាភិបាលបិទហ្គេមលើប្រព័ន្ធអនឡាញ វិស័យនេះបានរួមជាមួយវិស័យផ្សេងៗទៀត បានថមថយចុះមកវិញ។
នៅជុំវិញស្ថានភាពនេះ រាជរដ្ឋាភិបាលបានកំពុងរៀបចំផែនការមេសម្រាប់អភិវឌ្ឍន៍ខេត្តព្រះសីហនុ ឱ្យទៅជាខេត្តតំបន់សេដ្ឋកិច្ចពិសេស ដែលមានលក្ខណៈដូចជាទីក្រុងស៊ិនជិន នៃប្រទេសចិន ដើម្បីប្រែក្លាយទៅជា ទីក្រុងឧស្សាហកម្ម និងជាទីក្រុងសេវាកម្ម ក្នុងផ្នែកបច្ចេកវិទ្យា និងទេសចរណ៍។
លោករដ្ឋលេខាប្រចាំការរូបនេះបានបញ្ជាក់ថា បច្ចុប្បន្នខេត្តព្រះសីហនុ រាជរដ្ឋាភិ
បាលបានកំពុងរៀបចំផែនការមេ ឱ្យខេត្តមួយនេះ ទៅជាតំបន់ប៉ូលសេដ្ឋកិច្ចពិសេសពហុបំណង ដែលជាប៉ូលសេដ្ឋកិច្ចមួយយ៉ាងខ្លាំង, និងជាប៉ូលសេដ្ឋកិច្ចមួយដែល បម្រើដល់ការធ្វើពាណិជ្ជកម្ម ក្នុងការនាំចេញ-ចូល នៃការផ្គង់ផ្គងសេដ្ឋកិច្ចទាំងមូល និងជាក្បាលនាគនៃច្រកសេដ្ឋកិច្ច របស់កម្ពុជាខ្លួនឯង បន្ទាប់ពីច្រកនៃការនាំចេញទៅប្រទេសវៀតណាម និងប្រទេសថៃ ។
លោក វង្សី វិស្សុត បានគូសបញ្ជាក់ថា «ការអភិឌ្ឍន៍ខេត្តព្រះសីហនុនេះ គឺជា គម្រោងអភិវឌ្ឍន៍ថ្នាក់ជាតិ ដែលមានឧបនាយករដ្ឋមន្ត្រី២រូបទទួលខុសត្រូវដល់ការអភិឌ្ឍន៍។ ជាក់ស្តែងមកដល់ បច្ចុប្បន្នរាជរដ្ឋាភិបាលបានចំណាយថវិការជាច្រើនរួចមកហើយ សម្រាប់ការអភិវឌ្ឍន៍ហេដ្ឋារចនាសម្ព័ន្ធ ដូចជាការកសាងផ្លូវ លូទឹក ប្រឡាយ ភ្លើង និងកិច្ចការពារឆ្នេរសមុទ្រជាដើម ដើម្បីជម្រុញឲ្យវិស័យឧស្សាហកម្មកើតឡើង ប្រកបដោយសក្តានុពល រួមជាមួយវិស័យទេសចរបានដំណើរការល្អ និងធានាជាទីក្រុងដែលរស់នៅបាន និងគួរចង់ ឱ្យរស់នៅផងដែរ »៕ កែសម្រួលដោយ ៖សុឃាក់
ចែករំលែកព័តមាននេះ