ខេត្តកំពង់ស្ពឺ ៖ យោងតាមប្រភពព័ត៌មានពីក្រុមគ្រួសារអ្នករកស៊ីទិញលក់ម៉ូតូមួយកន្លែងបានឲ្យដឹងនៅរសៀលថ្ងៃទី១០ ខែកុម្ភៈ ឆ្នាំ២០២០នេះថា សមាជិកគ្រួសារគាត់ ព្រោះតែចង់ធ្វើការសហការជាមួយសមត្ថកិច្ច បែរជាត្រូវសមត្ថកិច្ចចាប់ខ្លួនទៅវិញ។
ប្រភពបានឱ្យដឹងថា ការចាប់ខ្លួននេះ ធ្វើឡើងកាលពីថ្ងៃទី 6 ខែកុម្ភៈ ឆ្នាំ2020 នៅភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ។
ប្រភពបានឱ្យដឹងថា អ្នកដែលត្រូវសមត្ថកិច្ចឃាត់ខ្លួនជាអ្នករកស៊ីទិញលក់ម៉ូតូមួយកន្លែងយីហោ «យឿន វ៉ាន់ដេត» មុខរបររកស៊ីទិញលក់ម៉ូតូ គាត់ត្រូវបានសមត្ថកិច្ចឃាត់ខ្លួនចោទប្រកាន់ពីបទទទួលផលចោរកម្ម។
ប្រភពបានឱ្យដឹងថា មុនពេលកើតហេតុ កាលពីម៉ោង9ព្រឹកថ្ងៃទី6 ខែកុម្ភៈ ឆ្នាំ2020 មានជនសង្ស័យមួយរូប បានយកម៉ូតូមួយគ្រឿងម៉ាកហុងដា សេ125 ស៊េរីឆ្នាំ2018 ពណ៌ខ្មៅពាក់ស្លាកលេខកំពង់ស្ពឺ 1i 3378 ដោយមិនមានឯកសារអ្វីទាំងអស់ មកបញ្ចាំនៅកន្លែងទិញលក់ម៉ូតូរបស់គាត់ ។ ដោយមានការសង្ស័យរូបគាត់ យឿន វ៉ាន់ដេត ក៏បានរាយការណ៍ជូនសមត្ថកិច្ចនគរបាលក្រុងច្បារមន ឲ្យចុះមកត្រួតពិនិត្យ។
ក្រោយពីសមត្ថកិច្ចទទួលសេចក្តីរាយការណ៍ពីម្ចាស់ផ្ទះទីតាំងលក់ម៉ូតូរួចមក សមត្ថកិច្ចនគរបាលក្រុងច្បារមន ក៏បានធ្វើការឃាត់ខ្លួនជនសង្ស័យមួយរូបឈ្មោះ ហេង ហុង ភេទប្រុស អាយុ35ឆ្នាំ ហើយជនសង្ស័យក៏បានឆ្លើយសារភាពផងដែរថា ម៉ូតូខាងលើរូបគេបានលួចកាច់.កពីខាងមុខគ្លីនិកពេទ្យឯកជនមួយកន្លែង ខាងត្បូងផ្សារកំពង់ស្ពឺ ពិតប្រាកដមែន។
ដោយឡែកប្រភពពីសមត្ថកិច្ចបានឲ្យដឹងថា កាលពីថ្ងៃទី6 កុម្ភៈ ឆ្នាំ2020 មានករណីបាត់ម៉ូតូមួយគ្រឿង ស៊េរីឆ្នាំ 2018 ពាក់ផ្លាកលេខកំពង់ស្ពឺ 1i 3378 ពិតប្រាកដមែន ដោយមានម្ចាស់ឈ្មោះ វុធ ស្រី ភេទស្រី អាយុ23ឆ្នាំ មានទីលំនៅភូមិរឿងពើង ឃុំស្គុះ ស្រុកសំរោងទង ខេត្តកំពង់ស្ពឺ មានមុខរបរជាកម្មការិនីរោងចក្រ។
សមត្ថកិច្ចបន្តថា មុនពេលកើតហេតុ ម្ចាស់ម៉ូតូ និងប្ដីបានជិះម៉ូតូយកកូនទៅពិនិត្យឈាមនៅគ្លីនិកឯកជនខាងត្បូងផ្សារកំពង់ស្ពឺ ក្នុងភូមិពាណិជ្ជកម្ម សង្កាត់រកាធំ ក្រុងច្បារមនក្រោយទទួលពាក្យបណ្ដឹងពីជនរងគ្រោះរួចមក សមត្ថកិច្ចបានធ្វើការស្រាវជ្រាវដោយមានការសហការពីម្ចាស់ទីតាំងលក់ម៉ូតូ យឿន វ៉ាន់ដេត និងឈានដល់ការឃាត់ខ្លួនជនសង្ស័យមួយរូបឈ្មោះ ហេង ហុង ភេទប្រុស អាយុ35ឆ្នាំ មានទីលំនៅភូមិបឹងទន្លាប់ ឃុំវល្លិសរ ស្រុកសំរោងទង។ បន្ទាប់ពីឃាត់ខ្លួនជនសង្ស័យក៏បានឆ្លើយសារភាពថា រូបគេពិតជាបានធ្វើសកម្មភាពលួចម៉ូតូដែលមានភិនភាគដូចខាងលើពិតប្រាកដមែន ហើយត្រូវបានសមត្ថកិច្ចក៏ឃាត់ខ្លួន ពេលយកម៉ូតូនេះទៅបញ្ចាំដោយគ្មានឯកសារសម្គាល់។
បើតាមប្រភពពីសាច់ញាតិរបស់ម្ចាស់ទីតាំងទិញលក់ម៉ូតូយីហោ «យឿន វ៉ាន់ដេត» បានប្រាប់ថា ម្ចាស់ផ្ទះជាអ្នករាយការណ៍ទៅឲ្យសមត្ថកិច្ចឃាត់ខ្លួនជនសង្ស័យ តែចុងក្រោយម្ចាស់ផ្ទះត្រូវបានសមត្ថកិច្ចឃាត់ខ្លួនយកទៅកាន់ស្នងការដ្ឋាននគរបាលខេត្ត ដោយនៅយប់នោះ គេបានទារប្រាក់ចំនួន 7000 ដុល្លារជាថ្នូរនឹងការដោះលែងមកវិញ តែដោយសាច់ញាតិរបស់ម្ចាស់ទីតាំងទិញលក់ម៉ូតូយីហោ «យឿន វ៉ាន់ដេត» មើលឃើញពីភាពមិនប្រក្រតីនេះ សាច់ញាតិមួយរូបក៏បានរាយការណ៍ទៅថ្នាក់លើនៅអគ្គស្នងការនគរបាលជាតិ ដើម្បីចង់ដឹងថា តើសមតកិច្ចធ្វើនេះត្រូវ ឬខុស?
ដោយបែករឿងដឹងដល់ថ្នាក់លើ ពេលនោះខាងសមត្ថកិច្ចនគរបាលនៃស្នងការដ្ឋាននគរបាលខេត្តដែលមានលោកឧត្តសេនីយ៍ទោ សម សាមួន ជាស្នងការក៏បានប្រគល់លុយមួយចំនួនមកឱ្យក្រុមគ្រួសាររបស់ម្ចាស់ទីតាំងទិញលក់ម៉ូតូវិញតែមិនគ្រប់ចំចនួនឡើយ។ ចំពោះអ្នកយកលុយត្រូវបានដឹងថា ឈ្មោះសម្រេច នៅការិយាល័យសេដ្ឋកិច្ចខេត្ត។
បើតាមមន្ត្រីនគរបាលមួយរូបបានប្រាប់ក្នុងលក្ខខណ្ឌមិនបញ្ចេញឈ្មោះថា នគរបាលមិនបានទារលុយពីក្រុមគ្រួសារអ្នកទិញលក់ម៉ូតូយីហោ «យឿន វ៉ាន់ដេត» ដូចការលើកឡើងនោះទេ រឿងនេះអាចជាការយល់ច្រឡំរបស់សាច់ញាតិរបស់គាត់។
យ៉ាងណាមិញមជ្ឈដ្ឋានមហាជនឆ្ងល់ថា បន្ទាប់ពីរឿងបែកធ្លាយដល់ថ្នាក់លើរួចមក ម្ចាស់ទីតាំងយីហោ «យឿន វ៉ាន់» ក៏ស្រាប់ត្រូវបានកសាងសំណុំរឿងបញ្ជូនទៅកាន់អយ្យការអមសាលាដំបូងខេត្ត ជាមួយជនសង្ស័យជាអ្នកលួច ដោយចោទប្រកាន់ពីបទទទួលផលចោរកម្ម ខណៈរូបគាត់ជាអ្នករាយការណ៍ទៅសមត្ថកិច្ចឱ្យចុះមកឃាត់ខ្លួនជនសង្ស័យ។
ទោះជាយ៉ាងណានេះជាការរៀបរាប់របស់សាច់ញាតិភាគីថៅកែទិញម៉ូតូតែម្ខាង មិនអាចសុំការពន្យល់ជាក់លាក់ណាមួយពីសមត្ថកិច្ចជំនាញបានឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ