ខេត្តបន្ទាយមានជ័យ ៖ ពិធីបុណ្យមាឃបូជាត្រូវបានរៀបចំធ្វើឡើងនៅប្រាសាទបន្ទាយឆ្មារដោយមានព្រះសង្ឃរាប់រយអង្គ ព្រមទាំងមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋចូលរួមយ៉ាងច្រើនកុះករកាលពីថ្ងៃទី៨ ខែកុម្ភៈ ឆ្នាំ២០២០ នៅឃុំបន្ទាយឆ្មារ ស្រុកថ្មពួក។
លោក អ៊ុំ រាត្រី អភិបាលខេត្តបន្ទាយមានជ័យបានថ្លែងឱ្យដឹងថា ពិធីបុណ្យមាឃបូជានាឆ្នាំ២០២០នេះ រដ្ឋបាលខេត្តបន្ទាយមានជ័យបានរៀបចំធ្វើឡើងនៅប្រាសាទបន្ទាយឆ្មារ ស្រុកថ្មពួក ដោយមានការអញ្ជើញចូលរួមពីលោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តបន្ទាយមានជ័យ និងលោកជំទាវ ម៉ៅ ម៉ាល័យ ព្រមទាំងមន្ត្រីរាជការកងកម្លាំងប្រដាប់អាវុធ និងប្រជាពលរដ្ឋចូលរួមយ៉ាងច្រើនកុះករក្នុងពិធីរាប់បាត្រ។
លោកអភិបាលខេត្តបានបញ្ជាក់ថា រដ្ឋបាលសាលាខេត្តបន្ទាយមានជ័យដែលដឹកនាំរៀបចំដោយលោកជំទាវ ម៉ៅ ម៉ាល័យ បានរៀបចំប្រារព្ធពិធីបុណ្យមាឃបូជាធ្វើនៅប្រាសាទបន្ទាយឆ្មារ ស្រុកថ្មពួក ដើម្បីអោយបងប្អូនប្រជាពលរដ្ឋនិងភ្ញៀវជាតិអន្តជាតិបានស្គាល់និងបានដឹងប្រាសាទប្រវត្តិសាស្ត្រដែលមានក្នុងខេត្តបន្ទាយមានជ័យដូចជា ប្រាសាទបន្ទាយឆ្មារ, ប្រាសាទបន្ទាយទ័ព, ប្រាសាទមេបុណ្យ និងទីទួលប្រាសាទជាច្រើនទៀតនៅស្រុកថ្មពួក។
លោកអភិបាលខេត្តបានបញ្ជាក់ទៀតថា នៅថ្ងៃបញ្ចប់នៃពិធីបុណ្យក៏មានពិធីរាប់បាត្រព្រះសង្ឃជាង៥០០អង្គផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ