រាជធានីភ្នំពេញ ៖ ប្រធានរដ្ឋសាធារណរដ្ឋប្រជាធិបតេយ្យប្រជាមានិតឡាវបានស្នើសុំប្រធានរដ្ឋសភាធ្វើយ៉ាងណាជំរុញឲ្យប្រជាពលរដ្ឋដែលរស់នៅតាមតំបន់ព្រំដែនកម្ពុជា-ឡាវ ធ្វើទំនាក់ទំនងគ្នាកាន់តែមានភាពជិតស្និទ្ធនឹងគ្នា ។ ខណៈធ្វើដំណើរបំពេញទស្សនកិច្ចនៅកម្ពុជា លោក ប៊ុនញ៉ាំង វរជីត (H.E. Mr. Bounnhang VORACHITH) អគ្គលេខាធិការមជ្ឈិមបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ បានជួបសវនាការជាមួ សម្តេច ហេង សំរិន ប្រធានរដ្ឋសភា នារសៀលថ្ងៃទី៩ ខែកុម្ភៈនេះ នៅវិមានរដ្ឋសភា។
ដោយលោកបានសម្តែងការកោតសរសើរចំពោះការរីកច្រើនយ៉ាងខ្លាំងរបស់កម្ពុជានៅក្នុងរយៈពេលចុង ក្រោយនេះ ដែលធ្វើឲ្យកម្រិតជីវភាពរបស់ពលរដ្ឋកាន់តែល្អប្រសើរ ។ លោកប្រធានរដ្ឋសភាបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរទាំងស្ថាប័ននីតិប្បញ្ញត្តិ និងនីតិប្រតិបត្តិ ។ លោកបញ្ជាក់ថា ៖« ដើម្បីឱ្យទំនាក់ទំនងដ៏ល្អជាប្រពៃណីនេះកាន់តែរឹងមាំឡើងពីថ្នាក់លើដល់ថ្នាក់ក្រោម លោកបានស្នើសុំសម្តេចប្រធានរដ្ឋសភា ជំរុញទំនាក់ទំនង ប្រជាពលរដ្ឋប្រទេសទាំងពីរ ពិសេសពលរដ្ឋរស់នៅតាមបន្ទាត់ព្រំដែនឲ្យកាន់តែមានភាពជិតស្និទ្ធគ្នាឡើងក្នុងការកសាងបន្ទាត់ព្រំដែនកម្ពុជា និងឡាវ ជាព្រំដែនសុខ សន្តិភាព និងអភិវឌ្ឍន៍» ។
ក្នុងជំនួបនោះដែរ សម្តេចប្រធានរដ្ឋសភាបានសម្តែងសេចក្តីសោមនស្សរីករាយបំផុត និងសូមស្វាគមន៍យ៉ា ងកក់ក្ដៅចំពោះ ប្រធានរដ្ឋឡាវ ដែលបានអញ្ជើញមកបំពេញ ទស្សនកិច្ច ផ្លូវរដ្ឋ នៅកម្ពុជា។ សម្តេចប្រធានរដ្ឋសភាកម្ពុជាក៏ បានលើកឡើងថា ទស្សនកិច្ចនេះ នឹងជំរុញបន្ថែមទៀត ក្នុងការបន្តរឹតបន្តឹង ទំនាក់ទំនងចំណងមិត្តភាព សាមគ្គីភាពជាប្រពៃណីយ៍ និងកិច្ចសហប្រតិ បត្តិការ លើគ្រប់វិស័យ រវាងបក្ស រដ្ឋ រដ្ឋាភិបាល និងប្រជាជន នៃប្រទេសទាំងពីរ កម្ពុជា-ឡាវ ឲ្យកាន់តែរឹងមាំ និងរីកចម្រើន ទ្វេដងទៀត។ សម្តេចបានអបអរសាទរចំពោះសមិទ្ធផលដ៏ធំធេងដែលថ្នាក់ដឹកនាំ និងប្រជាជនឡាវ សម្រេចបានក្នុងការកសាង អភិវឌ្ឍ សេដ្ឋកិច្ចសង្គម រីកចម្រើនយ៉ាងឆាប់រហ័ស ហើយជីវភាពរ ស់នៅរបស់ប្រជាជនឡាវ កាន់តែល្អប្រសើរ ។
សូមជម្រាថា តបតាមការអញ្ជើញរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ឯកឧត្តម ប៊ុនញ៉ាំង វរជីត (H.E. Mr. Bounnhang VORACHITH) អគ្គលេខាធិការមជ្ឈិមបក្សប្រជាជនបដិវត្តន៍ឡាវ និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ បានដឹកនាំគណៈប្រតិភូមកបំពេញទស្សនកិច្ចផ្លូវរដ្ឋនៅកម្ពុជា រយៈពេលពីរថ្ងៃ គឺថ្ងៃទី០៩ និងថ្ងៃទី១០ ខែកុម្ភៈ ឆ្នាំ២០២០ ៕ កែសម្រួលដោយ ៖ សុឃាក់
ចែករំលែកព័តមាននេះ