ខេត្តកណ្ដាល ៖ ជនសង្ស័យស្ទាវ២នាក់ពិតជាក្លាហានខ្លាំងណាស់ហ៊ានជិះម៉ូតូដេញតាមឆក់យកទូរស័ព្ទពីនារីចាក់បទចម្រៀងខារ៉ាអូរខេម្នាក់ដល់បន្ទប់ជួលដែលនាងស្នាក់នៅ ហើយត្រូវបាននាងស្រែកថា «ចោរៗ» បង្កឲ្យមានការភ្ញាក់ផ្អើលទើបអ្នកភូមិនាំគ្នាដេញតាមចាប់បានប្រគល់ជូននគរបាលសាកសួរ និងកសាងសំណុំរឿងចាត់ការតាមច្បាប់តែម្ដង ។ ហេតុការណ៍នេះបានកើតឡើងកាលពីវេលាម៉ោង១និង ៤៨នាទីយប់រំលងអធ្រាត្រឈានចូលថ្ងៃទី០៨ ខែកុម្ភៈ ឆ្នាំ២០២០ នៅតាមផ្លូវជាតិលេខ៥១ ស្ថិតនៅក្នុងភូមិព្រៃសំរោង ឃុំដំណាក់អំពិល ស្រុកអង្គស្នួល ខេត្តកណ្តាល ។
ជនសង្ស័យខាងលើនោះម្នាក់ឈ្មោះ សាក់ ផៃរ័ត្ន ភេទប្រុស អាយុ១៨ឆ្នាំ ជនជាតិខ្មែរ មុខរបរចុងភៅ មានទីលំនៅក្នុងភូមិអណ្តូងទឹក ឃុំលំហាច ស្រុកអង្គស្នួល ខេត្តកណ្តាល(ជាអ្នកបើកម៉ូតូ) និងម្នាក់ទៀតឈ្មោះ រស់ មករា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដមានទីលំនៅក្នុងភូមិឧកញ៉ាភេព ឃុំត្រពាំងគង ស្រុកសំរោងទង ខេត្តកំពង់ស្ពឺ(ជាអ្នកជិះពីក្រោយហើយក៏ជាអ្នកឆក់ទូរស័ព្ទដែរ) ។
ចំណែកស្ត្រីរងគ្រោះឈ្មោះ មុី វិច្ឆិកា ហៅរីណា អាយុ១៧ឆ្នាំ ជនជាតិខ្មែរ មុខរបរអ្នកចាក់បទភ្លេង និងចម្រៀងខារ៉ាអូខេ ស្នាក់នៅក្នុងភូមិព្រៃសំរោង ឃុំដំណាក់អំពិល ស្រុកអង្គស្នួល ខេត្តកណ្តាល រងរបួសរលាត់ជង្គង់ខាងឆ្វេងដោយសារដួលពេលដែលជនសង្ស័យឆក់ដណ្ដើមយកទូរស័ព្ទ ។
នគរបាលបានដកហូតយកបានម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៦ ពណ៍ខ្មៅ គ្មានផ្លាកលេខ១គ្រឿង ដែលជាមធ្យោបាយធ្វើសកម្មភាព, ទូរស័ព្ទដៃចំនួន៣គ្រឿង ក្នុងនោះមានម៉ាកណូកគាចុចពិល១គ្រឿង ម៉ាក OPPO (A5S) ចំនួន០២គ្រឿង ក្នុងនោះជារបស់ជនរងគ្រោះ១គ្រឿង ។
តាមប្រភពព័ត៌មានបានឲ្យដឹងថា នៅមុនពេលកើតហេតុនាងរងគ្រោះបានដើរចេញពីហាងខារ៉ាអូខេ« ជួច ហេង »ត្រឡប់ទៅកាន់បន្ទប់ផ្ទះជួលដោយធ្វើដំណើរតាមផ្លូវជាតិលេខ៥១ លុះពេលទៅដល់បន្ទប់ជួលស្រាប់តែជនសង្ស័យជិះម៉ូតូទៅដល់ឆក់ទូរស័ព្ទបណ្ដាលឲ្យនាងដួលរួចជិះគេចខ្លួន ខណៈនោះនាងបានស្រែកថាចោរៗបង្កឲ្យមានការភ្ញាក់ផ្អើលហើយអ្នកភូមិ និងអ្នកដំណើរតាមផ្លូវ ជួយដេញតាមចាប់បានភ្លាមៗបន្ទាប់មកបាននាំទៅប្រគល់ជូននគរបាលដើម្បីសួរនាំ និងចាត់ការតាមច្បាប់តែម្ដង ៕
កែសម្រួលដោយ ៖ សំណាង
ចែករំលែកព័តមាននេះ