រាជធានីភ្នំពេញ ៖ កាលពីវេលារសៀលថ្ងៃទី៩ ខែកុម្ភៈ ឆ្នាំ២០២០ កម្លាំងអាជ្ញាធរចម្រុះខណ្ឌច្បារអំពៅបានបើកការចុះបង្ក្រាបទីតាំងល្បែងស៊ីសង ( ចាក់បាល់តាមប្រព័ន្ធអុីនធើរណេត ) មួយកន្លែង…
រាជធានីភ្នំពេញ ៖ កាលពីវេលារសៀលថ្ងៃទី៩ ខែកុម្ភៈ ឆ្នាំ២០២០ កម្លាំងអាជ្ញាធរចម្រុះខណ្ឌច្បារអំពៅបានបើកការចុះបង្ក្រាបទីតាំងល្បែងស៊ីសង ( ចាក់បាល់តាមប្រព័ន្ធអុីនធើរណេត ) មួយកន្លែង ស្ថិតនៅចំណុចផ្ទះលេខ111D តាមបណ្តោយផ្លូវលេខ៣៥១ ក្នុងភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ ។
ប្រតិបត្តិការចុះបង្ក្រាបខាងលើនេះធ្វើឡើងដោយលោក ហ៊ត គឹមនី អភិបាលរងខណ្ឌច្បារអំពៅ និងមានការសម្របសម្រួលនីតិវិធីច្បាប់ដោយលោក ទេព សុវិត្ថ ក្រឡាបញ្ជីក្រុងភ្នំពេញ តំណាងលោក ហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ជាលទ្ធផលនៅក្នុងការចុះបង្ក្រាបខាងលើនេះ កម្លាំងអាជ្ញាធរឃាត់ខ្លួនមនុស្សចំនួន៧នាក់ និងដកហូតបានសម្ភារៈមួយចំនួនធំមានដូចជា កុំព្យូទ័រចំនួន១៦គ្រឿង, ទូរទស្សន៍១៥គ្រឿង, តុ៨, កៅអីជ័រ១០, កង្ហារ៣, ម៉ូតូ១០គ្រឿង និងក្រដាសភ្នាល់បាល់និងបុងចាក់ភ្នាល់បាល់មួយចំនួនធំផងដែរ ។
មនុស្សទាំង៧នាក់ដែលត្រូវឃាត់ខ្លួនរួមមាន ១-ឈ្មោះម៉េង លី ភេទប្រុស អាយុ២០ឆ្នាំ ២-ឈ្មោះ សេង ហឿន ភេទប្រុស អាយុ២៤ឆ្នាំ ៣-ឈ្មោះ ហុង ហេង ភេទប្រុស អាយុ៣២ឆ្នាំ មុខរបរលក់កាហ្វេ ។ ទាំង៣នាក់ស្នាក់នៅភូមិតាងៅ សង្កាត់និរោធ ខណ្ឌច្បារអំពៅ ។ ៤-ឈ្មោះ សៀវ ម៉ិញ ភេទប្រុស អាយុ៣០ឆ្នាំ ជនជាតិវៀតណាម មុខរបរចាក់សាក់ ស្នាក់នៅភូមិព្រះពន្លា សង្កាត់និរោធ ខណ្ឌច្បារអំពៅ ៥-ឈ្មោះ ទុយ អឿន ភេទប្រុស អាយុ៤០ឆ្នាំ មុខរបររត់តុ ស្នាក់នៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ៦-ឈ្មោះ ហេង វិចិត្រ ភេទប្រុស អាយុ៥០ឆ្នាំ ស្នាក់នៅភូមិត្នោតជ្រុំ២ សង្កាត់បឹងទំពន់២ ខណ្ឌមានជ័យ និង៧-ឈ្មោះ តាំង កំសត់ ភេទប្រុស អាយុ៤២ឆ្នាំ មុខរបររត់ម៉ូតូឌុប ស្នាក់នៅភូមិសំបួរ សង្កាត់ដង្កោ ខណ្ឌដង្កោ ។
ក្រោយការឃាត់ខ្លួន មនុស្សទាំង៧នាក់ត្រូវបានបញ្ជូនទៅកាន់អធិការដ្ឋាននគរបាលខណ្ឌច្បារអំពៅដើម្បីចាត់ការបន្តនីតិវិធី ។
តាមប្រភពព័ត៌មានបានអោយដឹងថា ការចុះបង្ក្រាបគឺធ្វើឡើងក្រោមបញ្ជារផ្ទាល់របស់លោកចេង មុនីរ៉ា អភិបាលខណ្ឌច្បារអំពៅ បន្ទាប់ពីលោកអភិបាលទទួលបានសេចក្តីរាយការណ៍ពីប្រជាពលរដ្ឋ ក៏បញ្ជាឱ្យកម្លាំងចម្រុះចុះបង្ក្រាបជាក់ស្តែងតែម្តង ។
ជួបសម្ភាសន៍តាមរយៈទូរស័ព្ទជាមួយកោះសន្តិភាព នៅព្រឹកថ្ងៃទី១០ កុម្ភៈនេះ លោកវរសេនីយ៍ទោ ម៉ៅ សឿត អធិការរងនគរបាលខណ្ឌទទួលផែនព្រហ្មទណ្ឌ បានឱ្យដឹងថា មនុស្សចំនួន២នាក់ ក្នុងចំណោម៧នាក់ដែលបានឃាត់ខ្លួន ត្រូវបានអនុញ្ញាតឱ្យត្រឡប់ទៅផ្ទះវិញនៅយប់ថ្ងៃឃាត់ខ្លួន ដោយសារហេតុផល ពួកគេទាំង២នាក់មានជំងឺប្រចាំកាយធ្ងន់ធ្ងរ ហើយការអនុញ្ញាតឱ្យពួកគេទាំង២នាក់ត្រឡប់ទៅផ្ទះវិញនោះ ក៏មានការឯកភាពពីលោកអភិបាលខណ្ឌ និងព្រះរាជអាជ្ញាររង ហេង ផេង ផងដែរ ។
លោកអធិការរងបានបន្តថា ចំពោះមនុស្សនៅសេសសល់ទាំង៥នាក់ ពួកគេនឹងត្រូវកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីនៅពេលក្រោយទៀត ។ លោកបន្តថា អ្នកទាំង៥នាក់ ក្នុងនោះអាចមានម្នាក់ជាអ្នកមើលការខុសត្រូវនៅទីតាំងល្បែងនោះ ខណៈដែលសមត្ថកិច្ចព្យាយាមសាកសួរដេញដោលយ៉ាងណា ក៏ពួកគេនៅតែឆ្លើយថា ត្រឹមជាអ្នកចូលទៅចាក់បាល់ ពុំមែនជាអ្នកមើលការខុសត្រូវនៅទីនោះឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ