រាជធានីភ្នំពេញ ៖ ក្នុងជំនួពិភាក្សាជាមួយប្រធានរដ្ឋឡាវ សម្តេចតេជោ ហ៊ុន សែន នាយករដ្ឋមន្ត្រីបានប្រាប់ថា សម្តេចចង់ឲ្យសមត្ថកិច្ចនៅតាមតំបន់ព្រំដែនកម្ពុជា-ឡាវ ឧស្សាហ៍លេងកីឡាជាមួយព្រោះថានៅពេលមានបញ្ហាអាចនឹងឆាប់ដោះស្រាយបាន ។
យោងតាមបណ្តាញសង្គម ហ្វេស ប៊ុក សម្តេចបានឲ្យដឹងថា ក្នុងជំនួបពិភាក្សាការងារជាមួយលោក ប៊ុនញ៉ាំង វរជីត ( Bounnhang VORACHITH) អគ្គលេខាបក្ស និងជាប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ នៅវិមានសន្តិភាព កាលពីរសៀលថ្ងៃទី០៩ កុម្ភៈនេះ សម្ដេចតេជោ ហ៊ុន សែន បានឯកភាព និងបានវាយតម្លៃខ្ពស់អំពីទំនងល្អរវាងប្រទេសទាំងពីរ ។
សម្ដេចតេជោ បានលើកទឹកចិត្តធ្វើយ៉ាងណា យើងគម្បីជំរុញឲ្យទំនាក់ទំនងល្អ នេះកាន់តែស៊ីជម្រៅថែមទៀត ស្របតាមអ្វីដែលយើងបានចុះហត្ថលេខាក្នុងនាមជាដៃគូយុទ្ធសាស្ត្រគ្រប់ជ្រុងជ្រោយផង ។ ជាងនេះទៅទៀត សម្ដេចតេជោបានមានបញ្ជាក់ថា៖«គប្បីណាតាមព្រំដែនអាជ្ញាធរដែនដីទាំងសងខាងដែលបានដើរតួយ៉ាងសំខាន់ជំរុញទំនាក់ទំនងឲ្យបានយ៉ាងជិតស្និទ្ធ ហើយអាចបង្កើតឲ្យមានកម្មវិធីកីឡារួមគ្នាផង ដែលធ្វើយ៉ាងណាឲ្យទំនាក់ទំនងល្អនេះឈានដល់ការដោះស្រាយរាល់បញ្ហាផ្សេងៗដែលកើតមានឡើងនៅតាមព្រំដែន» ។
ទន្ទឹមនឹងនេះ សម្ដេចតេជោនាយករដ្ឋមន្ត្រីបានសង្កត់ធ្ងន់ថា មិនត្រឹមតែអាជ្ញាធរដែនដីទេ កងទ័ពនៃប្រទេសយើងទាំងពីរក៏គប្បីដែលជំរុញទំនាក់ទំនង់ឲ្យបានកាន់តែជិតស្និតផងដែរ ព្រោះកាលណាមានភាពជិតស្និត ហើយទោះបីមានរឿងអ្វីក៏អាចដោះស្រាយ និងពិភាក្សាគ្នាបានដែរ ។ ក្នុងជំនួបលោកប៊ុនញ៉ាំង វរជីត បានគោរពជម្រាបជូនសម្តេចតេជោនាយករដ្ឋមន្ត្រីថា ជារៀងដរាបមក កម្ពុជា និងឡាវជាមិត្តជិតស្និតជាទីបំផុត ហើយក៏ជាមិត្តដែលបានជួយគ្នាទៅវិញទៅមកក្នុងន័យនេះ គឺបានបង្កនូវលក្ខណៈឲ្យប្រទេសទាំងពីរជាប្រទេសភូមិផងរបងតែមួយ ជាប្រទេសជិតខាងដ៏ល្អ ហើយក៏ជាប្រទេសដែលមានកំណើនពាណិជ្ជកម្មទៅវិញទៅមកកាន់តែកើនឡើងល្អ ជាងនេះទៀតក៏មានសុវត្ថិភាពល្អផងដែរនៅតាមព្រំដែន ។
លោកបន្តថា កន្លងមកភាគីឡាវមានសេចក្តីរីករាយយ៉ាងខ្លាំងដែលនាយករដ្ឋមន្ត្រីទាំងពីរបានលើកកម្ពស់លើកទំនាក់ទំនងប្រទេសទាំងពីរឲ្យទៅជាទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយក្នុងរយៈពេលយូអន្លាយ និងបានជំរុញបន្ថែមទៀតនូវទំនាក់ទំនងនៃប្រទេសទាំងពីរឲ្យកាន់តែជិតស្និទ្ធ និងកាន់តែមានកម្រិតជាយុទ្ធសាស្ត្រគ្រប់ជ្រុងជ្រោយ ក្នុងន័យនេះដែរលោកបានបន្ត គោរពជូនសម្ដេចតេជោនាយករដ្ឋមន្ត្រីថា ក្នុងរយៈពេល២ឆ្នាំកន្លងមកនេះ លោកបានមកកម្ពុជា ហើយបានសង្កេតឃើញថា ប្រទេសកម្ពុជាមានការរីកចម្រើនយ៉ាងឆាប់រហ័សជាទីបំផុត ចំពោះប្រជាពលរដ្ឋកម្ពុជាវិញក៏មានជីវភាពរស់នៅល្អប្រសើរផងដែរ ៕
ចែករំលែកព័តមាននេះ