ខេត្តកំពង់ឆ្នាំង ៖ ដោយសារតែសុខសន្តិភាព និងមានការរីកចម្រើន រួមផ្សំខេត្តកំពង់ឆ្នាំងមានតំបន់ទេសចរណ៍ច្រើនកន្លែងផងនោះ ធ្វើឲ្យខេត្តមួយនេះមានកំណើនភ្ញៀវទេសចរណ៍កាន់តែកើនឡើងជារៀងរាល់ឆ្នាំ ។ នេះបើតាមការបញ្ជាក់ពីលោក សេង សាលី…
ខេត្តកំពង់ឆ្នាំង ៖ ដោយសារតែសុខសន្តិភាព និងមានការរីកចម្រើន រួមផ្សំខេត្តកំពង់ឆ្នាំងមានតំបន់ទេសចរណ៍ច្រើនកន្លែងផងនោះ ធ្វើឲ្យខេត្តមួយនេះមានកំណើនភ្ញៀវទេសចរណ៍កាន់តែកើនឡើងជារៀងរាល់ឆ្នាំ ។ នេះបើតាមការបញ្ជាក់ពីលោក សេង សាលី ប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានប្រាប់កោះសន្តិភាពកាលពីថ្ងៃសុក្រចុងសប្តាហ៍កន្លងទៅនេះ ។
ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី បានបន្ថែមថា ភ្ញៀវទេសចរដែលមកខេត្តកំពង់ឆ្នាំង បានធ្វើដំណើរតាមមធ្យោបាយពីរប្រភេទ គឺផ្លូវគោកនិងផ្លូវទឹក ។ ដោយចាប់ផ្ដើមចេញពីរាជធានីភ្នំពេញតាមរយៈកប៉ាល់ទេសចរណ៍ បន្ទាប់មកភ្ញៀវទេចរណ៍បានឡើងចេញពីកប៉ាល់នៅចំណុចព្រែកក្តាម ក្នុងស្រុកពញាឮ ខេត្តកណ្តាល ហើយបានជិះរថយន្តក្រុងមកតាមផ្លូវជាតិលេខ៥ រួចបន្តដំណើរចូលទៅកាន់វត្តពោធិ៍រុក្ខារាម ហៅវត្តកំពង់ត្រឡាចក្រោម ដើម្បីទស្សនាវត្តដ៏មានវ័យចំណាស់មួយនេះ ដែលមានគំនូរបុរាណ ដ៏យូរលង់ណាស់មកហើយ ប៉ុន្តែពណ៌គំនូរមួយចំនួននៅតែស្រស់ស្អាតស្ទើរដូចដើម ។ វត្តមួយនេះស្ថិតក្នុងភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ដែលវត្តនេះជាទីចាប់អារម្មណ៍របស់ភ្ញៀវទេចរបរទេសដ៏សំខាន់ណាស់ដែរ។
លោកប្រធានមន្ទីរទេសចរណ៍ខេត្តបានបន្តថា បន្ទាប់ពីភ្ញៀវទេចរណ៍បានទស្សនានៅវត្តកំពង់ត្រឡាចក្រោមរួចហើយ ភ្ញៀវទេសចរបានដូរការធ្វើដំណើរដោយជិះរទេះគោវិញម្ដង គឺជិះចេញពីវត្តកំពង់ត្រឡាចក្រោម ដើម្បីទស្សនាការរស់នៅរបស់ប្រជាពលរដ្ឋតាមដងផ្លូវ រួចសំដៅទៅមាត់ទន្លេដើម្បីចូលជិះកប៉ាល់វិញ ។ ប៉ុន្តែចំណុចនេះលោកក៏បានបញ្ជាក់ដែរ មានភ្ញៀវខ្លះទៀតជិះកប៉ាល់ពីរាជធានីភ្នំពេញមកដល់មាត់ទន្លេ កំពង់ដរ កំពង់ត្រឡាចក្រោម រួចជិះរទេះគោមកទស្សនានៅវត្តពោធិ៍រុក្ខារាម ហើយទើបជិះរទេះគោត្រឡប់ទៅកប៉ាល់វិញ ។
លោកប្រធានមន្ទីរទេសចរណ៍ខេត្តបានបន្តថា ក្រោយពីទស្សនាវត្តកំពង់ត្រឡាចក្រោមរួចហើយ ភ្ញៀវបានធ្វើដំណើរតាមកប៉ាល់លើផ្លូវទឹក តាមដងទន្លេសាប រហូតដល់កំពង់ផែផ្សារក្រោម ក្រុងកំពង់ឆ្នាំង ទើបបានឡើងគោកទស្សនាផ្សារក្រោមហើយ ទើបឡើងជិះរថយន្តទួរីសរបស់ក្រុមហ៊ុនទេសចរណ៍ ដើម្បីបន្តដំណើរទៅទស្សនានៅភូមិអណ្ដូងឫស្សី ឃុំស្រែថ្មី ស្រុករលាប្អៀរ ដើម្បីទស្សនាជីវភាពរស់នៅរបស់ប្រជាពលរដ្ឋការធ្វើស្រែចំការ ទស្សនាការធ្វើស្មូនឆ្នាំងដី ទស្សនាការឡើងត្នោត និងផលិតស្ករត្នោតជាដើម ។ នៅទីនោះភ្ញៀវបរទេស២នាក់ប្តីប្រពន្ឋខ្លះ បានស្លៀកសំលៀកបំពាក់ខ្មែរ រួចទូលក្អម រែកបំពង់ និងឡើងត្នោតជាដើម ដើម្បីថតរូបទុកជាអនុស្សាវរីយ៍ ។ ក្រោយពីទស្សនា នៅទីនោះអស់ចិត្តហើយ ទើបភ្ញៀវក៏វិលត្រឡប់ទៅកប៉ាល់វិញ រួចក៏បន្តដំណើរទៅទស្សនាទន្លេសាបនឹងបន្តដំណើរ ទៅខេត្តសៀមរាបទៀតផង ។
ដោយឡែកក៏មានភ្ញៀវទេសចរបរទេសខ្លះដែលមកទស្សនាខេត្តកំពង់ឆ្នាំងតាមរយៈឯកជនផ្ទាល់ខ្លួន ក៏បានឆ្លងទន្លេទៅទស្សនានៅស្រុកកំពង់លែង និងជិះទូកដរដើម្បីទស្សនានូវទិដ្ឋភាពផ្សារក្រោមផងដែរ ។
ទោះបីជាយ៉ាងនេះក្តី លោកប្រធានមន្ទីរទេសចរណ៌បានបញ្ជាក់ថា ភ្ញៀវទេសចរណ៌បរទេសទាំងនោះ មិនបានសម្រាកនៅខេត្តកំពង់ឆ្នាំងទេ ហើយភ្ញៀវទាំងនេះភាគច្រើនជាជនជាតិ អាល្លឺម៉ង់ និងបារាំង ដែលមានវ័យចំណាស់ៗ ឬអាចនិយាយបានថា ជាភ្ញៀវដែលចូលនិវត្តន៍ ។ ដោយឡែកភ្ញៀវទេសចរណ៌ដំណើរកំសាន្តឯកជន ឬតាមរយៈសៀវភៅមគ្គុទេសទេសចរណ៌វិញ ទើបអាចមានសម្រាកនៅតាមសណ្ឋាគារ ឬ ផ្ទះសំណាក់ នៅខេត្តកំពង់ឆ្នាំង ៕
ចែករំលែកព័តមាននេះ