ខេត្តឧត្តរមានជ័យ ៖ កាលពីថ្ងៃទី៨ កុម្ភៈ ត្រូវជាថ្ងៃទី២នៃព្រឹត្តិការណ៍កីឡា-ទេស ចរណ៍«ថ្មើរជើងប្រវត្តិសាស្ត្រ-អន្លង់វែង»លើក ទី២ មានប្រជាពលរដ្ឋខ្មែរ-ថៃរាប់ពាន់នាក់នាំគ្នាសម្រុកចូលទស្សនាកម្សាន្តការប្រគំតន្ត្រី ការតាំងពិព័រណ៍ និងសកម្មភាពកីឡាផ្សេងៗជាច្រើនទៀត ដែលរៀបចំឡើងដោយក្រសួង ទេសចរណ៍ គណៈកម្មាធិការជាតិអូឡាំពិកកម្ពុជានិងអាជ្ញាធរខេត្តឧត្តរមានជ័យ ។ នេះបើតាមការឱ្យដឹងពីលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា។
លោក វ៉ាត់ ចំរើន បានមានប្រសាសន៍ថា គិតត្រឹមល្ងាចថ្ងៃសៅរ៍ ទី៨ កុម្ភៈ ឆ្នាំ២០២០ តាមរយៈកម្មវិធីរត់កម្សាន្ត និងការប្រកួតកីឡាបាល់ទាត់មិត្តភាពកម្ពុជា-ថៃ បានទាក់ទាញប្រជាពលរដ្ឋនៃប្រទេសទាំងពីរជាពិសេសសិស្សសាលា កងកម្លាំងកម្ពុជា-ថៃចូលរួមទស្សនាប្រមាណ៣០០០នាក់ ។ បើបូកសរុបទាំងថ្ងៃបើកឆាកដំបូងគឺនៅថ្ងៃទី៧កុម្ភៈទៀតផងនោះ ចំនួនអ្នកចូលរួមទស្សនាប្រមាណជាង៥០០០នាក់ឯណោះ ។
អ្វីដែលជាការកត់សម្គាល់គឺនៅយប់ថ្ងៃទី៨ កុម្ភៈ មានប្រជាពលរដ្ឋនៃប្រទេសទាំងពីរចូលរួមទស្សនាការតាំងពិព័រណ៍ ការប្រគំតន្ត្រី កីឡាចំបាប់បូរាណ នៅបឹងតាម៉ុករាប់ពាន់នាក់ ដែលនេះសបញ្ជាក់ឱ្យឃើញថា ប្រជាពលរដ្ឋមានការគាំទ្រសន្តិភាពពេញលេញនៃតំបន់តស៊ូចុងក្រោយរបស់របបខ្មែរក្រហម ។ ព្រឹត្តិការណ៍កីឡាទេសចរណ៍លើកទី២នេះត្រូវបានគេរៀបចំធ្វើឡើងរយៈពេល៣ថ្ងៃពេញគិតចាប់ពីថ្ងៃទី៧-៩កុម្ភៈ ដែលផ្ទុយពីលើកទី១មានតែ១ថ្ងៃប៉ុណ្ណោះ។
លោកវ៉ាត់ ចំរើន បានបញ្ជាក់ថា ជាមួយនឹងការពង្រីកព្រឹត្តិការណ៍ឱ្យកាន់តែធំបែបនេះគឺក្រសួងពាក់ព័ន្ធចង់ធ្វើការផ្សព្វផ្សាយនូវតំបន់នេះឱ្យកាន់តែមានការទាក់ទាញ ហើយក៏ចង់ប្រាប់ជាសាធារណៈថា តំបន់ប្រវត្តិសាស្ត្រ-អន្លង់វែង ដែលជាតំបន់តស៊ូចុងក្រោយនៃរបបខ្មែរក្រហមទទួលបានសុខសន្តិភាពពេញលេញ ហើយបានក្លាយជាតំបន់ទេសចរណ៍ប្រវត្តិសាស្ត្រ បន្ទាប់ពីធ្វើសមាហរណកម្មនៅក្នុងឆ្នាំ១៩៩៨។
គួររំលឹកថា រយៈពេល៣ថ្ងៃនៃព្រឹត្តិការណ៍កីឡាទេសចរណ៍នេះ ក្រៅពីរៀបចំឱ្យមានការប្រកួតកីឡាមិត្តភាពកម្ពុជា-ថៃដែលមានដូចជាប្រណាំងកង់ បាល់ទាត់ រត់ប្រណាំងលើភ្នំដងរែក ប្រណាំងទូក កីឡារាំ និងគុនល្បុក្កតោ ការតាំងពិព័រណ៍ម្ហូបអាហារ ក៏មានការតាំងរូបថតចំនួន១០០ផ្ទាំង ញ៉ាំងឱ្យកម្មវិធីទាំងមូលកាន់តែមានភាពអធិកអធមក្រៃលែងថែមទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ